Ruerue ‘e laloag ne Niu Sirḁgi | Travel around New Zealand

Sḁkior ne tes ta ‘äe noj la ‘inea hün se ‘os ruerue ‘e laloag ne Niu Sirḁgi hün se ‘os väeag ne pån ne pulolo.

‘Os ruerue ‘e te‘ ne väeag ne pån ne pulolo

‘Äe la pō se‘ ma la la‘ se ta utut ma ‘e laloag ne Niu Sirḁgi se ta tēet ma ‘e te‘ ne väeag ne pån ne pulolo.

Nōnō ka ‘äe la la‘ se ta utut ne väeag ne pån ta tu‘åk sin ‘e utut ne ‘äe noho e, ‘äe kop pḁu la tḁupir se te‘ ne foh ne ut ta‘ag. Fak se, nōnō ka ‘äe la leum ‘e ta utut ne foh ne pån ta Miḁ‘ Perperet se pån Miḁ‘ ta, ‘äe kop pḁu la tḁupir se foh ne utut ne pån Miḁ‘.

‘E av ma‘oit, ‘äe kat a‘noa ‘es ra ‘e Vaccine Pass ne puk aier‘ḁkiget ne ‘äe kat pō ‘e ra ‘e ‘af‘af ta la la‘ se ta utut. 

Se ut garueag ne hoa‘ tӧg sal ofrḁu (fak se ‘ahḁifere ne ‘ahḁi ne Cook Straight) kop ma la pā ‘es la kel‘åk ‘ou Vaccine Pass ne puk a‘eir‘ḁkit ne ‘äe kat pō ‘e ra ‘e COVID-19. ‘Äe kat a‘noa ‘es ra ‘e Vaccine Pass ne puk ne aier‘ḁkiget ‘äe kat pō ‘e ra ‘e ‘af‘af ta ‘e av ne a‘es‘ao‘åk ‘e sal ne hoa‘ tӧg sal ofrḁu.

‘Äe kat aier‘åk ra la la‘ se ta tēet nōnō ka ‘äe rak‘åk la noh pū‘atā, ne ‘äe noh tårtår se rogrog ne mou se ‘ou kel‘åk ta hün se ‘af‘af ta.

‘Amnåk ne väeag ne pån ne pulolo

My Vaccine Pass (‘Otou puk aier‘ḁkiget se teak ne vