ʻOs nohnoho ʻe Tohige tē ʻon Tā (1) | Living at Level 1

ʻAfʻaf teʻis COVID-19 noh la ma ʻe ʻos gasava

Teʻ ne famӧr ʻatakoa ʻe Niu Sirḁgi kop la;

• Sor ma aʻmamas aʻlelei pḁu ʻou siʻu ʻe teʻ ne ava la pō la alʻḁkia ʻafʻaf teʻis. Aʻesʻaoʻåk sopo ma tḁnu la hḁiatḁuag ma seken he ruaghul. Aʻmamas aʻlelei pḁu.
• Fḁu ʻou nuju ʻe av ne koh ma heʻjia, fak se koh ne heʻjiḁ se ʻou isfu ne ʻou siʻu.
• Nōnō ka ʻäe pō ʻe masåʻ ta ma fuʻ ʻe ʻou hanue ta, ma heʻ se ʻou tḁk ta ne Healthline ma far hḁiasoag la laʻ la kelʻåk hün se ʻafʻaf teʻis. Se hot la laʻ se ta ut hoiʻḁkit, ne laʻ se rako ne garue.
• Noh matḁʻ la afʻåk teʻ ne ut tūtū ne ʻӓe laʻ sin ma famör ne ʻäe hḁipōag ma. Aʻesʻaoʻåk NZ COVID Tracer app, ne COVID-19 tracer booklet ne fåʻ ma afʻåk teʻ ne tē ne ʻӓe aʻsoko.

Puerʻåk ma fasʻåk tē la kelʻåk hün se ʻafʻaf teʻis

Puerʻåk ma fasʻåk tē se sal ne la fåʻ ma afʻåk teʻ ne ut ne ʻäe laʻ sin (contact tracing)

Puerʻåk ma fasʻåk tē se ʻafʻaf teʻis ma fakiʻoga

Hḁʻ het la fḁua isu ma nuju

Hḁʻ ut het ne kḁpʻåk la fḁua ʻou isu ma nuju hḁiasoag la pärea ʻäe ma famör tū ka la pär tapeʻ ma ʻäe ʻe av ne ʻäe kat pō ʻe ra la fū väevā ʻe ta leʻ hoiʻḁkit, fak se ʻe av ne ʻäe höt ʻe sal ne hoaʻ tög sal ʻofrḁu ne laʻ se koroa tögʻåk tē.

ʻE Tohige tē ʻon Tā (Alert Level 1), famori kop la kḁpʻåk ta hḁʻ ut het la fḁua ʻoris isu ma nuju ʻe av ne iris höt ʻe ʻahḁi fere la laʻ se ut tūtū ʻe laloag ne Niu Sirḁgi. Ka foh teʻis kat aʻmahʻåk ra se iris ne höt ʻe ʻahḁi fer ne iris ta ʻonʻon ne se kḁulaʻoag ne tög ʻahḁi fer ʻatakoa ta la gat ma ke iris ʻes ta la fere e.

Famori kop la kḁpʻåk ta hḁʻ ut het ʻe av ne iris höt ʻe sal ne hoaʻ tög sal ofrḁu ne laʻ se, leum ʻe, ne laʻlaʻ ʻe laloag ne pureʻag ne Auckland. Ka ne hat tapeʻ ma ʻahḁi laʻ uḁf ta, pas hoaʻ tög sala, ʻahḁi hoaʻ tög sala ma famör ne ül motokā hoaʻ tög sala fak se taxi ma Uber. Foh teʻis täe tapeʻ ma se pasa ma ʻahḁi laʻ uḁf hoaʻ tög sal ne laʻ sousou.

ʻE pureʻag tūtū ne tore, fasʻåk aʻmah se famori la kḁpʻåk ta hḁʻ ut het la fḁua ʻoris isu ma nuju ʻe av ne iris ʻe ta utut ne ʻep ka meaʻmeaʻ fak se sal hoaʻ tög sal ofrḁu; ka ne tekäe teʻis kat aʻmahʻåk fak foh ra.

Famör ʻe ʻon rereg kat aʻnoa ra la kḁpʻåk ta hḁʻ ut het la fḁua ʻoris isu ma nuju, fak se iris ne ma ʻoris ʻafʻaf ne ökök fakforo.

