Kelʻḁkit hün se ʻafʻaf teʻis COVID-19 se teʻ ne iris ne la surum se Niu Sirḁgi | Pre-departure testing for travellers to New Zealand

Matḁʻut la ʻafʻaf teʻis la se sur hoiʻḁkim se ʻos hanue teʻis Niu Sirḁgi tӓ ʻos garue pumuet ne la pӓrea ʻisa. 

Kamatam ʻe mēnet het se ʻon tuel heta ʻe pög (11:59pm) ne rån ruḁghul ma liḁm ne Janueri (25 January) 2021, teʻ ne iris ne la surum se Niu Sirḁgi, ka eagkeʻea iris ne leum ʻe Australia, Antarctica, Cook Islands, Federated States of Micronesia, Fiti, Kiribati, Marshall Islands, Nauru, New Caledonia, Niue, Palau, Samoa, Solomon Islands, Tokelau, Tonga, Tuvalu, Vanuatu, ma Wallis and Futuna, kop la kelʻåk se tḁku la ʻes ʻe aierʻḁkiḁg ne mou se ʻafʻaf teʻis COVID-19, ma kop la ʻinea tapeʻ ma ne iris kat pō ʻe ra ʻe ʻafʻaf teʻis ʻe laloag ne aoaʻ hifaghul ma ruḁ ka kat seminte rou ra ma kop la nā tapeʻ ma aierʻḁkiḁg teʻis laboratory certificate ne ma ʻon aierʻḁkiḁg hoiʻḁkit ne la hḁiasoag se ʻoris la pō la surum se Niu Sirḁgi.

Teʻ ne aierʻḁkiḁg ʻi PCR tests, LAMP ma viral antigen tests pō seʻ ma la aʻesʻaoʻåk la hḁiasoagan ʻou la aierʻḁkiḁg ne ʻӓe ka ʻäe kat seminte rou ra utut ne ʻӓe noho e.

Teʻ ne aierʻḁkiḁg ʻi kop la aʻsok ma aʻfumouʻåk ʻe ut ne ös la sḁkiroa ʻafʻaf teʻis – laboratory.

Puk ne Aierʻḁkiḁg fak tḁku (Medical certificates) ne pån ʻe teʻ ne kḁinag fäeag tūtū vaʻönʻåk la aʻesʻaoʻåk. Ka puk ne aierʻḁkiḁg ʻi kop la hӧlʻåk se fäeag fakfifis ta.

Teʻ ne läʻririʻ ne kat seminte heleʻ ra ʻe fḁu rua (huḁl ruaghul ma häk) kat aʻnoa ra la kelʻåk se tḁku hün se ʻafʻaf teʻis ka kat seminte rou ra ʻe hanuet ne iris noho e.

Teʻ ne iris ne la pō la nā ta puk ne aierʻḁkiget hün se ʻafʻaf teʻis (medical certificate) la aierʻḁkia ne iris neʻneʻia ʻe ʻon ʻiheteʻ ma kat pō hoiʻåk ra ʻe ʻafʻaf teʻis COVID-19 ma kat hat hoiʻåk ra la iris pō la foråsʻḁkia ʻafʻaf teʻis la sḁiʻåk la kat aʻnoa kelʻåk ra se tḁku ka iris kat seminte rou ra hanuet ne iris noho e.

Iris ne kat pō ʻe ra la kelʻåk se tḁku ʻe rēko ʻafʻaf fakforo kop la kelʻåk se ta leʻet ne garue fak tḁk (medical practitioner) ka kop la kelʻåk ʻe laloag ne aoaʻ hifaghul ma ruḁ ka iris kat seminte rou ra hanuḁ taʻag. Iris kop la nā ta puk ne aierʻḁkiḁg fak garuet (medical certificate) la rakʻåk ne iris kat pō ʻe ra la kelʻåk se tḁku ʻe rēko ʻafʻaf fakforo ma iris kat ʻes ra ʻe ta fakiʻoag ne mou se COVID-19.

Iris ne la sur karḁum se Niu Sirḁgi ma la fer hoiʻåk se ta hanḁu hoiʻḁkit ma la nōnō ma ʻe laloag ne märåʻ ne ʻahḁifer ta kat aʻnoa ra la kelʻåk se tḁku hün se ʻafʻaf teʻis.

