Au Tāpoki-mata e te au Matatāpoki | Face coverings and masks

Kare te maʻataʻanga o te tangata e anoanoʻia kia ʻaʻao i te matatāpoki a te rapakauʻanga, e ka rauka ia ratou i te ʻaʻao i tetai atu au tāpoki mata. Ka ʻakakite atu toʻou pu-ʻangaʻanga me ka anoanoʻia koe kia ʻaʻao tāpoki mata, me kore ra, matatāpoki a te rapakauʻanga i te ngāʻi ʻangaʻanga.

Me kare oʻou tāpoki mata, maʻaniʻia tetai, me kore ra, ʻokoʻia tetai.

E manako meitaki kia rava te au tāpokiʻanga mata no te katoatoa e noʻo ana ki roto i toʻou ngutuʻare.

Au tāpoki mata i raro ake i te ʻAkamatakiteʻanga Turanga 1

I raro ake i te ʻAkamatakiteʻanga Turanga 1, ka inangaroʻia te au tapokiʻanga mata i runga i te paʻīrere, ki tetai ua atu ngāʻi i roto ia Aotearoa. Kare teia e tāru mai i te au paʻīrere noʻou ūaʻorāi.

Ka inangaro katoa ia te au tāpokiʻanga mata, i runga i te au pereʻō tātakitai o te ʻoire ki, mei, e, na roto ia Tāmaki Makaurau. Tei roto i teia, te au rērue, au bus, e te au paʻī, e te au ʻakaʻoro i te au pereʻō tari pātete mei te au taxi, e Uber. Tei roto katoa i teia, te au bus, e te au rērue teretere mamao.

ʻĪ vaʻo ake ia Tāmaki Makaurau, te tāmānakoʻia atu nei kia ʻaʻao koe i tetai tāpoki mata, me kore ra, tāpokiʻanga i roto i te au ngāʻi piripiri te tangata, mei te pereʻō o te ʻoire, māri ra, kare e anoanoʻia.

ʻAkapiriʻanga ki te oraʻanga i raro ake i te turanga 1

Au tāpoki mata i raro ake i te ʻAkamatakiteʻanga turanga 2, me kore ra, te au turanga i runga ake

Aruaruʻia te ʻaʻaoʻanga i tetai tāpoki mata me kare e rauka ia koe i te ʻakamamao mei te aronga kare koe i kite mei te aronga i roto i te toa ʻoko kai.

Kia ʻaʻaoʻia te tāpoki mata e te maʻataʻanga o te tangata i runga i te au pereʻō o te oire tangata e te au paīrere. Tei roto katoa, te au rērue, te au bus e te au paʻī. Tei roto katoa, te au ʻakaʻoro i te au pereʻō rikiriki no te taritari pātete mei te au taxi e te Uber.

Tāpokiʻanga mata ʻakapaeʻia

Kare e anoanoʻia kia ʻaʻaona:

E te aronga pakipaki tai, me kore ra, te maki kopapa, me kore ra, te maki manako, te ʻakangatā ra i te tāpokiʻanga i to ratou mata
E te tamariki i raro ake i te 12 mataʻiti
I runga i te au bus ʻāpiʻi
E te au pātete i runga i te au pereʻō rikiriki no te taritari pātete, mei te au taxi e te Uber
I runga i te mea tāraʻuʻia, me kore ra, te au pupu turoto
I runga i te paʻī interisland
I runga i te au paʻīrere o te aronga ʻona
E te au ʻona turanga paʻīrere tāraʻu mei te au paʻīrere rūrū maniua
I roto i te turanga o tetai manamanatā poʻitirere, me kore ra, me anoanoʻia tetai kia ʻakatinamou i tona tapaʻo, me kore ra, te komakoma atu ki te taringa turi.

Me kua tano tetai o teia au tumu kia koe, kare koe e anoanoʻia kia ʻakaāri i tetai pēpa maki, me kore ra, i tetai atu tātāʻanga ei ʻakapāpu i te tumu i kore ei koe i ʻaʻao tāpoki mata.

Kare koe e tāpūʻia i te kake atu ki runga i tetai pereʻō o te ʻoire.

E mea puʻapinga i te ʻakamaʻara e, e tumu meitaki ta tetai pae, mei te turanga makimaki, i kore ei i ʻaʻao tāpoki mata. Kare e anoanoʻia i te tāniuniu atu i te ʻAkavā, me kore ra, te ʻakamatakite atu i te tangata ʻakaʻoro, me kore ra, i te akaaere me kite koe i tetai tangata kare e ʻaʻao tāpoki mata ana.

