I muri i te whiwhi kano ārai mate Pfizer a tō tamaiti | After your child’s Pfizer vaccination

Pērā i ngā rongoā katoa, ka puta pea i te kano ārai mate Pfizer he pānga kino ki ētahi tamariki. Koinei tonu te urupare a te tinana, ā, e whakaatu ana kei te mahi te kano ārai mate.

He mea tikanga hira te whiwhi kano ārai mate kia noho haumaru ngā tamariki, he rite ki te pani ārai hihira, te whakamau tātua waka rānei. He tiaki i ō tamariki mai i ngā mate nui me te ārai i te hōrapa o te mate ki roto i tō whānau me te hapori.

E rua ngā potanga kano ārai mate Pfizer me whiwhi te tamaiti hei tino ārai i te mate KOWHEORI-19. Ka tukuna ngā potanga e rua kia 8 wiki i waenganui. Ka taea te whakapoto te wā ki te 21 rā i te iti rawa mēnā e hiahiatia ana, hei tauira, mēnā kei te tīmata maimoatanga rongoā pēhi ārai mate nui tō tamaiti.

Kua whakamātautauria haumanutia te kano ārai mate Pfizer mō ngā tamariki 5 ki te 11 tau me ngā tamariki nō tēnei rōpū taipakeke, ā, me kī, ko ngā pānga kino i pūrongohia he māmā, kāore i roa, ā, he rite ki ngā pānga kino nō ētahi atu kano ārai mate noa

Ngā pānga kino pea

Pērā i ngā rongoā katoa, ka pā mai pea ētahi pānga kino māmā ki tō tamaiti i te 1—2 rā i muri i te whiwhi i tana kano ārai mate Pfizer. He mea noa tēnei, ā, e whakaatu ana kei te ako tōna tinana ki te whawhai i te huaketo.

Kāore e tino roa te pānga mai o te nuinga o ngā pānga kino, ā, kāore he pānga o te nuinga ki ō mahi o ia rā. Mēnā kāore e pā mai he pānga kino ki tō tamaiti kei te pai tērā, kei te mahi tonu te kano ārai mate.

Ko ngā pānga nui e whākina mai ana ko te:

  • mamae, pupuhi/whero rānei i te wāhi i weroa
  • ngenge, te ruha rānei
  • ānini o te māhunga
  • mamae uaua, mamae hono hoki/rānei
  • mātao/kirikā
  • whakapairuaki

Mēnā ka pā mai te auhi ki tō tamaiti ka taea e koe te:

  • whakamau papanga mātai, mākū hoki, tētahi pēke tio rānei ki te wāhi wero mō te wā iti
  • whakarite ka whakatā ia, ā, kia nui te inu wai
  • whāngai paracetamol i te tuatahi, te ibuprofen rānei mēnā ka pā tonu mai ngā tohumate
  • rapu tohutohu mai i tō mātanga hauora mēnā kāore koe i te tino mōhio, mēnā rānei ka kino ake ngā tohumate o tō tamaiti, waea atu ki Healthline i 0800 358 5453

Ngā pānga pāwera

Ka taea ngā pānga pāwera kino te pā mai engari he tino rerekē ēnei. Ka whakangungua ngā kaiwero o Aotearoa ki te whakahaere i ēnei. Me kōrero atu ki tō kaiwero mēnā ka māuiui tō tamaiti, kei te māharahara rānei koe, i te mea he tere te pā mai o ngā pānga pāwera kino i muri i te kano ārai mate. Koinei te take me tirotiro tō tamaiti mō te 15 meneti i muri i te whiwhi kano ārai mate.

Haere kia tirohia e te rata

He kino ake pea ētahi pānga kino, engari he mokorea, pēnei i te mate pāwera tino kino, te kakā o te manawa rānei (Myocarditis me te pericarditis).

He tino rerekē te pā mai o te myocarditis me te pericarditis engari he pānga kino ēnei nō te kano ārai mate Pfizer. I ngā whakamātautau haumanu, kāore i kitea ēnei i roto i ngā tamariki 5 ki te 11 tau, engari he mea nui kia mōhio ki ngā tohumate mō ngā taipakeke katoa ka whiwhi kano ārai mate.

Mēnā ka pā mai ētahi o ēnei tohumate hou ki tō tamaiti, me rapu āwhina hauora koe, otirā mēnā kāore e kore atu ēnei tohumate:

  • ka kikī, taumaha, auhi, mamae rānei tō uma, kakī rānei
  • ka uaua te hēhē, te mapu hau rānei
  • he takarangi, āmaimai, nihinihi rānei
  • he kakapa, he tere, he pātuki rānei te manawa, kei te 'tīpokapoka' rānei te āhua. 

Te pūrongo i ngā pānga

He mea nui kia pūrongohia e koe ngā pānga ki ō tamariki whai muri i te whiwhi kano ārai mate KOWHEORI-19 kia pai ai tā mātau whaiwhai i te haumarutanga o te kano ārai mate.

Ka taea e koe te pūrongo ngā pānga kino ki tō tamaiti i report.vaccine.covid19.govt.nz (external link), me kōrero rānei ki tō kaiwhakarato hauora mēnā ka hiahia koe ki te kōrero mō te pūrongo i ngā pānga kino. Ehara i te mea me mātua mōhio koe i ahu mai te pānga i te kano ārai mate hei tuku pūrongo.

Ka whiwhi anō pea koe i tētahi karere patowaea i muri i te whiwhi kano ārai KOWHEORI-19 a tō tamaiti e tono ana kia whakaotihia e koe he rangahau poto mō ngā pānga. Mā te whakauru mai ka āwhina koe i a mātau kia whiwhi mōhio mō te kano ārai mate i Aotearoa. Kei a koe te tikanga mēnā ka whakauru mai ki te rangahau, ā, ka āhei koe ki te wehe atu ahakoa te wā. He koreutu te whakautu i te patowaea. Ka kitea he mōhiohio atu anō i Medsafe.govt.nz/COVID-safety-reporting/ (external link)

Mēnā kāore koe i te tino mōhio mō ngā tohumate o tō tamaiti, waea atu ki Healthline i 0800 358 5453.

Mēnā he māharahara tonu ōu mō te haumaru o tō tamaiti, me waea atu ki 111, ā, me mātua whakamōhio atu i whiwhi tō tamaiti i tētahi kano ārai mate KOWHEORI-19 kia tika ai tā rātau aromatawai i tōna tūāhua.

Ka tiaki te kano ārai mate i a tātau

Ka āwhina ngā kano ārai mate ki te tiaki i ngā tāngata nō ngā taipakeke katoa mai i ētahi o ngā mate maunoa maha, pērā i te mate karawaka, me te whurū. Me tiro mēnā kua whiwhi tō whānau i ngā kano ārai mate katoa mā te kōrero ki tō kaiwhakarato hauora.

Kāore he māharahara mō te wā ka whiwhi i ētahi atu kano ārai mate ehara i te KOWHEORI-19, pērā i te mate karawaka, mate repe pupuhi, rūpera; kāore koe e mate ki te hiki i ēnei kano ārai mate mō tētahi atu wā.

Haere ki health.govt.nz/immunisation (external link) mō ētahi atu mōhiohio.

Last updated: at