Ngā uwhi mata me ngā ārai | Face coverings and masks

Ko tā te mau uwhi mata he āwhina ki te aukati i te rerenga o te KOWHEORI-19, ā, mā te pērā hoki koe me ētahi atu e haumaru ai.

Ka āwhina te uwhi mata i te aukatinga o te rere o ngā kōpata ka kōrero ana, ka kata ana, ka maremare ana, ka matihe ana rānei tētahi. Ka whai wāhi atu hoki ki tēnei te tangata kua pāngia e te KOWHEORI-19, engari e pēnei ana ia kei te pai tōna ora, kāore rānei ngā tohumate e āta kitea ana.

Ehara i te mea me mau te nuinga o ngā tāngata i ngā ārai ā-hauora, ka mutu e pai ana kia mau rātou i ētahi atu momo uwhi mata. Ka kōrerotia te tangata me mātua whai i te uwhi mata, i te ārai ā-hauora rānei, e tōna kaituku mahi.

Mehemea kāore ō uwhi mata, māu rānei tētahi e hanga, e hoko rānei.

Ngā uwhi mata i te Pae Mataara 1

Ehara i te mea me mātua whai uwhi mata. Mā te mau uwhi mata i ngā wā kāore e taea te tīrara tonu i te hunga kāore i te mōhiotia e koe, pēnei i ngā wā kei te hokomaha, e haumaru ake ai koutou ko tō whānau.
 
Me takatū tātou ina tūpono puta mai anō a KOWHEORI-19 ki te hapori. 

Ka pai kia whakaemihia he uwhi mata mō te katoa kei tō kāinga e noho ana i te nuinga o te wā.

Ngā uwhi mata i te Pae Mataara 2, i ērā rānei o runga ake

E whakatenatenahia ana te mau o te uwhi mata i ngā wā kāore e taea te tū tīrara tonu i te hunga kāore i te mōhiotia e koe, pēnei i te wā kei te hokomaha.

Me mau hoki ngā uwhi mata e te nuinga o ngā tāngata kei ngā waka tūmatanui me ngā waka rererangi. Ka whai wāhi atu ki ērā ko ngā tereina, ko ngā pahi me ngā waka kōpiko. Ka whai wāhi atu hoki ko ngā kaihautū o ngā waka iti e kawe pāhihi ana pēnei i te tēkehi me Uber.

Ehara i te mea me mau:

  • e te tangata e hauā ana, e pāngia ana rānei e te mate hinengaro e uaua ai ki a rātou te uwhi i ō rātou mata
  • e ngā tamariki kāore anō kia 12 tau te pakeke
  • i runga i ngā pahi o te kura
  • e ngā pāhihi o ngā waka iti e kawe pāhihi ana, pēnei i te tēkehi me Uber
  • i ngā haerenga mā runga waka kua āta tāpuia, i ngā haerenga rānei o te tira tāpoi
  • i ngā waka kōpiko i tētahi moutere ki tētahi
  • i ngā rerenga tūmataiti
  • e ngā kaikirimana tūmataiti e mahi nei i ngā ratonga rererangi, pēnei i te kaiwhakahaumako whenua mai i te rangi
  • i ngā wā o te whawhati tata, i ngā wā rānei me taunaki rawa te tangata i tōna tuakiri, i ngā wā rānei me kōrero ki tētahi e turi ana.

Mēnā ka pā tētahi o ēnei take ki a koe, ehara i te mea me whakaatu koe i tētahi tuhinga kotahi hei taunaki i te take kāore nei koe e mau ana i tētahi uwhi mata.

Kāore tō haerenga mā te waka tūmatanui e aukatihia.

He take whaimana tonu ā ētahi, pēnei i te take hauora, i kore ai e mau uwhi mata. Ehara i te mea me waea atu rānei ki te Pirihimana, me whakamataara rānei koe i te kaihautū rānei, i te kaiwhakahaere rānei, mehemea kua kite koe i tētahi kāore nei i te mau i tētahi uwhi mata.

Ka āwhina te nuinga e kaha ana ki te mau uwhi mata i te rerenga o te mate, ka mutu ka mau rātou i ngā uwhi mata i ngā wā me pērā rātou.

Mehemea e āta takahia ana e te tangata ngā ture mā te korenga e mau i tētahi uwhi mata i ngā waka tūmatanui me te kore i whaimana o te take, ka whiua pea ia ki te utu ā-hara o te $300, ki te utu rānei nā te kōti i whakatau, atu ki te $1000.

Te mau i tētahi uwhi mata

  1. Me mātua whai kia:
    • maroke
    • karukaru kore.
  2. I mua i tō mau i tō uwhi mata, horoia, whakamaroketia hoki ō ringaringa. Whakamahia ko te:
    • hopi me te wai rānei
    • patuero ā-ringa rānei (kia kaua e iti iho i te 60% te nui o te waipiro).
  3. Tukuna kia tūpoki te uwhi mata i tō ihu me tō waha, ka whakakikīngia ai mā ngā here rānei, mā ngā koropewa ā-taringa rānei. Ko te uwhi mata me:
    • tūpoki katoa i tō ihu, i tō waha me tō kauwae
    • hāneanea te mautanga, engari me piri hoki ki ngā taha o tō kanohi
    • tuku kia māmā noa iho tō hā
  4. Horoia anō ō ringaringa. Whakamahia ko te:
    • hopi me te wai rānei
    • patuero ā-ringa rānei (kia kaua e iti iho i te 60% te nui o te waipiro).

I te wā o te mau i te uwhi mata

  • Parea te pānga ki te wāhanga o mua o tō uwhi mata, ki tō kanohi tonu rānei
  • Parea te nekehanga o tō uwhi mata, tae atu ki te kumetanga ki raro iho i tō kauwae
  • Whakakapia ki uwhi mata kē mehemea kua haukū, kua taretare, kua paruparu rānei.

Te tango i tētahi uwhi mata

  1. Horoia, whakamaroketia hoki ō ringaringa. Whakamahia ko te:
    • hopi me te wai rānei
    • patuero ā-ringa rānei (kia kaua e iti iho i te 60% te nui o te waipiro).
  2. Tangohia tō uwhi mata. Tangohia mai i muri, ka kumea atu ai i tō kanohi. Whakamahia ngā koropewa rānei, wetekina rānei ngā here. Kaua e pā ki te wāhanga o mua o te uwhi mata, ki ō karu, ki tō ihu, ki tō waha hoki.
  3. Horoia rānei, rukea atu rānei tō uwhi mata.
    • Horoia ngā uwhi mata kua hangā i te papanga mā te pūrere horoi kākahu me te hopi kia 60 tohurau te wera o te wai. Āta whakamaroketia i mua i te whakamahinga anō. Kaua e whakamahia tētahi uwhi mata e haukū ana.
    • Rukea atu ngā uwhi mata e rangitahi nei te whakamahia. Raua atu ki tētahi ipu para e whai taupoki ana, ki tētahi pēke whai piringa rānei, ka whiua atu ai. Kaua e whakamahia anō, e whai rānei ki te patu i ngā huaketo o ngā uwhi mata e rangitahi nei te whakamahia.
  4. Horoia anō ō ringaringa mā te whakamahi i te:
    • hopi me te wai rānei
    • patuero ā-ringa rānei (kia kaua e iti iho i te 60% te nui o te waipiro).

Last updated: