Tuipuipui o le Pfizer | The Pfizer vaccine

Saili i faamatalaga o le tuipuipui o le Pfizer ma auala e mafai ai ona e faia se tuipuipui.

Faamatalaina o le tuipuipui o le Pfizer

O le tuipuipui autu o le COVID-19 o lo o tatou faaaogāina i Niu Sila o le Pfizer-BioNTech. E iloga i le igoa o lo o faalauiloa ai o le, Comirnaty.

E gaosia mai le tuipuipui mRNA (messenger ribonucleic acid). E lē o aofia ai ma se siama o ola, mate pe ua lē toe gaioi E lē afaina pe fesootai i lou DNA po o ou genes.

E leai se tupe e totogi e fai ai ma e maua mo tagata uma i Niu Sila ua atoa le 5 tausaga ma luga atu le matutua.

O le tuipuipui o faaaogā mo i latou mai le va o le 5 i le 11 tausaga le matutua o se ituaiga o tuipuipui o le Pfizer e fetaui mo tamaiti, e lē malosi tele le vailaau ma e lē telē se vailaau o iai i le tui.

E maua isi faamatalaga e uiga i tuipuipui mo le 5-11 tausaga le matutua

Taimi e va ai tuiga

  • 18 tausaga le matutua ma luga atu: e moomia ona e faia tui e lua o le tuipuipui ma e lē itiiti ifo ma le 3 vaiaso e va ai. O le a moomia foi ona fai lau tui o le booster pe afai ua atoa le 3 masina talu mai le uluai taimi na faia ai lou tuipuipui.
  • 16 ma le 17 tausaga le matutua: e te moomia tui e lua o le tuipuipui ma e pe ā ma le 3 vaiaso e va ai tuiga. O le a moomia foi ona fai lau tui o le booster pe afai ua atoa le 6 masina talu mai le uluai taimi na faia ai lou tuipuipui.
  • 12 i le 15 tausaga le matutua: e te moomia tui e lua o le tuipuipui ma e pe ā ma le 3 vaiaso e va ai tuiga. E lē o maua i le taimi nei tui o le booster mo tagata i lalo o le 16 tausaga le matutua.
  • 5 i le 11 tausaga le matutua: e fautuaina le 8-vaiaso e va ai tuiga e lua. E lē o maua i le taimi nei tui o le booster mo tagata i lalo o le 16 tausaga le matutua.

Saili i faamatalaga o tuiga o le boosters

Auala e fai ai lou tuipuipui o le Pfizer

E mafai ona faatonu lou avanoa e fai ai lau tuipuipui o le Pfizer i le Book My Vaccine (external link) pe vili le COVID Vaccination Healthline i le 0800 28 29 26.

E faia e se tasi ua a‘oa‘oina atoatoa lelei i le faiga o tuipuipui lou tui i le pito i luga o lou ogalima. E faia le tui lona lua i le vaiaso lona 3 talu ona uma ona faia le tui muamua. Afai e te faia le tuipuipui Pfizer mo lou tui muamua, e tatau foi ona e faia le tuipuipui lava lea mo lou tui lona lua.

E moomia lou faatali mo le 15 minute i le mae‘a ai ona fai o lou tuipuipui ina ia mautinoa o lelei mea uma.

Afai ua 18 tausaga o lou matua ma luga atu, e mafai ona e faia se booster pe a mavae le 3 masina talu ona fai le tui autu.

Afai ua 16 pe 17 tausaga o lou matua, ua e agavaa mo le faia o lau booster pe a mavae le 6 masina talu ona fai le tui autu o le tuipuipui o le COVID-19.

Saili i faamatalaga o tuiga o le boosters

Faapefea ona aogā le tuipuipui o le Pfizer

E tuuina atu e le tuipuipui o le Pfizer ni faatonuga e iloa ai e lou tino ona tetee atu i le siama o le COVID-19. O le a mafai e lou tino ona iloa le siama o le COVID-19 ma faaaogā polotini o le toto e tetee ai le siama. E taofia e polotini o le toto siama mai le faaleagaina o sela o le tino ma e aogā e faaumatia ai le siama.

O lena ua maua i lou tino metotia e mafai ai ona puipuia oe lava, pe afai e te aafia i le COVID-19 i le lumanai ma e itiiti tulaga e te ono ma‘i ai.

Tulaga matou te iloa ai le aogā o le tuipuipui o le Pfizer

O tuipuipui o le COVID-19 o tui pito sili ona mae‘ae‘a lelei ona suesueina.

Matou te iloa e aogā le tuipuipui o le Pfizer auā e faitau masina le umi na faia ai faataitaiga o suesuega faasaienisi faapitoa i tagata e silia ma le 40,000 a o lei faamaonia le faaaogāina. Na faatusatusa i iloiloga faasaienisi iuga na maua mai tagata na faia tuipuipui pe a faatusa i tagata na tuuina atu i ai se tui faataitai (vai faamasima). E tusa ai ma iloiloga faasaienisi, e 95% le malosi o le puipuiga e maua mai le tuipuipui o le Pfizer e tetee atu ai i āuga o le COVID-19.

Tulaga o matou siakiina ai le saogalemu o tuipuipui o lo o faaaogā

O le Medsafe o le pulega i totonu o Niu Sila e puleaina le saogalemu o fualaau. E siaki e le pulega talosaga mo fualaau fou uma, e aofia ai tuipuipui, ina ia mautinoa o lo o tausisia tulaga faavaomalo ma manaoga tau lotoifale. E fautuaina le faaaogāina o se fualaau i totonu o Niu Sila pe afai ua ausia tulaga nei.

Ua tuuina atu e le Medsafe le faamaoniga mo se taimi lē tumau i le tuipuipui o le Pfizer (faatasi ai ma aiaiga) mo le faaaogā ai i Niu Sila. O lona uiga ua faamaonia aloaia, ae e tatau e le Pfizer ona tuuina atu i le Medsafe faamaumauga ma lipoti o maua i taimi uma e faailoa ai o lo o ausia tulaga faavaomalo.

O le a faaauau pea ona mata‘ituina e le Medsafe tulaga tau saogalemu ma le aogā o le tuipuipui o lo o faaaogā. E toe iloilo e le pulega faamaumauga mai iloiloga faasaienisi o faia pea i le lalolagi atoa, ma lipoti ua saunia e tomai faasoifua maloloina ma tagata na faia tuipuipui.

Aafiaga

E pei lava o isi fualaau uma, e te ono faalogoina ni aafiaga e lē ogaoga tele mo nai aso i le mae‘a ai ona fai o lou tuipuipui. O tulaga nei e masani ai, ma o se faailoga o lo o taumafai lou tino e tetee atu i le siama.

O le tele o aafiaga nei e lē umi se taimi e aliae ai ma e lē taofia ai lou faia o se tui lona lua po o au feau masani o le aso. O nisi o aafiaga e ono afaina ai mo sina taimi lē tumau o lou faafoeina lea o le taavale pe faaaogā se masini.

O le tele o aafiaga ua lipotia e aofia ai:

  • tiga pe fula le itu o le tino na tui
  • lagona le lēlavā ma le faaivaivā
  • tiga le ulu
  • tiga maso
  • faamaalili
  • tiga sooga o ponaivi
  • fiva
  • pata le itu o le tino na tui

O nisi aafiaga e masani ona faatoa aliae i le mae‘a ai o le tui lona lua.

Aafiaga ogaoga

E iai nisi o aafiaga e sili atu ona ogaoga ae e seāseā ona tupu.

O le myocarditis o se mū i puipui o le fatu ma o se aafiaga e seāseā ona tulai mai i le tuipuipui o le Pfizer.

E mafai ona aofia ai āuga nei:

  • se tiga faatoa tupu i le fatafata
  • tau lē lava le mānava
  • suia le tātā/tātā vale le fatu.

Lipotiaina o aafiaga

E mafai ona e lipotia se tasi o aafiaga nei i le CARM, The Centre for Adverse Reactions Monitoring. O le CARM o le nofoaga tutotonu mo faamatalaga e uiga i faaletonu (aafiaga) ua mafua mai i fualaau ma tuipuipui i totonu o Niu Sila.

Lipotia se aafiaga ogaoga ua iai (external link)

Faamaoniga ua uma ona fai ou tuipuipui

O le My Covid Record o se upegatafailagi e mafai ai ona e siaki ma talosaga mo faamaumauga o au tuipuipui o le COVID-19 ma e iloa ai iuga lata mai o au siaki o le COVID-19. O le tuatusi o le upegatafailagi o le mycovidrecord.health.nz

O le upegatafailagi lenei, e mafai ai ona e:

  • Talosaga mo faamaumauga o au tuipuipui o le COVID-19 - e aofia ai le numera faamauina, numera o le tui, igoa o le tuipuipui ma le kamupani na gaosia mai ai, ma soo se tuipuipui na fai i isi atunuu na e talosaga e faaopoopo i au faamaumauga faasoifua maloloina. Afai e te moomia tulaga nei mo se isi tagata, vili le 0800 222 478
  • Talosaga mo se My Vaccine Pass - o se faamaumauga aloaia o tulaga o au tuipuipui o le COVID-19 e faaaogā i Aotearoa Niu Sila. E mafai ona e talosaga mo oe lava po o se isi tagata.
  • Talosaga mo se International Travel Vaccination Certificate - e faamaonia ai tulaga o au tuipuipui i atunuu mamao. E mafai ona e talosaga mo oe lava po o se isi tagata.
  • Tagai i iuga o au siaki o le COVID-19 na fai.
  • Tuuina mai iuga o lau Rapid Antigen Test. E mafai ona e faaopoopoa i ai iuga o se siaki mo oe lava po o se isi tagata.

Ua lē toe moomia e le Malo le faia o My Vaccine Pass e ulufale ai i se pisinisi, faatasiga ma auaunaga. E mafai pea lava e pisinisi ona faaaogā My Vaccine Pass o se aiaiga e ulufale ai pe afai o ni mafuaaga faasoifua maloloina ma le saogalemu. Peitai, o pisinisi ma faalapotopotoga o mananao e faaaogā My Vaccine Pass o se aiaiga e ulufale ai e lē mafai ona latou taofia tamaiti i lalo ifo ma le 12 tausaga le matutua ona ulufale e aunoa ma se My Vaccine Pass.

Saili i lau My Covid Record

Mo nisi faamatalaga

Last updated: at