Puipuiga o lau fanau mai le COVID-19 | Protecting your tamariki from COVID-19

O le COVID-19 Immunisation Programme mo tamaiti mai le 5 i le 11 tausaga le matutua

O le avanoa lenei e mafai ai e mātua ma tagata o faia le tausiga ona puipuia le fanau mai le 5 i le 11 tausaga le matutua mai le COVID-19, e auala atu i le faia o tuipuipui faapitoa mo tamaiti o le tuipuipui o le Pfizer.

O le tuipuipui o faaaogā mo tamaiti o se ituaiga o le tuipuipui o le Pfizer e fetaui mo tamaiti, e lē malosi tele le vailaau ma e lē telē tele se vailaau o iai i le tui.

E moomia le fai o tui e lua o le tuipuipui mo tamaiti e puipuia atoa ai. Matou te fautuaina le 8 o vaiaso e va ai tui e lua. E mafai ona faapuupuu le umi i le maualalo e 21 aso pe a moomia, mo se faataitaiga pe afai ua amata togafitiga a lou alo e lē o malosi le tino e tetee ai i faama‘i.

E fautuaina e le Matagaluega o Soifua Maloloina le faia o tuipuipui mo lou alo mo le tausia o lo latou saogalemu ma fesoasoani e puipuia ai lou aiga ma tagata mai le COVID-19.

Aogā o tuipuipui

O se auala tāua tuipuipui e tausisia ai le saogalemu o tamaiti, e pei o mea e puipuia ai mai le la po o le fai o le fusipa‘u o le taavale. E puipuia lau fanau mai le tele o isi faama‘i ogaoga ma taofia le salalau o faama‘i i totonu lava o lou aiga ma tagata.

O lo o mafai ona maua fua tuipuipui i Aotearoa e tetee atu ai faama‘i e 12, e aofia ai le tale vivini (pertussis), misela ma le pipili.

Aogā o tuipuipui e tetee atu ai i le COVID-19

E fesoasoani le faia o tuipuipui o tamaiti mai i le 5 i le 11 tausaga le matutua e puipuia ai tagata o le aiga o faaletonu le soifua maloloina ma e faigofie lava ona afaina tele ai i le COVID-19.

E lē o taimi uma e mafai ai ona iloa gaioiga o le siama o le COVID-19. E ui e masani ona lē matuā ogaoga tele aafiaga e maua ai tamaiti pe a aafia i le COVID-19, o āuga nei e tai pei lava o āuga o le fulū, ae iai lava nisi tamaiti e matua‘i tigaina ai lava ma moomia ai ona faataotolia i le falemai. E mafai foi ona maua i isi aafiaga e seāseā ona maua ai e pei o le Multisystem Inflammatory Syndrome (MIS-C) ma e moomia ai ona tausi i le vaega o faataotolia ai gasegase ua tigaina. E mafai foi ona umi se taimi e afaina ai tamaiti i aafiaga (e ta‘ua o le long COVID), tusa lava pe ua toe manuia mai aafiaga feoloolo o le COVID-19 sa aafia ai.

E pei lava o tagata matutua, afai e pesia lau fanau i le siama o le COVID-19 e ono mafai ona latou faapepesia le siama i isi tagata.

Saogalemu o le tuipuipui o le Pfizer

Ua mae‘a ona suesueina i faataitaiga faasaienisi le tuipuipui o le Pfizer mo tamaiti mai le 5 i le 11 tausaga le matutua. I tulaga lautele na lipotia o aafiaga e maua ai tamaiti, na ta‘ua ai e feoloolo, e lē umi se taimi e faalogoina ai aafiaga, ma e tutusa lava aafiaga ma isi tuipuipui e masani ona fai.

E fautuaina le tuipuipui mo tamaiti e iai meaai e ilitata ai le tino. E lē pei o isi tuipuipui, e leai se meaai, polotini ua faavāia po o se sua o laau o maua i le tuipuipui o le Pfizer.

Pau lava le mafuaaga e lē mafai ai e se tasi ona faia le tuipuipui ona o se mea e ilitata ai le tino pe afai na ogaoga le ilitata o le tino (anaphylaxis) i se tui na fai muamua o le tuipuipui o le Pfizer po o se tasi o mea o gaosia ai le tuipuipui. O le tuipuipui o le Pfizer mo tamaiti ua mae‘a ona faagasolo lelei i faiga mautu ma le malosi e pei ona faia i isi tuipuipui masani mo tamaiti. E leai ma se faataitaiga faafomai na misi pe na faatatope ona fai i le suesueina ai o le saogalemu o le tuipuipui.

Tapena le faia ai o tuipuipui mo lau fanau

  1. Faamalosi i ai e aua le popole.
  2. Ia mautinoa na fai muamua sina meaai ma le vai.
  3. Fai lelei lavalava e faigofie ona iloa atu ai le itu o le ogalima e faia ai le tui.

E leai se afaina o le ave o se mea e faate‘a ai le popole o le tamaitiiti i le taimi e faia ai tuipuipui, e pei o se meataalo vaivai po o se telefoni.

Afai na iai ni aafiaga na maua ai lou alo mai se tuipuipui ua uma ona fai, faailoa le tulaga lea i le tagata o faia le tuipuipui, talanoa i lau fomai faaleaiga a o lei oo i le aso e faia ai le tuipuipui, po o le talanoa i se faufautua a‘oa‘oina i le COVID Vaccination Healthline – 0800 28 29 26.

