Ki le Bluetooth tracing | Turn on Bluetooth tracing

Ua toe faafou le NZ COVID Tracer app ina ia maua ai le faiga faatekonolosi o le Bluetooth tracing. E mafai e le Bluetooth tracing ona e maua ai se lapataiga pe afai sa e latalata i se tasi ua faamaonia ua maua i le COVID-19 ma o loo faaaogāina foi le app.

E lē suia e le Bluetooth tracing isi faiga o loo faamaumauina ai fesootaiga poo le NZ COVID Tracer QR codes. E moomia pea ona e tago e scan QR codes e faamau ai nofoaga sa e iai. O le Bluetooth tracing o se tasi o auala faaopoopo — e fesoasoani e faamaumau ai tagata sa tatou latalata i ai.

Faiga e faaaogā ai

A uma ona ki le Bluetooth tracing, e iloa ua aogā lelei pe a lafo atu ai se ID code e patino mo oe. E pei o la e lafo e lau telefoni se faamalō i isi telefoni o loo latalata ane. O le aogā o le Bluetooth tracing e faamau ai poo le ā le latalata mai o le isi telefoni, ma le umi na iai i se nofoaga. E tatau i isi telefoni e te latalata atu i ai ona ki ai foi le Bluetooth tracing.

O lona uiga afai ua faamaonia se tasi i le COVID-19, e mafai e le auala lea ona lafo atu ai se faaaliga faalilolilo o loo iai uma ID eseese lea na lafo mai ia latou telefoni i le 14 aso ua tuanai atu. Afai ae iloa e lau telefoni soo se tasi o ID nei, ma e te ono lamatia talu ai le umi o le taimi na e latalata i ai, o le a faapena ona e maua se lapataiga. O le a fautuaina oe e le lapataiga lenei i auala e tatau ona e usitaia e maua ai lou saogalemu faapena foi i lou aiga.

Matamata i le Bluetooth tracing video o loo i le itulau lenei e te iloa ai le faiga e fai ai (external link)

Auala e ki ai

O le tele o telefoni e otomeki lava le faafou o le app. E mafai foi ona e filifili e faafou lava e oe lau app mai le app store poo le play store.

A maeʻa ona faafou lau app, o le a talosagaina oe e lau app pe e te manao e ki le Bluetooth tracing. O le taimi lava e ki ai lau app, o le a ola ai pea e tusa lava pe a tapuni lau app.

E lē faaaogā e le Bluetooth tracing data o telefoni feaveai, ma e lē faaalu maa auā e faaaogā le Bluetooth Low Energy.

E puipuia tulaga e patino ia te oe

A e faaaogāina le Bluetooth tracing, e puipuia i taimi uma tulaga e patino ia te oe — e lē mafai ona faailoa atu le nofoaga o loo e iai, lou igoa poo nisi lava faamatalaga e uiga ia te oe. E lē faamauina foi e le Bluetooth tracing tagata sa e fesootai i ai, poo nofoaga sa e iai.

O lona uiga afai e te maua se lapataiga talu ai na e fesootai ma se tasi ua faamaonia ua maua i le COVID-19, e leai ma se tasi na o oe lava e iloa le tulaga lea. O faamatalaga uma o fesootaiga na e aoina i le app o loo malupuipuia i lau telefoni, ma e pule lava oe poo ā faamatalaga e te manao e faailoa atu.