Siaki faaopoopo o le COVID-19 mo tagata ua toe taliu mai atunuu o loo pepesi malosi ai le faama‘i | Additional COVID-19 tests for returnees from higher-risk countries

Siaki a o lei malaga ese ma le UK ma USA

O loo maualuga pea puipuiga e taofia ai le sao mai o le faama‘i i le atunuu.

Mai le 11.59pm o le aso 15 Ianuari 2021, o le a moomia i ē malaga mai le UK ma USA ona tauaaoina iuga o le siaki RT-PCR mo le COVID-19, e faamaonia ai e lē o aafia i le faama‘i i totonu o le 72 itula a o lei tuua malaevaalele i atunuu mamao, ma e moomia ona faailoa se pepa faamaonia mai nofoaga e faia ai suesuega faapitoa poo isi ituaiga faamaoniga aloaia.

E tutusa lava galuega tau puipuiga o loo faatino foi i le taimi nei mo ē malaga mai faigamalaga umi e taunuu mai Niu Sila.

E tatau i tagata uma ua toe taliu mai ona nonofo pea i nofoaga o loo pulea ma vaavaaia ai le faanofoesea mo le 14 aso mai le taimi e taunuu ai i Niu Sila. O tulaga nei e fesoasoani ia tatou lava tapena ai i le taimi e toe pepesi ai le COVID-19 i le lalolagi, ma faaitiitia lamatiaga o le pepesi o le COVID-19 mo faigamalaga faaauau ma le ulufale atu i nofoaga o loo pulea ai le faanofoesea.

E moomia ona fai siaki i le Uluai Aso mo tagata ua taunuu i Niu Sila mai atunuu o loo pepesi malosi ai le faama‘i.

Mai le 11:59pm o le aso 31 Tesema 2020 soo se tasi ua taunuu i Niu Sila mai le UK po o le USA o le a moomia ona:

• fai le siaki o le COVID-19 i le uluai aso, o lona uiga, o le uluai aso na taunuu ai i nofoaga o loo pulea ai le faanofoesea
• nofo pea i totonu o le potu seia maua lelei iuga o le siaki
• afai o loo alia‘e ai āuga i le taimi na taunuu ai, o le a momoli sa‘o loa i nofoaga e vaavaaia ai.

O le isi lea faiga e faatumauina ai le malosi o galuega tau puipuiga mo Niu Sila mai le COVID-19, ma le ese o ituaiga ua fou mai o le siama lava e tasi o loo sasao i atunuu mamao ma o se siama e ono vave lava le pepesi.

E tutusa lava ma siaki PCR e fai i le isu o loo faia i tagata i le taimi nei.

Pe ā ma le 24-48 itula e faatali ai iuga o siaki.

Afai e lē o faamaonia le aafia i le faama‘i o lona uiga o le a faamae‘a le faanofoesea o tagata mo aso e 14 i nofoaga o loo pulea ai. O le a moomia ona toe faia se isi siaki i le aso 3 ma le aso 12 a o iai i nofoaga nei. O le toatele o tagata e moomia se faamaoniga e lē o aafia i le COVID-19 ma se faamaoniga mai sui o le soifua maloloina e itiiti lava se tulaga e ono aafia pe faapepesi ai le COVID-19, ma o tulaga nei e moomia a o lei tuua le nofoaga.

Afai ua faamaonia le aafia o se tasi i le faama‘i, o le a tuu mai luma le taimi e siitia ai i le nofoaga e vaavaaia ai, e ese mai le taimi na fuafuaina e aunoa ma le faia o se siaki i le uluai aso.

Mo nisi faamatalaga 

Mo tala lata mai i le COVID-19, faamolemole tagai i le
https://covid19.govt.nz/updates-and-resources/translations/

Mo nisi faamatalaga e uiga i nofoaga o loo pulea ma vaavaaia ai le faanofoesea, faamolemole tagai i le https://www.miq.govt.nz/travel-to-new-zealand/arriving-in-nz/ (external link)