Puerʻåk ma rogrog ne mou se kḁpʻåk ne hḁʻ la fḁua ʻou isu ma nuju ma iris ne kat aʻnoa ʻe ra la aʻsok ʻamnåk teʻis; sḁkior se

Soʻo ne katoʻaga

Kat ʻes ra ta fohot se soʻo ma katoʻaga la famori la hḁiʻopoag. Agʻesea ma ala ne aragvaka, su ne ʻinos aʻlele, soʻ fak rotu ma soʻ ne katoʻaga se pureʻaga, maneʻa ma ut maneʻag ne sӓe ofrḁu.

Matḁʻ la noh väevā

ʻE Tohige tē ʻon Tā, ʻafʻaf teʻis COVID-19 pō våh la fuʻḁkia. Iḁ tē leleit la se noh hḁiʻeleag se famӧr ne ʻäe kat ʻinea ʻe ra ʻe av ne hot se taf ta. Tē teʻis la hḁiasoag la aʻfepʻia forås ne ʻaf ʻaf teʻis COVID-19 nōnō ka la noʻ hoiʻḁkim ʻe ʻos pureʻaga.

Garue ma pesnese

Pesnese ma ut garueaga la pō la säe la aʻsok garue la fak se av ta. Iris kop la nā se utut ne famori la rӓe se NZ COVID Tracer QR code ma aʻesʻaoʻåk teʻ ne sal hoiʻåk se ut tūtū ne ʻoris ut garueaga ne la fåʻ ma afʻåk teʻ ne famӧr ne sur ma hothot ʻe ʻoris ut garueag ta la vavhiḁn aoag ne famori nōnō ka ta leʻet pō ʻe ʻafʻaf teʻis ʻe ʻoris ut garueaga.

Ruerue ʻon famori ma sal ne hḁihoʻaga famori

Teʻ ne ut ne hoaʻ tӧg sal ofrḁu kop la kelʻåk QR codes la hḁiasoag se aoag ne famori nōnō ka ta leʻet pō ʻe ʻafʻaf teʻis.

Nōnō ka ʻӓe ʻafʻaf ma heʻ se ʻou tḁk ta ne Healthline la far hḁiasoag la kelʻåk ka ʻäe kat seminte laʻ ra se ta pureʻag ne hanuḁ hoiʻḁkit. Fuʻ ʻe ʻou hanue ta ma kelʻåk hün se ʻafʻaf teʻis nōnō ka rakʻḁkiof se ʻäe.

Rako

Ut rakoga, ut rakoag ʻon läʻririʻ pḁu ma ut rakoag lamlama la noh sӓe fak re rērē ne av ta. Ut rakoga noh pӓr ma ū la nā ʻou leleʻa la hӧʻ se rako.

ʻOn la pō ne rogrog aier ta

ʻE av ʻe ʻon rerege teʻ ne rogrog ʻi pån sio la rakʻåk rogrog sioksiok la hoaʻ tūen famori ʻe rogrog aier ta ma aʻsūsūen aʻhäe ʻon famori. Ma tē teʻis kat hḁiasoag ra ka agḁia ke ma aʻӧkӧk ʻos garue agʻesea ʻe avat ne ʻis pā garue agʻesea la hḁiasoag la fuʻḁkia forås ne ʻafʻaf teʻis.

Teʻ ne fasʻåk tē lelei la pō ne rogrog aire

Aʻnonoa ne surum ʻon famori se laloag ne ʻos Matanitū teʻis

ʻAfʻaf teʻis COVID-19 kat pō ʻe ra la fuʻḁkia ʻe ut tūtū ne rån teʻ. ʻOs foh ne mou se surum ʻon famori se laloag ne Matanitū teʻis noh aʻmahʻåk la aʻjeamjeman raksaʻ ne ʻafʻaf teʻis COVID-19 ʻon la surum ʻe ut tūtū ne rån teʻ.

Teʻ ne famӧr ne surum se Niu Sirḁgi kop la laʻ karḁu se utut ne matanitū väe la matḁʻ la ʻafʻaf teʻis la se hot se taf ta, ma kop la ma aierʻḁkiget la nā fak matanitū nōnō ka kat aʻnoa ra la noh ʻe ut teʻis. Nōnō ka iris ma ʻoris aierʻḁkiget nā fak matanitū nōnō la kat aʻnoa ra la noh ʻe ut teʻis ka iris kop la noh pūʻatā.

Teʻ ne iris ne garue ʻe ut garueag ne matḁʻ se famӧr ne noh pūʻatā, ma teʻ ne iris ne garue ʻe ut ne la pō ut ne aierʻåk famori la surum se laloag ne hanue teʻ kop la nat ke av kelʻåk hün se ʻafʻaf teʻis COVID-19.