Aotelega o le tuipuipui | Vaccine overview

O le mauaina o tuipuipui e saogalemu ma aogā o se vaega sili ona moomia o galuega o loo tatou faia e puipuia ai Niu Sila ma atumotu tuaoi o le Pasifika mai le COVID-19. E tāua foi tuipuipui i le toe faafoisia o le malosi i lo tatou tamaoaiga ma le toe tatala ai o lo tatou tuaoi.

E leai se tupe e totogi mo tuipuipui o le COVID-19. E lē faamalosia le faia o le ituaiga tuipuipui lenei i tagata lautele o Niu Sila.

O le a mafai e le tuipuipui o le COVID-19 ona puipuia i tatou i le lumanai mai le siama. Ae e tatau ia i tatou uma ona faaauau pea le faatinoina o la tatou pitolaau e taofia ai le pepesi o le COVID-19 i totonu o afioaga. E tatau ona tatou tausisi pea i tulafono TĀUA e fa: fufulu lima, scan QR codes, faaola le Bluetooth ma nofo i le fale pe afai ua maʻi.

A o tatou laasia lenei laasaga fou e tusa ai ma a tatou galuega e tetee atu i le COVID-19, ua sili atu ona tāua i le taimi nei le maua o faamatalaga mai faasalalauga ua aloaia. E leai se aogā ia i tatou o faamatalaga e lē saʻo i le vaitaimi o loo moomia ai ona tatou galulue faatasi e tineia le siama. E mafai ona e maua faamatalaga faatuatuaina mai; lau Fomai, Healthline, lau District Health Board, Matagaluega o Soifua Maloloina ma le upegatafailagi a le Unite Against Covid-19, www.covid19.govt.nz

Ia mautinoa e saogalemu le tuipuipui o le COVID-19 o loo faaaogā i Niu Sila

Ua mae‘a ona suesue ma talia aloaia e le Medsafe le tuipuipui o le Pfizer/BioNTech e faaaogā i totonu o Niu Sila. O le Medsafe o le pule faatonu tutoatasi tau soifua maloloina i totonu o Niu Sila. O lana matafaioi o le suesue o talosaga mo fualaau fou uma, e aofia ai tuipuipui. E tatau i tuipuipui ona usitaia tulaga faavaomalo ma aiaiga moomia tau lotoifale mo le aogā, saogalemu ma le lelei a o lei talia aloaia ma faaaogā i totonu o Niu Sila.

Faapolokalameina o le faiga o tuipuipui o le COVID-19

Ua faamautuina e le Malo le maua o le tuipuipui o le Pfizer/BioNTech mo le atunuu atoa ma fesoasoani ai i atumotu tuaoi o le Pasifika. O le a maua i Niu Sila le aofai atoa o le tui e 10 miliona o le tuipuipui o le Pfizer/BioNTech. Ua lava lelei lea mo tui e lua e fai mo le 5 miliona tagata e tetee atu ai i le COVID-19.

E agavaa tagata uma i totonu o Niu Sila mo le faia o le tuipuipui o le COVID-19 e aunoa ma se tupe e totogi, tusa lava po o le ā le tulaga o loo iai lou visa ma le sitiseni. E lē faaaogāina soo se faamatalaga e aoina mo tulaga tau femalagaiga.

O loo saunia e le Matagaluega o Soifua Maloloina se fuafuaga e mautinoa ai o loo saʻo ma lelei le faasoasoaga o tuipuipui. O i latou e sili atu ona lamatia i le COVID-19 e aofia ai tagata faigaluega i le tuaoi, aufaigaluega a le soifua maloloina, Māori, tagata Pasifika, tagata matutua ma tagata e iai manaoga faapitoa, o i latou nei o le a ave i ai le faamuamua.

O tagata e muamua lava ona faia tuipuipui o i latou o loo faigaluega i le Managed Isolation and Quarantine - (MIQ) talu ai o ituaiga galuega o loo latou faatinoa e taofia ai le sao mai o le COVID-19 i totonu o Niu Sila. E aofia ai tagata e faamamāina nofoaga a le MIQ, tausimai o loo faatinoa siaki tau soifua maloloina i le MIQ, aufaigaluega e leoleoina le saogalemu o le nofoaga, aufaigaluega a le tiute ma tuaoi, aufaigaluega i luga o vaalele ma aufaigaluega i faletalimalo. O tagata foi o loo nonofo faatasi ma tagata faigaluega nei o le a muamua foi ona faia o latou tuipuipui.

Ua talia aloaia e le Medsafe le faaaogā o le tuipuipui Pfizer/BioNTech e tusa ma taiala o loo taʻua i lalo:

  • ua talia aloaia le faaaogā o le tuipuipui mo tagata ua 16 tausaga ma luga atu le matutua.
  • e fautuaina tamaitai o maʻitaga e faatalanoa ma a latou fomai lamatiaga ma le aogā o le faia o le tuipuipui.
  • e talafeagai le faaaogā o tuipuipui mo tamaitai o loo suasua susu.
  • o gasegase o loo faia iai togafitiga faapitoa, e aofia ai le Keytruda, Opdivo, Yervoy ma le Tecentriq e tatau ona sailia se fautuaga mai se fomai faapitoa a o lei faia le tuipuipui o le COVID-19 o le Pfizer mRNA.
  • o le a tuuina atu i tagata ua fai tuipuipui faamatalaga e uiga i aafiaga masani, mo se faataitaiga o le fiva, tiga maso ma le ivā.
  • e 20-minute e faatalitali ai pe a maeʻa ona fai le tuipuipui e mataituina ai aafiaga e ono aliaʻe mai.

Tagai i le itulau lenei mo nisi faamatalaga e uiga i le faagasologa o le faiga o tuipuipui i totonu o Niu Sila

Tagai i le itulau lenei mo faamatalaga i tulaga e tatau ona nofo sauni i ai pe a fai le tuipuipui

Tagai i le itulau lenei mo faamatalaga i tulaga e tatau ona nofo sauni i ai pe a mae‘a ona fai lou tuipuipui

Aafiaga o le tuipuipui i o tatou tuaoi

E lē o mafai ona iloa i le taimi nei tulaga e ono suia ai pulega o loo faia i lo tatou tuaoi i le maua ai o tuipuipui i totonu Niu Sila ma atunuu mamao.

O loo galulue le ausuesue e faamaonia pe ono mafai pea e se tagata ua uma ona fai lana tuipuipui, ona tauave pea ma faapepesi atu le COVID-19 i se isi tagata. Seiloga ua manino lelei faamatalaga i le tulaga lea, ona faatoa suia lea o tulaga o loo faia nei i o tatou tuaoi.

Last updated: