Te noho i te pae 2 | Living at Level 2
I te Pae Mataara 2 me:
- 2 mita te tawhiti atu i ētahi atu mēnā kei waho i te kāinga, 1 mita rānei i ngā wāhi mahi.
- Mau ārai kanohi mēnā:
- he pakeke ake koe i te 12 tau, i ngā wāhi rō whare tūmatanui pēnei i ngā whare pukapuka, whare taonga me ngā mōro.
- he kaimahi koe e anga atu ana ki te kiritaki i ētahi whare manaaki, whare tūmatanui rānei.
- he uaua te tū tīrara (ehara i te ture engari e tino whakahaua ana).
- Whai haere i ngā wāhi kua tae koe, ngā tāngata kua kite koe hoki. Whakamahi i te taupānga NZ COVID Tracer, te puka NZ COVID tracer, ngā tuhipoka rānei.
- Noho kāinga mēnā e māuiui ana. Kaua e haere ki te mahi, te kura rānei. Kaua e whakawhanaunga.
- Waea atu ki a Healthline ki te whakarite whakamātautau mēnā e whakaatu ana koe i ngā tohumate o te KOWHEORI-19. Ina whiwhi koe i te whakamātautau KOWHEORI-19, me noho mohoao i te kāinga, kia puta rā anō ngā hua.
- Wawe te noho mohoao mēnā koirā te whakahau.
- Auau te horoi, te whakamaroke hoki i ō ringa.
Rapu kōrero atu anō mō:
Ngā huihuinga
I ngā huihuinga, taiopenga me ngā whare taiopenga, ka taea te mōrahi o te:
- 100 tāngata i rō whare kua tautohua, ā,
- 100 tāngata i ngā wāhi kua tautohua kei waho.
Ka pā ēnei herenga ki ngā taiopenga katoa pēnei i te mārena, tangihanga, ngā whakarite, hākinakina hapori me ngā mahi kori, hui ā-whānau me ngā hui tūmataiti.
Ko te wāhi tautohu he wāhi kotahi, i rō whare, i waho rānei, e wehea mai ana i ētahi atu wāhi.
Mēnā neke atu i te kotahi wāhi tautohu, kua kore e taea e te tangata te whakawhitiwhiti wāhi. Ka uru ki tēnei te tomo, te wehe, te haere rānei ki te wharepaku.
Kāore ngā kaimahi e whakarato ratonga ana i te taiopenga e uru ki ngā tepenga huihuinga rō whare, i waho rānei.
Mēnā he tāngata ōu kei ngā wāhi rō whare, waho hoki, me mātua whakarite kia kaua ngā rōpū e rua e pāhekoheko. Ko te tikanga o tēnei, me noho wehe ngā tomokanga ki ngā wāhi tiri - hei tauira, ngā wharepkau, ngā taupaepae rānei e haere atu ai te tangata ki te tono, te utu rānei.
Rapua ētahi atu kōrero mō ngā huihuinga i te Pae Mataara 2
Te hāereere me ngā nekehanga
Mēnā e māuiui ana koe, me noho i te kāinga. Mēnā e ora ana, ka taea e koe te hāereere i te Pae Mataara 2, tae atu ki ētahi atu rohe kei te Pae Mataara 2. Me whakarite koe kia haumaru tō mahi i taua mahi.
Kāore rawa e whakaaetia ana te whakawhiti i te paewhenua Pae Mataara mō ngā haerenga whaiaro. Hei āwhina tēnei ki te aukati i te horahanga o te huaketo. Ka taea anake te whakawhiti i te paewhenua Pae Mataara mēnā e whakaaetia ana tērā haerenga.
E whakaaetia ana ētahi haere pakihi. E whakaaetia ana ētahi haerenga whaiaro, hei tauira, mō ngā take hauora, ngā ohotata, te tuku manaaki, tautoko rānei ki tētahi atu e noho whāomoomo ana e whai mate tuamatanga ana rānei, e tiri ana i te tiakanga tamariki rānei.
Mēnā e whakawhiti ana i te ripa mō ngā take kua whakaaetia, me kawe koe i te taunakitanga tika.
Mēnā kāore e whakaaetia ana tō take whakawhiti ripa, ka taea e koe te tono whakawāteatanga. Me tutuki i tō tono ētahi paearu e hāngai ana.
Rapua he kōrero anō mō te hāereere, te nekehanga me ngā whakawāteatanga
Te kori tinana me te rēhia
I te Pae Mataara 2, ka taea ō hākinakina, mahi kori auau hoki, mēnā he haumaru te mahi. Engari mēnā e māuiui ana koe, me noho i te kāinga.
Ka taea e koe ngā mahi pēnei i te:
- hīkoi, eke pahikara me te whakangau i runga whenua rāhui tūmatanui
- kaukau i tētahi puna kaukau tūmatanui, engari tērā ngā here
- haere ki te whare kori, engari tērā ngā here
- haere i runga poti, ngā hākinakina i runga i te wai
Me tutuki hoki i te hākinakina me ngā mahi rēhia ngā aratohu mō ngā huihuinga me te pupuri rekoata.
He uaua te mahi kori me ngā hākinakina i te wā e mau ārai kanohi ana, nō reira kāore te ture ārai kanohi e whai pānga ki ngā mahi kori.
I ngā taiao whare kori, me 2 mita te tawhiti i ētahi atu, ko te tikanga o tērā ka iti noa iho pea te hunga e āhei ana ki ngā wāhi kori kei rō whare.
I te wā e kori tinana ana i ngā wāhi tūmatanui, kia 2 mita te tawhiti i ētahi atu tāngata kāore koe i te mōhio i ngā wā e taea ana.
Ngā maruhā me ngā ārai kanohi
Me mau ārai kanohi i ētahi tū wāhi, tae atu ki ngā waka tūmatanui, te toro i ngā whare hauora, i ngā hokomaha me ētahi atu wāhi tūmatanui.
E akiaki ana hoki mātou i a koe ki te mau ārai kanohi, me te noho kia 2m te tawhiti i ētahi atu i tō wehenga i te kāinga. Inarā mēnā he uaua ki te noho tawhiti i ētahi atu. Hei tauira, i te kohinga o ngā ō rangaranga.
Rapua ngā wā me mau ārai waha koe
Te tautoko mō te kai me te noho
Mēnā raru ana koe ki te taha pūtea, kai, tō oranga hinengaro, tinana rānei, tērā pea he tautoko e wātea ana.
Pāwhiri ki konei mō ētahi mōhiohio mō ngā tautoko mā te tangata kotahi
Pāwhiri ki konei mō ētahi mōhiohio mō ngā tautoko mā ngā pakihi
Te mātauranga
E tūwhera ana ngā whare ako kōhungahunga katoa, me ngā kura ki ngā reanga katoa.
He haumaru tonu te haere a ngā tamariki ki te kura.
Me noho ngā tamariki me ngā taiohi ki te kāinga mēnā:
- e māuiui ana
- he tohumate KOWHEORI-19 ō rātou
- e noho mohoao ana
- e tatari ana ki ngā hua o tētahi whakamātautau KOWHEORI-19.
E tino whakahaua ana kia mau ārai kanohi te hunga pakeke ake i te 12 tau i te kura.
Ngā wāhi mahi me ngā pakihi
Ka taea e ngā wāhi pakihi te noho tuwhera ki ngā kaimahi me ngā kiritaki mēnā e tutuki ana ngā here hauora tūmatanui katoa.
Ko ngā here hauora tūmatanui ko te:
- whakaatu i tētahi pānui waehere QR taupānga NZ COVID Tracer, me te whai i ētahi atu pūnaha whaiwhai pātanga rerekē; ā,
- me te whai i ngā tikanga akuaku pēnei i te horoi ringa me te horoi auau i ngā mata, ā,
- me te whai i ngā aratohu tū tirara.
Ka taea tonu e ngā ratonga ka whakaratoa i ngā wāhi kiritaki (pēnei i ō rātou kāinga ake), me ngā ratonga pānga tata (hei tauira, ngā kaihaumanu rerehua me ngā kaikuti makawe) te whakahaere mēnā ka tutuki i a rātou ngā tikanga hauora tūmatanui. Me mau ārai kanohi katoa te hunga e mahi ana i tētahi ratonga pānga tata.
Ki te kore e taea e te wāhi mahi te whakatutuki i ēnei tikanga, e kore e taea e ia te whakahaere.
E whakahaua ana ngā pakihi katoa ki te whakamahi i ētahi atu huarahi mahi mēnā ka taea, ā, me kōrero ki ngā kaimahi ki te tautuhi i ngā mōrearea, ā, me pēhea te whakahaere.
Me tutuki hoki i ngā pakihi te katoa o ngā here hauora me te haumaru, te tiaki i ngā kaimahi, ā, me te whakatutuki i ngā paerewa tuku mahi mōkito rawa.
Te pupuri whakature i ngā mauhanga ā-ture mō ngā pakihi me ngā ratonga
E ai ki te ture, me whai tukanga ngā pakihi me ngā kaiwhakarite taiopenga e taea ai te rekoata i tō toronga. Me whai huarahi nui atu i te kotahi mō te pūrongo i te toronga o te tangata, inarā mō te hunga kāore e taea e rātou te matawai i ngā waehere QR.
Ka uru ki tēnei ngā whare kawhe, ngā whare kai, ngā wāhi inu waipiro, ngā whare petipeti, ngā kōnehete, ngā whare kaumātua, ngā whare hauora (hāunga ngā tūroro), ngā kaikuti makawe, ngā whare kori, whare kanikani, whare pukapuka, kōti, tari kaunihera, kāwanatanga hoki, me ngā kaituku ratonga pāpori e whai wāhi taupaepae ana.
Koinei ētahi momo rekoata i tō toronga:
- te pātai i te tangata kia matawai mā te taupānga NZ COVID Tracer
- te rekoata ā-ringa i ngā taipitopito a ō kiritaki, manuhiri hoki.
- te whakarato puka tuhi hei whakakī mā ngā kiritaki me ngā manuhiri ki ō rātou taipitopito, ā, ka rau ki tētahi pouaka kohi
- te whakamahi i ō pūnaha puri rekoata, pēnei i te āheinga kāri miri, te whakarite tāpui rānei.
Me haere tonu te mahi a ngā pakihi ki te whakaatu i te tohu waehere QR, ahakoa kāore e hiahiatia ana ki te kohi i ngā rekoata kiritaki.
He mōhiohio whaiaro ngā rekaota whakapā. Me haumaru te kohi, te whakamahi, te puri, te whāki, ā, me te porowhiu i runga anō i ngā tikanga o te Privacy Act 2020.
He nui ake pea ngā hiahia haumaru o ngā pūnaha rekoata rerekē.
Ngā ratonga ohotata i ngā Pae Mataara katoa
Ka mahi tonu ngā ratonga ohotata i ngā Pae Mataara katoa
Ina pā he ohotata, whāia ngā aratohu ohotata whānui, tohutohu rānei mai i ngā mana ohotata. Ko tō haumarutanga te mea nui.
Kia haumaru koe, whāia ngā whakatūpato ki te ārai i te horanga o te KOWHEORI-19, pēnei i te tū tīrara, te mau ārai kanohi rānei.
Mēnā he mōreareatanga ki tō oranga, kāinga rānei, me waea ki 111 ka tono i te Pirihimana, Whakaratonga Iwi, Waka Tūroro rānei.
Last updated: