Te noho i te pae 2 | Living at Level 2

  • Rua mita te tawhiti i ērā atu nō waho i te kāinga, kia kotahi mita hoki i ērā atu i ngā wāhi mahi.
  • Mau uwhi mata i ngā waka tūmatanui, i ngā rerenga hoki, i ngā wā hoki e uaua nei te tū tīrara, pēnei i ngā wā kei te hokomaha, kei ngā toa rānei.
  • Rite tonu te horoi me te whakamaroke i ngā ringaringa.
  • Maumahara, ki te pāngia koe e ngā tohumate o te maremare me te rewharewha, me noho ki te kāinga, me waea ki tō tākuta, ki tō kaituku ratonga hauora ā-iwi rānei, ki Healthline rānei, ka pātai ai mēnā e tika ana kia whakamātauria koe. Kaua e hāereere, e haere rānei ki te kura, ki te mahi rānei.
  • Puritia he kōrero mō ngā wāhi e haere rā koe, mō te hunga hoki ka torona e koe. Whakamahia rānei te taupānga o NZ COVID Tracer, tētahi puka-iti rānei e pā ana ki te whakatewhatewha pānga mō KOWHEORI-19, ngā tuhinga ā-ringa rānei.

Kua herea kia kaua e tokomaha atu i te 100 tāngata i ngā hui pēnei i ngā huinga karakia, i te hākinakina, i te taiopenga pāpori hoki.

Kua whakaaetia te tokomaha atu ki te 100 tāngata i ngā tangihanga mehemea ka ea i te kaiwhakahaere ngā herenga.

Ngā herenga me ngā tohutohu mō te tangihanga

Te mahi pakihi i runga i te haumaru

E āhei ana kia tuwhera ki ngā kaimahi me ngā kirihoko ngā wāhi pakihi e whakatutuki ana i ngā herenga o te hauora tūmatanui.

Ka whai wāhi ki ngā herenga o te hauora tūmatanui, ko:

  • te whakaatu i tētahi pānui whakaahua kei reira te tohu QR o te taupānga o NZ COVID Tracer, ko te whai i pūnaha whakatewhatewha pānga kē; ā,
  • te ū ki ngā whakaritenga akuaku pēnei i te horoi ringa, i te auau hoki o te horoi mata, ā
  • te whai i ngā aratohu e pā ana ki te tū tīrara.

E āhei ana kia rere ngā ratonga ka tukuna ki ngā wāhi tonu o te kirihoko — hei tauira, ki tōna kāinga, me ngā ratonga pā tata e whakatutuki nei i ngā whakaritenga o te hauora tūmatanui.

Ki te kore e tutuki i te wāhi mahi ēnei whakaritenga, kua kore e āhei kia rere ana mahi.

E whakatenatenahia ana ngā pakihi katoa kia whai i huarahi mahi kē mēnā ka taea, kia kōrero ki ngā kaimahi ki te tautuhi i ngā tūraru me ngā huarahi hei whakatau i ērā.

Me tutuki hoki i ngā pakihi ērā atu kawenga katoa mō te hauora me te haumaru, me whai hoki kia haumaru, kia ora tonu hoki ngā kaimahi, ā, me eke hoki rātou ki ngā paeraro e tika ana mō te tuku mahi.

Te mātauranga

E tuwhera ana ngā Whare Ako Kōhungahunga, ngā whare kōhungahunga, ngā kura me ngā whare o ngā kura tuatoru ki ngā pakeketanga katoa.

Ka haumaru te noho a te tamariki ki te kura.

Me noho ngā tamariki me ngā taiohi ki te kāinga mēnā:

  • kua māuiui
  • kua pāngia e ngā tohumate o te KOWHEORI-19
  • e noho taratahi ana
  • e tāria ana ngā hua o te whakamātautau KOWHEORI-19.

Te hāereere me te nekeneke

Mēnā kua māuiui koe, e noho ki te kāinga.

Mēnā e ora ana koe, e pai ana tō hāereere. Heoi, me ū ki ngā tikanga e haumaru ai te haere.

Me mau ārai i ngā waka tūmatanui, i ngā wā rānei e uaua ana te tū tīrara. Puritia he kōrero mō ō nekehanga.

