O tulaga e tatau ona e iloa ma faatino
Nofo i le fale pe afai o e ma‘i. Afai o oe, po o se isi ua amata na aafia i se tasi o āuga o ta‘ua i lalo, o lona uiga e tatau ona fai se siaki e faaaoga ai se RAT:
- tafe le isu
- tiga le faaī
- tale
- fiva
- faasuati
- manava tatā
- tiga le ulu
- lē lagona le manogi po o le tofo o mea
- tau lē lava le mānava.
E taua le lava o RAT e fai ai siaki i le fale i ne‘i amata ma‘i se tasi o tou nonofo faatasi ma ua moomia na siaki. E tumau pea le maua fua o RAT e fai ai siaki i le vaitaimi atoa o le 2023. E te maua i le upegatafailagi a le Healthpoint nofoaga e maua atu ai RAT e fai ai siaki ma ufi fofoga, po o le vili le 0800 222 478 ma filifili le option 1.
COVID-19 Testing
Manatua e lipotia lau RAT na fai i le My Covid Record, pe vili le telefoni vili fua 0800 222 478 ma filifili le option 1, e te fesootai ai i se isi mo se fesoasoani o e moomia.
My Covid Record (external link)
Faanofoesea
E taua le faanofoesea e pulea ai le salalau o le siama.
Afai ua faamaonia ua e maua i le COVID-19, e fautuaina lou faanofoesea mo aso e 5, tusa lava pe afai e feololo āuga o e faalogoina. Amata tau le aso e te faanofoesea ai mai le aso na amata ai ou āuga po o le aso na faamaonia ai ua e aafia, o fea lava o tulaga nei e muamua maua ai. O lona uiga e le tatau ona e alu i le galuega po o le aoga.
Auala e faanofoesea ai
Afai e moomia na e tuua le fale i totonu o aso e 5 o e faanofoesea ai, e taua lou faia o tulaga uma e puipuia ma taofia ai le salalau o le COVID-19 i isi. E tatau na fai se ufi fofoga i taimi uma e te tuua ai le fale. E le tatau ona e:
- alu i se nofoaga faalesoifua maloloina (se‘i vagana mo le fia maua o tausiga faafomai)
- asiasi i se nofoaga mo tagata matutua
- fesootai ma se isi e ono tigaina pe a maua i le COVID-19.
E tatau ona e faatalanoa ma lou pule o le galuega le aso e te toe foi ai i le galuega po o le talanoa i le puleaoga le aso e toe foi ai lou alo i le aoga. E ono moomia i le falefaigaluega po o le aoga le faia o isi tulaga e puipuia atili ai.
E mafai ona toe faaauau tulaga masani ai, pe afai ua mou ese āuga ma ua e faalogoina ua e manuia. Talu ai e mafai pea ona e faapepesi atu le siama i totonu o le 10 aso, e fautuaina lou faia o se ufi fofoga pe afai e moomia na e asiasi:
- i se nofoaga faalesoifua maloloina (se‘i vagana mo le fia maua o tausiga faafomai)
- i se nofoaga mo tagata matutua
- i se isi e ono tigaina pe a maua i le COVID-19.
Ufi fofoga
E le tuuitiitia le aogā o ufi fofoga e taofia ai le salalau o faama‘i e afaina ai le mānava, e aofia ai le COVID-19, aemaise i falemai ma nofoaga mo tagata e iai manaoga faapitoa.
E fautuaina lou faia o se ufi fofoga pe a asiasi i falemai.
Faamolemole ia utagia tulafono ua faia i falemai mo le faia o ufi fofoga pe a asiasi i ai, e ono talosagaina lou faia o se ufi fofoga aemaise i nisi o tulaga po o nofoaga i totonu o se falemai auā le puipuia o tagata e ono tigaina tele ai.
Fai se ufi fofoga
E maua fua ufi fofoga ma RAT e fai ai siaki mai nisi o nofoaga e mafai ona maua atu ai.
Tagai i le tafailagi lenei e te iloa ai se nofoaga o tau lata ane | Healthpoint (external link)
Tagata fesootai o lo o nonofo faatasi
Afai e faamaonia ua e aafia i le COVID-19, po o se isi o tou nonofo faatasi, e mafai ona aafia isi o tou nonofo faatasi. E fautuaina tagata fesootai uma o tou nonofo faatasi e faaauau le faia o RAT e siaki ai mai le aso na faamaonia ai le tagata ua maua i le COVID-19.
E ta‘ua oe o se tasi na fesootai ma se tagata o nonofo faatasi pe afai tou te nonofo, pe na e moe i se po e 1 po o se aso (sili atu ma le 8 itula) ma se isi ua aafia i le COVID-19. E tatau i tagata o nonofo faatasi ona faaaoga le RAT e siaki ai i aso uma mo aso e 5.
Tagata fesootai o nonofo faatasi
