Afai ua amata ona e maua i āuga o le COVID-19 i le vaitaimi o e asiasi mai ai i Niu Sila | If you develop COVID-19 symptoms while visiting New Zealand

Saili i tulaga e moomia ona e faatinoa pe afai ua amata ona e maua i āuga o le COVID-19 i le vaitaimi o e asiasi mai ai i Niu Sila.

A e taunuu mai i Niu Sila, e tatau ona e faia atoa tulaga o moomia i le faiga o siaki e faaaogā ai le rapid antigen tests (RATs) na avatu faatasi ma isi mea i lou faatoa taunuu mai ai.

O lo o ta‘ua i lalo tulaga e tatau ona e faatinoina pe afai ua amata ona e maua i āuga o le COVID-19 pe a tuanai le ‘siaki i le faatoa taunuu mai ai’ (i le Aso 7 po o ona tua atu talu ona e taunuu mai).

Fai se siaki

Afai ua e maua i āuga o le COVID-19, e mafai ona e talosaga mo RATs e maua fua e te tago e faatonu i luga o le initaneti ma e alu e piki mai le nofoaga e maua atu ai.

Talosaga se RAT e maua fua (external link)

Saili se nofoaga o lata ane e aoina mai ai mea e faia ai Siaki o le COVID-19 | Healthpoint (external link)

Afai e leai ni āuga o e maua ai ae e te manao pea e fai se RAT e moomia ona e faatauina mai mea e fai ai e oe lava se siaki mai nofoaga e pei o faleoloa, faletalavai po o supamaketi.

Faiga e faaaogā ai se rapid antigen test

Pe afai ua faamaonia ua e aafia

Afai ua faamaonia ua e aafia, vili le 0800 222 478 e lipotia atu i ai iuga o lau RAT.

Afai e iai sau numera telefoni feaveai o faaaogā, o le numera lena e lafo atu ai e le Matagaluega o Soifua Maloloina se text mai numera aloaia o le 2328 po o le 2648 e faamaonia atu ai le faamaoniga ua e aafia. E aofia ai i le text faamatalaga i le faanofoesea o oe lava ma se code e faaaogā i luga o le initaneti e maua ai le pepa faatumu o fesootaiga vavalalata.

E moomia lou alu i se nofoaga e fai ai le siaki PCR pe a maua atu se faamaoniga mai le RAT na fai ua e aafia. O le a imeli atu le pepa ia te oe e mafai ona e lolomi i se laupepa pe faaali se kopi i lau telefoni feaveai i le nofoaga e fai ai siaki.

Saili se nofoaga o lata ane e faia ai siaki o le COVID-19 | Healthpoint (external link)

1. Faanofoesea oe lava

O lau matafaioi le sailia o se nofoaga e faanofoesea ai oe lava

E tatau ona faanofoesea oe lava mo le umi pe ā ma le 7 aso a o e tau saili malosi. E amata faitau au aso e 7 mai le aso na e amata maua ai i āuga po o le aso na faamaonia ai i se siaki ua e aafia (o fea lava o aso nei e muamua). O lou lē usitaia o tulaga nei, e te noatia ai i se salatupe.

E tatau ona faanofoesea oe lava i le nofoaga o lena e te ai po o se isi apitaga.

Toe siaki pe mafai ona faaopoopo aso o lau faigamalaga po o le sauni e saili se isi apitaga. E iai le faamoemoe e te totogia tupe faaalu faaopoopo e fesootai ma le toe faaopoopo ai o aso o lau faigamalaga po o se avanoa e nofo ai i se isi apitaga. Tagai i faamatalaga o lau inisiua faigamalaga po o aofia ai tulaga nei.

O ai e moomia ona faanofoesea?

O soo se tasi o lua nonofo pe malaga faatasi e moomia ona faanofoesea mo aso e 7. E aofia ai soo se tasi o lua nonofo faatasi i se faletalimalo, faleie, kalaveni, faletoso i taavale po o se fale e mālolo ai, e pei o le ‘tagata na lua malaga faatasi.’ O tagata o tou nonofo faatasi i se hostel po o se backpackers e lē moomia ona faanofoesea, se‘i vagana o i ‘latou nei na tou malaga faatasi.’

Afai e lē mafai ona e nofo i lau apitaga

Afai e lē mafai ona e nofo i le apitaga o e iai i le taimi nei, e tatau ona e sailia se isi apitaga. O apitaga e mafai ona faanofoesea e pei o faletalimalo laiti, faletalimalo tetele po o kalaveni. E tatau ona:

  • lata ane i le nofoaga o e iai
  • aunoa ma ni mea e faaaogā faatasi mai isi mālo.