Teʻ ne iris ne la hot se ta hanuḁ hoiʻḁkit täe rakʻåk la hḁifäegag ma utut ne ʻäe tӧg ʻou sal ta – airline(s) ne ma ʻon ʻamnåk hoiʻåk kop la aʻsok hün se ʻafʻaf teʻis. Hahanʻåk hoiʻåk se teʻ ne iris ne la hot ʻe hanuḁ ne iris noho e la sḁkior se teʻ ne foh ne mou se teʻ ne hanuḁ ne iris ӧs la laʻ sin.

Kamat ʻe rån vḁl ne Fepueri, teʻ ne iris ne la surum se laloag ne Niu Sirḁgi (kat hat ra teʻ ne hanuḁ ne aierʻåk fak foh la surum ka kat aʻnoa kelʻåk ra hün se ʻafʻaf teʻis) ne kat ʻes aierʻḁkiget la kelʻåk ne iris kat pō ʻe ra ʻe ʻafʻaf teʻis COVID-19 ne ma ʻoris puk la aierʻḁkia iris kat pō ʻe ra ʻe ʻafʻaf teʻis ma la pō la sämånʻåk fak foh ma pō la tӧg le heleʻ ʻe tola äfet.

Foh ne mou se iris ne la surum se Niu Sirḁgi ʻe terån mumue ta, ʻoris la kelʻḁkit hün se ʻafʻaf teʻis

Teʻ ne foh e kop la aʻsoko se iris ne la surum se hanue teʻ, ʻe avat ne iris la heleʻum se Niu Sirḁgi:

  • kop la noh pūʻatā ʻe laloag ne terån saghul ma häk ma tḁupir ma aʻsok teʻ foh ne mou se noh pūʻatā
  • kelʻåk hün se ʻafʻaf teʻis COVID-19 ʻe terån mumue ta, ʻon fuag seʻ iris kop la kelʻåk ʻe av het ma ne iris heleʻ ʻe teʻ ne ut ne väe la iris la noh pūʻatā
  • kop la nono ma ʻe ʻoris rumu se av het ne ʻoris aierʻḁkiget hün se ʻafʻaf teʻis la aʻfumouʻåk ʻe iris ne puer se maj ne ʻafʻaf teʻis
  • ka nōnō ka iris la pō ʻe ta fakiʻoag he his ne mou se ʻafʻaf teʻis ma iris kop la sur roa se ut ne iris kop la noh pūʻatā.

La aʻesʻaoʻåk PCR nasal swab hün se ʻafʻaf teʻis ʻe ʻon ʻiheteʻ.

Aʻfumouʻåk ne rogrog ne mou se kelʻak ne ʻafʻaf teʻis la hḁiatḁuag ma aoaʻ he ruaghul ma häk se häkeaghul ma vḁl.

Ka nōnō ka rogrog ne mou se ʻafʻaf teʻis la aʻfumouʻåk ka kat pō ʻe ra ma famori kop la noh la aʻvåh ʻoris terån saghul ma häk la fak ma se foh ne matanitū ta nā sin. Iris kop la kelʻåk hoiʻåk ʻe terḁni tē ʻon folu ʻe laloag ne ʻoris noh pūʻatā ta ma la aʻsok hoiʻåk ʻe terḁni te ʻon saghul ma rua. Se teʻ ne iris ne kelʻåk ma aʻfumouʻåk ne iris kat pō ʻe ra ʻe ʻafʻaf teʻis COVID-19 ma aʻfumouʻåk tapeʻ ma ʻe majat ne puer se maj ne ʻafʻaf teʻis ne iris la noanoa ne meaʻmeaʻ ʻoris la pō ne la foråsʻḁkia ʻafʻaf teʻis COVID-19 kop la ʻes ʻe aierʻḁkiḁg ta mumuḁ la iris la pō la aierʻåk la roua utut ne iris noh pūʻatā.

Ka nōnō ka rogrog ne ʻoris kelʻåk ta la aʻfumouʻåk ne famӧr teʻis pō ʻe ʻafʻaf ta ma iḁ la surʻåk mij pḁu se ut ne matanitū väe ma ӧs la famori la noh pūʻatā, ma kat aʻnoa ʻe ra la kelʻåk ʻe terån mumue ta.

Pā ʻinea rogrog hoiʻåk 

Se teʻ ne rogrog foʻou ne mou se ʻafʻaf teʻis COVID-19, figalelei ma hat ma sḁkior se https://covid19.govt.nz/updates-and-resources/translations/

Se teʻ ne rogrog ne mou se ut ne väe se noh pūʻatā hün se ʻafʻaf teʻis, figalelei ma hat ma sḁkior se https://www.miq.govt.nz/travel-to-new-zealand/arriving-in-nz/ (external link)

Last updated: