Siaki | Testing

Afai ua e maua i le fulū poo āuga o le fulū, faamolemole nofo i le fale ma vili le laina vili fua a le Healthline i le 0800 358 5453 poo lau fomai mo se fautuaga i le faia o sau siaki. Manatua, e fai fua siaki.

E tāua lo matou iloa o nofoaga tonu o loo iai le siama poo fea lava o afioaga o loo iai. O lona uiga o loo matou talosagaina soo se tasi ua maua i āuga o le COVID-19 e fai siaki, tusa lava poo oe o se tagata sitiseni Niu Sila, nofomau poo se tasi o asiasi mai.

E fai fua siaki ma tausiga mo le COVID-19 ma e mafai e tagata uma i totonu o Niu Sila ona fai siaki, e aofia ai tagata o loo iinei ae ua lē o toe aogā visa.

E lē faalauiloaina ou faamatalaga i le Immigration New Zealand, e tusa lava pe afai ua faamaonia ua e aafia i le faamaʻi.

E lē moomia ona iai sau numera National Health Index (NHI) pe faaali sau ID e fai ai se siaki. E moomia ona e faailoa ou faamaumauga e faafesootai atu ai oe e tagata o loo faia lau siaki, e logo atu ai oe i iuga o siaki sa fai.

Nofoaga e mafai ona fai ai siaki

E fai ma sui nofoaga e mafai ona fai ai lau siaki. O le nofoaga pito lelei e te mautinoa ai nofoaga o fai ai siaki e maua lea i le District Health Boards ma Public Health Units o lata ane.

E mafai ona e maua faamatalaga i nofoaga e fai ai siaki i le

Motu i Matu

Motu i Saute

Faatinoga o le siaki

Afai e moomia ona siaki oe mo le COVID-19, o le a aveese mai se mea (sample) mai ia te oe.

E sili atu ma le 1 le auala e mafai ai ona maua ai se sample. O le metotia masani e fai ai le siaki, e salu mai se mea i totonu o lou isu i le pito i tua. E faaaogā ai se tamai vavae e pipii i se fasi laau umi.

O mea o loo pipii i le vavae o le a iloilo i nofoaga faapitoa mo suesuega. E ono umi se taimi e faatali ai iuga o siaki.

O le a faailoa atu le taimi ma le auala e faafesootai atu ai oe i iuga o siaki i le taimi lava e fai ai lau siaki. E faailoa atu lava iuga o lau siaki, tusa lava pe faamaonia pe lē faamaonia.

Afai o e iai i totonu o Aukilani e tatau ona e nofo i le fale ma ia faanofoesea ai oe seia maua atu iuga o lau siaki.

O le toatele o tagata i fafo atu o Aukilani e lē moomia ona faanofoesea a o faatalitali iuga o se siaki – o le a faailoa atu e lau fomai tulaga e tatau ona e faia.

E faatoa talosagaina lava le faanofoesea o oe pe afai:

  • sa e malaga talu ai nei i atunuu mamao
  • sa e fesootai ma se tasi sa malaga talu ai nei
  • sa e fesootai vavalalata ma se tasi ua faamaonia le aafia i le COVID-19.

Afai ua fai sau siaki e tatau ona e mulimulitai i fautuaga ua tuuina atu i gaioiga e tatau loa ona fai.

Tulaga e feagai ma oe pe afai ua faamaonia ua e aafia

Afai ua faamaonia ua e aafia o le a faafesootai atu oe e se sui o le soifua maloloina e faatalanoa le uiga o lenei tulaga mo oe, e aofia ai:

  • le umi e moomia ai ona faanofoesea oe
  • o faatulagana mo le faanofoesea o oe ma au fesootaiga ma lou aiga o loo tou fale faatasi
  • tagata uma sa e fesootai i ai talu ai nei

O le a talosagaina oe e te nofo i se nofoaga ua saunia e le malo i le taimi atoa o loo e maʻi ai. O se faiga lea e faigofie ai ona fesoasoani i aiga ma faaitiitia le pepesi o le siama. E fesoasoani e tausi le saogalemu o lou aiga ma isi tagata mai le COVID-19.

Afai e maua se tamaitiiti poo sona matua poo se tasi o tausia se tamaitiiti i le COVID-19 ma ua moomia ona faanofoesea i nofoaga faapitoa, o le a matou taumafai ia mautinoa o loo tausia lelei tamaiti e o latou matua poo tagata o loo faia le tausiga mo i latou.

O le a mafai ona e tuua le nofoaga i le taimi lava ua e malosi ai.