Kua kite matou e ka ʻaʻao tāpoki mata te maʻataʻanga o te aronga ka rauka i te ʻaʻao tāpoki mata me anoanoʻia, ei tauturu atu i te tāpū i te totoʻaʻanga.

Me te ʻaʻati ra tetai aronga i te au ʻakaueʻanga ma te kore e ʻaʻao tāpoki mata i runga i te au pereʻō o te ʻoire, e kare a ratou tumu meitaki, ka tiātiʻia ratou e $300, me kore ra, ka taeria ki te $1,000 te tiāti a te ʻakavāʻanga.

Ka ʻakapēʻea me ʻaʻao i te tapoki mata

ʻĀkara meitaki ia toʻou tāpoki mata. ʻAkapāpūʻia e e:
- mā
- marō
- kare i kino.
ʻŌreiʻia toʻou rima. I mua ake ka ʻaʻao ei koe i toʻou tāpoki mata, ʻōreiʻia ma te tamarō atu i toʻou rima. Tāʻangaʻangaʻia:
- te puʻa e te vai
- te vairakau ʻōrei rima (kia taeria ki te 60% kava).
ʻAʻaoʻia toʻou tāpoki mata. Tukunaʻia te tāpoki mata na runga i toʻou putāngiʻu e te vaʻa, i reira ka tāpekaʻia ai te tāpekaʻanga me kore ra, te uaua no te taringa. E tau te tāpoki mata kia:
- pini meitaki toʻou putāngiʻu, vaʻa e te tanga
- ō meitaki, māri ra kia piri, ki runga i te pae o toʻou mata
- kia māmā ua toʻou ʻakaeaʻanga.
ʻŌrei ʻakaʻōuʻia toʻou rima. Tāʻangaʻangaʻia te:
- puʻa e te vai
- vairakau ʻōrei rima (kia taeria ki te 60% kava).

Iakoe e ʻaʻao ra i te tāpoki mata

Me ʻaʻaoʻia te tāpoki mata, e tau kia:

kapeʻia te miriʻanga i a mua i toʻou tāpoki mata
kapeʻia te miriʻanga i toʻou mata
kapeʻia te nekenekeʻanga i toʻou tāpoki mata, perā katoa te ʻuʻutiʻanga ki raro ake i toʻou tanga
monoʻia te tāpoki mata me māʻūʻū, kino, me kore ra repo.

Ka ʻakapēʻea me kiriti i te tapoki mata

ʻŌreiʻia toʻou rima. ʻŌrei ma te tāmarō i toʻou rima. Tāʻangaʻangaʻia:
- te puʻa e te vai
- te vairakau ʻōrei rima (kia taeria ki te 60% kava).
Kiritiʻia toʻou tāpoki mata. Kiritiʻia toʻou tāpoki mata na muri mai ma te ʻuʻuti mai mei toʻou mata. Tāʻangaʻangaʻia te uaua, me kore ra, tataraʻia. Auraka e ʻāmiri i ā mua i te tāpoki mata, e te matakite auraka e ʻāmiri i toʻou mata, putāngiʻu, me kore ra, vaʻa.
Puʻaʻia, me kore ra tiriaʻia toʻou tāpoki mata.
- Puʻaʻia te au tāpoki mata na roto i te puʻaʻanga ki roto i te matīni puʻa kakaʻu e kia vera te vai ki te 60 degrees Celsius. Tāmarōʻia te tāpoki mata kia marō meitaki i mua ake ka ʻaʻao ʻakaʻōuʻia ai. Auraka e ʻaʻao i te tāpoki mata māʻūʻū.
- Tiriaʻia te au tāpoki mata e tai rāi oraʻanga. Tāruʻia ki roto i te mea ʻaʻao tītā e tāpoki tōna, me kore ra, ki roto i tetai putē tāpekaʻia ma te titiri atu. Auraka e ʻaʻao ʻakaʻōu, me kore ra, tīmata i te vairakau i te tāpoki mata e tai rāi oraʻanga.
ʻŌrei ʻakaʻōuʻia toʻou rima. Tāʻangaʻangaʻia te:
- puʻa e te vai
- vairakau ʻōrei rima (kia taeria ki te 60% kava).

Last updated: 1 December 2020