E lē mafai ona e:

  • malaga i se faigamalaga a se kamupani vaalele i lau apitaga
  • malaga mamao e moomia ai ona e mālolo mo se po e tasi
  • malaga i faigamalaga a vaa i le va o motu po o se auala mo feoaiga lautele.

E mafai ona faaaogā auala patino i le tagata lava ia e malaga atu ai i se isi apitaga. E pei o lau oe lava taavale, po o se taavale na e totogia le faaaogā pe afai e mafai ona totogi le faaaogāina ma le mauaina atu i se faiga e lē fesootai ai ma se tagata.

Toe faatulaga pe faalēaogā au fuafuaga

Faafesootai le kamupani vaalele po o se ofisa mo tagata tafafao mai e toe faatulaga au fuafuaga mo tafaoga po o meafai. Faamolemole ia manatua, e lē o iai se tuutuuga faatulafonoina e tatau ai i se kamupani ona toe totogi atu tupe pe toe faatulaga au fuafuaga. 

O tulaga e tatau ona e faatinoa pe a faanofoesea oe lava

A o faanofoesea oe lava:

  • Alofia le fesootai ma tagata o tou nonofo faatasi, mo se faataitaiga, moe na o oe lava, tuuitiitia le umi e te iai i nofoaga e faaaogā faatasi. Afai e lē o mafai lea tulaga, ia e tausisi i le mamao e 2 mita ma fai se ufi fofoga pe a latalata i isi.
  • Fai lava e oe lau tagamea.
  • Toaga e faamamā fola, e aofia ai mea e lote soo, e pei o 'au o faitotoa, palaka o moli, telefoni.
  • Tatala faamalama e faasavili lelei ai totonu.
  • Talosaga le momoli atu o mea, e pei o meaai ma fualaau.
  • Faigaluega mai le apitaga o e iai pe afai e mafai.

A o faanofoesea oe lava, auae te:

  • tuua lou apitaga mo nisi lava o mafuaaga (se'i vagana o se mafuaaga na faatagaina o ta'ua i lalo)
  • alu e aumai meaai po o fualaau
  • faaaogā faatasi mea ma isi o tou nonofo faatasi — mo se faataitaiga, ipu'ai, pulumu fulunifo, ma solo
  • alu i nofoaga faitele
  • tietie i auala mo feoaiga lautele po o taxis ma taavale e faaaogā faatasi ma isi pasese
  • faatagaina ni tagata asiasi, se'i vagana tagata o saunia tausiga o moomia mo oe po o se isi o tou nonofo faatasi.

Mafuaaga e faatagaina ai ona e tuua le nofoaga o faanofoesea ai oe lava

E mafai ona e tuua lou apitaga ae e tatau ona e faia se ufi fofoga:

  • e fia lipotia, pe faia, soo se suesuega faasoifua maloloina ma se siaki o moomia
  • mo le fia maua atu o se auaunaga faasoifua maloloina o moomia mo se togafitiga e lē mafai ona faatali seia mae‘a le vaitaimi o faanofoesea ai oe lava
  • mo le siitia i se isi nofoaga e faanofoesea ai oe lava mo le faasaoina o lou ola po o le ola o se tasi, soifua maloloina, po o le saogalemu 
  • fai faamalositino i fafo i tuaoi o lata ane i le vaipanoa o e nofo ai – aua e te faaaogāina mea e faaaogā faatasi, e pei o se faleaau
  • mo le fia asiasi i se tasi o le aiga ua tali oti ma e lē o iai se manatu e soifua ai pea i tua atu o le vaitaimi o faanofoesea ai oe lava 
  • mo le fia faamavae i se tino maliu o se tasi o lou aiga a o lei faia le sauniga o le maliu pe afai e lē o mafai ona e faamavae i le tino maliu i le mae‘a ai o le vaitaimi o faanofoesea ai oe lava.

2. Sailia o tagata e fesootai vavalalata

Faailoa i tagata ua e maua i le COVID-19

Faailoa i tagata o tou nonofo faatasi, o le pule o le nofoaga o e nofo ai, o tagata tou te mafuta faatasi, ma soo se tasi o au fesootaiga vavalalata ua e maua i le COVID-19.

O le faiga e te faailoa atu ai i tagata ua e maua i le COVID-19 | covid19.health.nz (external link)

Faatumu faamatalaga i luga o le initaneti o le pepa o sailia ai tagata e fesootai vavalalata

Faaaogā le 6-digit access code e faatumu ai le pepa o sailia ai tagata e fesootai vavalalata na lafo atu e le Matagaluega o Soifua Maloloina mai numera aloaia o le 2328 po o le 2648. Pe ā ma le 5 i le 10 minute le umi e faia ai.

Faatumu faamatalaga o le pepa e sailia ai fesootaiga vavalalata | Matagaluega (external link) o Soifua Maloloina (external link)

3. Mauaina o lagolagosua

Afai e te moomia meaai po o fualaau

Afai e te moomia meaai po o mea o moomia a o e faanofoesea ai, talosaga i aiga po o uo e momoli atu mea nei ia te oe. E mafai foi ona e faatonu i luga o le initaneti ma faatulaga le momoli atu e aunoa ma le fesootai.

Afai e te moomia se fautuaga faasoifua maloloina

Afai e te moomia se fautuaga i auala e togafitia ai ou āuga po o le faateteleina o āuga ua e maua ai, vili le Healthline. E mafai ona e talosaga mo auaunaga faamatalaupu i isi gagana.

Afai e te moomia se tausiga faasoifua maloloina

E ono moomia lou totogia o se togafitiga faasoifua maloloina. Matou te uunaia tagata asiasi mai e fai se inisiua faigamalaga atoatoa a o lei malaga ese.

Afai o oe o se Sitiseni pe Nofomau Ausetalia po o se sitiseni United Kingdom o lo o iai se maliega faasoifua maloloina i le va o atunuu nei e mafai ai ona e totogia le tau lava e tasi e totogi e Tagatanuu Niu Sila mo tausiga faasoifua maloloina.

E ono mafai ona maua se fesoasoani mai le Ofisa a le Amapasa a lou atunuu

Mafaufau e faafesootai lau Amapasa, Konesula po o le Komesina Maualuga pe afai ua e alu i le falemai po o moomia se fesoasoani a le konesula.

Ofisa amapasa faavaomalo i totonu o Niu Sila | Ministry of Foreign Affairs and Trade (external link)

A tupu se faalavelave faafuasei

Afai o e moomia vave se fesoasoani faasoifua maloloina, vili loa le 111 . Faailoa i ai o lena ua e maua i le COVID-19 pe a e valaau i ai. E mafai ona e faailoa atu nisi o tulaga nei pe afai o e maua ai po o se isi o e vaaia:

  • faigata ona mānava
  • matuai tiga le fatafata
  • fai ma matapogia pe ua lē iloa se mea.

4. Faauma ai o le faanofoesea o le tagata lava ia

E mafai ona faauma le faanofoesa o oe lava pe a tuanai aso e 7

Afai o e ma‘i pea, nofo i le apitaga o e iai se‘i tuanai le 24 itula ma ua leai ni āuga o e maua ai. 

E lē moomia ona e faatali mo se feau aloaia e faauma ai le faanofoesea na faia.

E lē moomia ona e faia se siaki - e ono maua atu se faamaoniga o lena e te maua lava i le faama‘i peitai e lē faapea ai e mafai ona e faapepesi atu.

E mafai e tagata o tou nonofo faatasi, o tagata na ‘tou malaga faatasi‘ ona faauma le faanofoesea ai i le taimi lava e tasi ua faia mo oe ae e faalagolago i se siaki na faia i le Aso 7, o ta‘ua ai e lē o aafia, ma e leai ma ni āuga fou po o āuga ua faateteleina. Afai latou te maua atu se faamaoniga ua aafia, e moomia ona amata faitau aso e 7 latou te faanofoesea ai.

Toe faafoisia atu lou malosi

O tulaga ua toe faafoisia atu ai lou malosi mai le COVID-19 ma ua tuua le faanofoesea ai, e iai nai mea e tatau ona e faia ma e faaeteete lelei ai.

O le tuanai ai o le vaitaimi na e maua ai i le COVID-19

Ae e te lei toe malaga i lou atunuu po o se isi nofoaga

Siaki pe moomia ona e faia se siaki e faamaonia ai e te lē o aafia i le COVID-19, po o se pepa ma‘i faasoifua maloloina e faamaonia ai ua e malosi lelei ae e te lei malaga. Afai o lena faatoa e toe malosi mai le COVID-19, e te ono maua atu se faamaoniga o lena e te aafia lava.

Pe afai ua faamaonia e te lē o aafia

Afai e te maua se faamaoniga e te lē o aafia peitai o e maua pea i āuga o le COVID-19, nofo i le fale, ma toe fai se isi RAT pe a mavae le 48 itula. Afai ua faateteleina ou āuga, vili le Healthline i le:

E mafai lava i se tasi ua maua i le COVID-19 ona maua atu se faamaoniga o se RAT e lē o aafia. O tulaga nei e mafai ona tupu pe afai e lei lava atoatoa le siama na siaki, pe e lei lelei le faiga o le siaki.

Last updated: at