Teʻ ne iris ne la hoʻim ʻe hanuḁ tūtū ne pō raksaʻ ʻe ʻafʻaf teʻis COVID-19 kop la sḁkior ma kelʻåk hoiʻåk hün se ʻafʻaf teʻis | Additional COVID-19 tests for returnees from higher-risk countries

Teʻ ne iris ne leum ʻe Rḁnrḁni ma Mereke kop la kelʻåk se tḁku ʻe rēko ʻafʻaf teʻis ka iris kat seminte rou ra hanuḁ taʻag

Matḁʻut la ʻafʻaf teʻis la se sur hoiʻḁkim se ʻos hanue teʻis tӓ ʻos garue pumuet ne pӓrea ʻisa. 

Kamatam ʻe mēnet het se ʻon tuel heta ʻe pög (11:59pm) ne rån saghul ma liḁm ne Janueri (15 January) 2021, teʻ ne iris ne la roua Rḁnrḁni ma Mereke kop la kelʻåk se tḁku la ʻes ʻe aierʻḁkiḁg teʻis RT-PCR ne mou se ʻafʻaf teʻis COVID-19, ma kop la ʻinea tapeʻ ma ne iris kat pō ʻe ra ʻe ʻafʻaf teʻis ʻe laloag ne aoaʻ hifaghul ma ruḁ ka kat seminte rou ra ma kop la nā tapeʻ ma aierʻḁkiḁg teʻis laboratory certificate ne ma ʻon aierʻḁkiḁg hoiʻḁkit ne la hḁiasoag se ʻoris la pō la surum se Niu Sirḁgi.

Foh fak garue täe kamat våh la ӧs la aʻesʻaoʻåk ma la aʻmahåk tapeʻ ma se iris ne tore ne la ferem ʻe ʻahḁi fer ne la leu sousoum se Niu Sirḁgi.

Teʻ ne iris ne la hoʻim se Niu Sirḁgi kop la noh pūʻatā la heleʻ ʻe terån saghul ma häk ʻe ut ne väe ma ös se ʻamnåk teʻis ka iris kop la aʻsok teʻ ne foh ne mou se noh pūʻatā ma foh ne mou se karatini ʻe avat ma ne iris surum se laloag ne Niu Sirḁgi. ʻAmnåk teʻis la hḁiasoag la ʻis la noh matḁʻua ma pärea ʻos famori nōnō ka ʻafʻaf teʻis COVID-19 la hӧʻ hoiʻḁkim se teʻ ne ut tūtū ne rån teʻ ma la aʻjeamjeman raksaʻ ma mamḁr ne ʻafʻaf teʻis COVID-19 ʻon la forḁsit ʻe av ne famori la surum se ʻos matanitū teʻis ma tapeʻ ma se teʻ ne ut ne ʻos matanitū ta väe la famori la noh pūʻatā.

Foh ne mou se iris ne la surum se Niu Sirḁgi ʻe hanuḁ tūtū ne ʻafʻaf teʻis raksaʻ pḁu, ʻoris la kelʻḁkit hün se ʻafʻaf teʻis ʻe terån mumuet ne iris surum se hanuḁ teʻis

Kamatam ʻe mēnet het se ʻon tuel heta ʻe pög (11:59pm) ne rån folaghul ma tā ne Tisempa (31 December) 2020 teʻ ne iris ne la surum se Niu Sirḁgi ʻe Rḁnrḁni ne Mereke kop la:

• kelʻåk hün se ʻafʻaf teʻis COVID-19 ʻe terån mumue ta, ʻon fuag seʻ iris kop la kelʻåk ʻe av het ma ne iris heleʻ ʻe teʻ ne ut ne väe la iris la noh pūʻatā
• kop la nono ma ʻe ʻoris rumu se av het ne ʻoris aierʻḁkiget hün se ʻafʻaf teʻis la aʻfumouʻåk ʻe iris ne puer se maj ne ʻafʻaf teʻis
• ka nōnō ka iris la pō ʻe ta fakiʻoag he his ne mou se ʻafʻaf teʻis ma iris kop la sur roa se ut ne iris kop la noh pūʻatā.

Teʻis foh hoiʻḁkit ne la nā hoiʻåk la matḁʻua ma pärea se Niu Sirḁgi ʻe ʻafʻaf teʻis COVID-19 ma teʻ ne kḁinag ʻafʻaf hoiʻåk ne noʻ hoiʻḁkim ʻe laloag ne rån teʻ ma ʻon la väo ne ʻafʻaf ʻi ʻon forås se bteʻ ne utu.

Iḁ la tē ʻeseat ma ne la aʻsok ʻe av ne teʻ ne famori la kelʻåk hün se ʻafʻaf teʻis (PCR nasal swab) fak ma se ʻon ʻiheteʻ.

Aʻfumouʻåk ne rogrog ne mou se kelʻak ne ʻafʻaf teʻis la hḁiatḁuag ma aoaʻ he ruaghul ma häk se häkeaghul ma vḁl.

Ka nōnō ka rogrog ne mou se ʻafʻaf teʻis la aʻfumouʻåk ka kat pō ʻe ra ma famori kop la noh la aʻvåh ʻoris terån saghul ma häk la fak ma se foh ne matanitū ta nā sin. Iris kop la kelʻåk hoiʻåk ʻe terḁni tē ʻon folu ʻe laloag ne ʻoris noh pūʻatā ta ma la aʻsok hoiʻåk ʻe terḁni te ʻon saghul ma rua. Se teʻ ne iris ne kelʻåk ma aʻfumouʻåk ne iris kat pō ʻe ra ʻe ʻafʻaf teʻis COVID-19 ma aʻfumouʻåk tapeʻ ma ʻe majat ne puer se maj ne ʻafʻaf teʻis ne iris la noanoa ne meaʻmeaʻ ʻoris la pō ne la foråsʻḁkia ʻafʻaf teʻis COVID-19 kop la ʻes ʻe aierʻḁkiḁg ta mumuḁ la iris la pō la aierʻåk la roua utut ne iris noh pūʻatā.

Ka nōnō ka rogrog ne ʻoris kelʻåk ta la aʻfumouʻåk ne famӧr teʻis pō ʻe ʻafʻaf ta ma iḁ la surʻåk mij pḁu se ut ne matanitū väe ma ӧs la famori la noh pūʻatā, ma kat aʻnoa ʻe ra la kelʻåk ʻe terån mumue ta.

Pā ʻinea rogrog hoiʻåk 

Se teʻ ne rogrog foʻou ne mou se ʻafʻaf teʻis COVID-19, figalelei ma hat ma sḁkior se https://covid19.govt.nz/updates-and-resources/translations/

Se teʻ ne rogrog ne mou se ut ne väe se noh pūʻatā hün se ʻafʻaf teʻis, figalelei ma hat ma sḁkior se https://www.miq.govt.nz/travel-to-new-zealand/arriving-in-nz/ (external link)