Te whakapakari tinana me te mahi a te rēhia

E pai ana tō kuhu ki ō mahi me ngā mahi ā-rēhia he rite tonu te mahia mēnā rā ka haumaru te mahia. Heoi mēnā kua māuiui koe, e noho ki te kāinga.

I a koe e whakapakari tinana ana i ngā wāhi tūmatanui, me whai kia rua mita tō tawhiti i ngā tāngata kāore i te mōhiotia e koe.

E āhei ana tō mahi i ngā mahi pēnei i te:

  • hīkoi, i te eke paihikara me te aru kararehe i ngā whenua rāhui e tūmatanui ana
  • kauhoe i tētahi puna kaukau e tūmatanui ana, engari arā anō ōna herenga
  • haere ki te whare whakapakari tinana,
  • eke poti me ngā tākaro i te wai ki runga waka whai mīhini.

Me kaua e neke atu i te 100 te tokomaha i ngā tākaro i te hapori.

Kāore e whai wāhi atu ki te 100 tāngata ngā kaiwawao, ngā āpiha me kaimahi kē atu e tuku ratonga ana ki te tākaro.

Kāore e herea ngā huihuinga mō ngā tākaro e whai kaitākaro ukiuki ana, e whai kaitākaro harangotengote ana rānei. E pēnei ana nā te mea e kīia ana ngā kaitākaro he kaimahi i te wāhi mahi. E kīia ana he huihuinga ngā kaimātakitaki, me te aha kua herea kia kaua e neke atu i te 100 te tokomaha i ia rōpū.

E āhei ana kia tini tonu ngā wāhi kua tautuhia i te papa tākaro mā te whai:

  • kia kaua e neke atu i te 100 te tokomaha i te rōpū
  • kia wehe tētahi rōpū i tētahi mā te ū tonu rānei kia 2 mita te tū tīrara i waho, mā te whakatū tauārai rānei

Me whai kia kaua rānei ngā rōpū e kōmitimiti, e whai wāhi rānei ki te wāhi kotahi i te wā kotahi.
 
Hei tauira, e āhei ana kia tākarohia te whutupōro mēnā kāore e tokomaha atu i te 100 tāngata i te papa tākaro i te wā kotahi. Mēnā he pae mātakitaki kei ngā taha e rua o te papa tākaro, e āhei ana kia hui te tokomaha atu ki te 100 ki ia pae mātakitaki mehemea e wehe ana rātou i ērā kei tērā atu pae mātakitaki, i ngā kaitākaro me ngā kaiwawao hoki kei te papa tākaro.
 
Ko ngā kaiwhakahaere me te tangata e whakahaere ana i te wāhi e noho haepapa ana ki te kohikohi i ngā pārongo mō te whakatewhatewha pānga.

He aratohu nā Ihi Aotearoa (external link)

Ngā huihuinga pāpori

Kia kaua rawa te huihuinga pāpori e tokomaha ake i te 100 ki tētahi wāhi kua tautuhia i te wā kotahi.

E whai wāhi ana ki tēnei:

  • te manaaki manuhiri i tō kāinga
  • ngā kaupapa ā-whānau
  • ngā mārena
  • ngā huinga karakia
  • ngā ngohe a ngā karapu me ngā rōpū hākinakina o te hapori
  • ngā hui tūmataiti pēnei i te huritau, i te pō tāriana rānei. 

Ngā herenga me ngā tohutohu mō te tangihanga

Kāore e whai wāhi atu ki te paerunga o te 100 tāngata ngā kaimahi e tuku ratonga ana ki te huihuinga pāpori.

Me mā tonu ngā mata, horoia ō ringa, ā, i ngā wā e taea ana, me haumaru te tū tīrara. Mēnā kāore e taea te ū kia tawhiti ā-tinana nei koe i te hunga kāore i te mōhiotia e koe, whakaarotia te mau uwhi mata.

E ai ki te ture, me mātua takoto i te kaiwhakahaere o te hui ngā ingoa o te hunga ka tae ake e taea ai te whakatewhatewha pānga mehemea me pērā. Ehara i te mea me pērā mehemea e mōhio ana te katoa ki te katoa, heoi anō he pai tonu te whakaaro kia pērā.

Mehemea kua rīhingia e koe tētahi wāhi hei huihuinga noa iho mō te tāngata, e pūmau tonu ana ngā ture e pā ana ki te huihuinga.

Last updated: