O le tuanai ai o le vaitaimi na e maua ai i le COVID-19 | After you have had COVID-19
Toe foi i galuega ma feau masani
A o e saili malosi mai le COVID-19, e te ono faalogoina lou ivā gofie po o le tau mānava. O tulaga nei e masani ai mai le ma‘i na e maua ai.
E lelei lou faifai mālie i au galuega ma feau e masani ona fai. Ia e mautinoa:
- o lava lau moe
- o lelei lau tausami
- mālolo pe afai e moomia
- faifai mālie.
Afai o e atugalu i se mea, e tatau ona e talanoa i lau fomai po o se sui faasoifua maloloina.
Toe foi i le galuega
Afai o lena lava e te maua i āuga i le uma ai o le vaitaimi na e faanofoesea ai, e tatau ona nofo ai pea i le fale seia e malosi lelei. Toe onosai mo le isi 24 itula seia mou ese atoa āuga o e maua ai.
E tatau ona e talanoa i lau taitai po o le supavaisa i se taimi e talafeagai ai ona e toe foi atu i le galuega.
Toe foi i le aoga
Afai o lena lava e te maua i āuga po o lou alo foi i le uma ai o le vaitaimi na e faanofoesea ai, e tatau ona nofo ai pea i le fale seia e malosi lelei. Toe onosai mo le isi 24 itula seia mou ese atoa āuga na maua ai.
O tulaga nei e faia mo aoga amata, aoga, kura ma aoga maualuga faaiunivesite.
E lē moomia ona e tuuina mai se faamaoniga o se RAT po o se PCR na fai e te lē o aafia auā le toe foi ai i le aoga.
Afai ua silia ma le 10 aso talu mai le aso na amata ai ona maua i āuga o le COVID-19 ma ua leai ma se tamaitiiti o ma‘i lava, o lona uiga e lē o toe mafai ona latou faapepesi atu le faama‘i ma ua mafai ona toe foi i aoga.
Afai o lena lava e ma‘i lou alo po o le faateteleina o āuga i le uma ai o aso e 10, e lē tatau ona toe foi i le aoga. E tatau ona e talanoa i lau fomai pe vili le Healthline i le 0800 358 5453.
Toe fai faamalositino
O taimi ua e ma‘i ai ma ua lē mafai se faamalositino pe gaioi tele, e moomia e lou tino le faifai malie e toe masani ai i le tele o au faamalositino ua e masani ai.
E maua atu i lau fomai po o se sui faasoifua maloloina nisi fautuaga i faiga e toe fai ai au faamalositino i tulaga o e maua ai. E te maua nisi faamatalaga i le toe faia o faamalositino i le upegatafailagi a le Health Navigator:
Faamamā ma faavailaau lou fale i le uma ai ona faanofoesea o oe lava
E masani ona pepesi le COVID-19 i tagata o fesootai vavalalata ma se tasi ua pesia pe a fetalei pe mafatua. E ui i tulaga e seāseā ona tulai mai, e mafai foi ona e pesia pe afai e te tago i mea po o fola ua faaleagaina, ona lote lea o ou gutu, isu po o mata.
E mafai ona ola le siama i luga o fola o mea mo sina taimi. Ae e maaleale puipui o le siama ma e faigofie ai lava ona tapē pe a faatoaga ona faamamā ma faavailaau.
O tulaga ua faamaonia ai se tasi i le COVID-19 na pesia i totonu o le fale i le 24 itula talu ai, o lona uiga e ono taatia solo le siama i fola o mea. E tatau ona faamamā ma faavailaau fola uma.
Afai e fou āuga o le COVID-19 ua e maua ai
28 aso pe itiiti ifo talu mai le vaitaimi na pesia ai
Afai e te toe maua i āuga o le COVID-19 ma ua atoa le 28 aso pe itiiti foi talu mai le vaitaimi na pesia ai (a lē o le taimi na faamaonia ai i se siaki ua aafia po o le taimi muamua na maua ai i āuga) ma:
- e maualalo lava tulaga e te faapepesi atu ai le faama‘i, e lē moomia lou toe faia o se siaki — nofo i le fale seia toe malosi lelei, seia mavae le 24 itula talu ona lē toe maua ai i ni āuga
- afai o e maua ai i se gasegase po o āuga tai foliga i āuga o le COVID-19 ua amata ona faateteleina, e tatau ona e saili se fautuaga mai se sui faasoifua maloloina pe vili le Healthline i le 0800 358 5453.
29 aso pe sili atu talu mai le vaitaimi na pesia ai
Afai ua e toe maua i āuga o le COVID-19 ma ua savalia le 29 aso pe sili atu talu mai le vaitaimi na e pesia ai, e tatau ona e faia se RAT. Afai e faamaonia ua e aafia, e tatau ona faanofoesea oe lava ma mulimulitai i fautuaga lava e tasi e pei ona faia i le vaitaimi muamua na e pesia ai.
Afai e te nofo faatasi ma se isi ua maua i le COVID-19
O le taimi lava ua toe faafoisia atu ai lou malosi mai le COVID-19, e lē moomia ona e toe faanofoesea mo le 3 masina pe afai e te nofo faatasi ma se isi ua faamaonia ua maua i le faama‘i.
E mafua lea suiga ona o le maualalo o tulaga lamatia e toe pesia ai i le vaitaimi lea.
Fesootaiga o tagata o lo o nonofo faatasi
Long COVID
O le Long COVID e faamatala ai āuga o faaauau pea le maua ai pe ua amata aliae talu mai āuga o le COVID-19 na muai maua muamua ai. E masani ona silia ma le 12 vaiaso mai le taimi na muai pesia ai se tasi.
O le toatele o tagata e maua i le COVID-19 e toe faafoisia atoa le malosi pe a mavae le 2 i le 6 vaiaso, ma e toe malosi atoatoa i totonu o le 12 vaiaso. Peitai, e toaitiiti tagata na lipotia le tele o āuga i tua atu o le taimi masani e toe malosi ai.
E faitau vaiaso ma o nisi o taimi e faitau masina le maua ai pea i āuga o le long COVID. E mafai ona aofia faatasi ai le:
- faaivaivā
- tau le mafai ona mānava
- tale
- tiga le faaī
- fufusi le fatafata
- tiga le fatafata
- faigata ona gauai, faigata ona malamalama po o le ‘nenefu o le faiai‘
- faigata ona moe
- mainiini
- niniva
- tiga sooga o ponaivi
- tiga maso.
Saili se fesoasoani mai lau fomai po o le vaega faasoifua maloloina, mo se lagolagosua i le vaaiga ma le togafitia o le long COVID. E faatupeina tausiga faasoifua maloloina mo le COVID-19 mo le umi e oo atu i le 6 vaiaso mai le aso muamua lava na e maua ai i āuga po o le aso na faamaonia ai ua e aafia, o fea lava o tulaga nei e muamua atu.
E mafai ona e maua nisi faamatalaga i le long COVID, e aofia ai āuga taatele na lipotia, i le upegatafailagi a le Matagaluega o Soifua Maloloina:
Long COVID | health.govt.nz (external link)
Fai se tuipuipui pe afai e lei faia lava sou tui
O le taimi lava ua e toe malosi ai mai le faama‘i ma e afai e lei faia ou tuipuipui po o se booster, e fautuaina lou faia pea o se tuipuipui.
E tatau ona e faatali mo le 3 masina talu ona e malosi lelei ona e sauni lea e fai lou tuipuipui o le COVID-19.
Last updated: at