Maliu i le vaitaimi o le Lapataiga Vaega 2 | Deaths, funerals and tangihanga at Alert Level 2

Gaioiga e faatino pe a maliu se tasi

I le taimi ua maliu ai se tasi:

Faafesootai se tasi o auaunaga tau soifua maloloina po o le fomai a lē ua maliu
Faafesootai le pule o se falemaliu o lata ane pe a e manao e faaaogā se falemaliu

Afai na maliu ona o:

se mafuaaga e lē o silafia, e moomia ona faia se suesuega faafomai i le tino maliu. E muamua lava ona tuuina atu le fesoasoani mo oe mai le auaunaga tau soifua maloloina a lē ua maliu, ma e ono faafesootai Leoleo
se faaletonu tau soifua maloloina ua silafia, o le a talanoa le auaunaga tau soifua maloloina a lē ua maliu ma le pule o le falemaliu ua e faatonuina – ma faailoa atu e le pule o le falemaliu ia te oe faamatalaga i mafuaaga na maliu ai
le COVID-19, o le a tuuina atu e le auaunaga tau soifua maloloina a lē ua maliu ia te oe faamatalaga e te iloa ai gaioiga e tatau ona fai.

Mo maliu uma

E tatau ona nonofo i le fale tagata ua maua i le fulū po o āuga o le fulū, e fesoasoani e taofia ai le pepesi o le COVID-19.

O le faamaumauina o suafa ma faamatalaga o tagata sa fesootai o se vaega tāua o latou tali atu i le COVID-19. E moomia i maliu uma, ona faatulaga se faiga e faamaumauina ai suafa o tagata sa auai.

Tautuana lou saogalemu — faamamā fola i taimi uma, fufulu ou lima ma tausi le mamao e te saogalemu ai mai isi pe a mafai.

Afai e lē mafai ona e tausi le mamao mai isi tagata e te lē masani i ai, e fautuaina le faia o se mea e ufiufi ai ou fofoga.

Maliu i le vaitaimi o le Lapataiga Vaega 2

E mafai ona auai tagata e oo atu i le 100 i se maliu i le vaitaimi o le Lapataiga Vaega 2.

E lē moomia e i latou o loo faamaopoopoina se faatasiga ona lesitala i le Matagaluega o Soifua Maloloina, ina ia aloaia ai le faatautaia o se maliu.

E tatau ia i latou o loo faamaopoopoina maliu ona usitaia le tulafono, e pei ona faamalosia ai le faamaumauina o suafa o tagata sa auai.

E faatatau tulafono mo faatasiga faitele i maliu o loo faia i:

falemaliu
falesā, fale tatalo Musalemi ma isi nofoaga mo tapuaiga
nofoaga e totogi le faaaogāina
fale o aiga

E maua nisi faamatalaga e uiga i tulafono mo faatasiga faitele i le https://covid19.govt.nz/everyday-life/gatherings-and-events/#social-gatherings-at-alert-level-2

Matou te fautuaina le taofia o fesootaiga e pei o le feasogi ma le opoopo atu i tagata seʻi vaganā pe afai:

tou te nonofo faatasi
o lou lava aiga
o uo vavalalata.

Aofaiga faatapulaa o tagata auai

O le aofaiga faatapulaa o tagata e auai (sefulu, limasefulu pe selau) e lē o aofia ai le faifeau poo le aufaigaluega a le falemaliu.

Tele vaega eseese

E mafai ona auai i maliu le tele o vaega eseese. E lē tatau ona silia ma le toatele ua faatapulaaina i ai (pe sefulu, limasefulu pe selau) i le taimi e tasi. E tatau i le isi vaega ona tuua le nofoaga a o lei ulufale atu le isi vaega. E lē mafai ona faatasitasi pe milo faatasi vaega e lua.

Nofoaga atofaina

O nofoaga atofaina e faasino i se nofoaga e tasi i totonu po o fafo o loo faatu ese mai isi nofoaga.

O nofoaga i totonu e faasino i se nofoaga e tasi pe afai o loo iai puipui e faailoga ai le tuaoi mai isi nofoaga. E mafai ona faaaogā puipui tumau pe lē tumau.

O nofoaga i fafo e faasino i se nofoaga e tasi pe afai:

o iai puipui e iloa ai le tuaoi mai le nofoaga lea ma isi nofoaga – e mafai ona faaaogā puipui tumau pe lē tumau, pe
e lē itiiti ifo ma le 2 mita le va o le mamao o tagata uma o loo i totonu o lea nofoaga ma isi tagata (o loo i fafo atu o lea nofoaga).

Afai e sili atu ma le tasi se nofoaga atofaina, e lē tatau ona faatasitasi tagata i le va o nofoaga ua atofaina. E aofia ai le ulufale, ulufafo poo le faaaogā o falelētaua.