Maliega

E moomia ona auai faatasi se tasi o mātua, tagata o faia tausiga po o se tasi ua faatulafonoina na te vaaia le tamaitiiti i le taimi e faia ai tuipuipui i lona tulaga o le tagata matua na te vaaia ma tuuina atu le maliega e faia ai tuipuipui a le fanau.

E mafai e le tagata matua ma le tamaititi o auai i le taimi e faia ai tuipuipui ona fesili i mea uma o fia malamalama i ai.

Aafiaga

E pei lava o isi tuipuipui, e ono lagona e lou alo le tiga o le itu o le lima ma mūmū, tiga po o le fula o le itu o le tino na faia ai le tui. O isi aafiaga e ono tulai mai, ma e masani ona vaaia i totonu o le tasi po o le lua aso, e aofia ai:

  • tiga le ulu
  • o se fiva (faalogoina le vevela)
  • faafaufau (faalogoina e pei ua ma‘i), faasuati, manava tatā 
  • faaivaivā
  • faalogona masani o le lē lelei o le faalogo (faalogoina le faama‘ima‘i, tiga).

O tulaga e masani ai ma e faailoa mai ai o lo o aogā le tuipuipui. E fesoasoani le faamālōlō lelei ma ia lava le vai o inu.

E seāseā ona iai ni aafiaga ogaoga o le tuipuipui o le Pfizer COVID-19 ma e masani ona aliae i totonu o nai minute talu ona uma ona fai tuipuipui. O le mafuaaga lea, e faanofo lelei ai oe ma lou alo i le nofoaga e vaavaaia lelei ai oulua e le aufaigaluega a le soifua maloloina e faamautinoa o tuuina atu togafitiga faasoifua maloloina pe afai o se tulaga lea e ono aliae mai.

O faailoga vaaia o aafiaga ogaoga e ilitata ai le tino e aofia ai:

  • faigata ona mānava
  • fula foliga ma le faaī
  • vave o le tātā o le fatu
  • o se mūmū leaga ua sasao i le tino atoa
  • niniva ma le vaivai.

Afai ua e vaaia nisi o āuga nei i lou alo, faailoa vave loa tulaga nei i le aufaigaluega a le soifua maloloina. Afai e te lē o iai i se nofoaga e faia ai tuipuipui, vili le 111.

E seāseā ona tulai mai le myocarditis ma le pericarditis ma o aafiaga ogaoga nei o le tuipuipui o le Pfizer. I faataitaiga faafomai na faia, e leai ma se tasi o aafiaga nei na vaaia i tamaiti mai le 5 i le 11 tausaga le matutua, peitai o āuga tāua nei e tatau ona malamalama lelei i ai mo so o se tasi lava ua faia tuipuipui. Saili vave se fesoasoani faasoifua maloloina, pe afai ua aliae nisi o āuga nei i nai aso po o vaiaso talu ona uma ona fai o tuipuipui.

Āuga o le myocarditis ma le pericarditis:

  • lē lelei i lau faalogo, mamafa, fufusi pe tiga le fatafata
  • faigata ona mānava
  • faalogoina le vave o le tātā, galulu po o le tātāvale o le fatu
  • faalogoina le tau matapogia, niniva.

Faatonu le avanoa pe susū sa‘o lava i le nofoaga e faia ai

E faia fua tuipuipui o le COVID-19 mo tagata uma. Mai le aso 17 Ianuari, e mafai e mātua po o tagata o faia tausiga ona faia tuipuipui mo tamaiti i nofoaga e faia ai tuipuipui ma e lē moomia ona faatonu ai se avanoa po o le faaaogā o le BookMyVaccine.nz (external link) mo le faia o tuipuipui i faalapotopotoga e masani ona faia ai siaki faasoifua maloloina, po o tausiga faasoifua maloloina lautele. Ia mautinoa o sa‘o tausaga na e filifilia.

Afai e sili atu ma le toatasi le tamaitiiti e te manao e faatonu ai le faia o se avanoa po o le lē mafai ona faatonu i luga o le initaneti, e mafai ona vili le COVID Vaccination Healthline i le 0800 28 29 26 (8am–8pm, 7 aso o le vaiaso) matou te faatulaga ai le taimi ma le aso mo oe ma tali so o se fesili.

E maua le fesoasoani mai faamatalaupu.

Tamaiti e iai manaoga faapitoa

E avanoa le Disability Team mai le Aso Gafua i le Aso Faraile, mai le 8am i le 8pm. E mafai ona tuuina atu le lagolagosua mo lou aiga ma faatonu le taimi ma le aso e faia ai tuipuipui. E mafai ona latou faamalamalama tulaga o fesiligia i mea o moomia mo lou alo e aofia ai le faigofie ona maua o le nofoaga e faia ai tuipuipui, auala mo femalagaiga e leai se tupe e totogi ai, po o ni tulaga e ono afaina ai lou alo mai le tuipuipui.

Mo nisi faamatalaga

Mo nisi faamatalaga ma links e maua ai suesuega, tagai i le:

E iai sau fesili e uiga i le tuipuipui?

Talanoa i se faufautua ua a‘oa‘oina i le COVID Vaccination Healthline – 0800 28 29 26 8am–8pm, 7 aso o le vaiaso.

Puipuiga o lau fanau mai le COVID-19 | Protecting your tamariki from COVID-19 [PDF, 1.4 MB]

Last updated: at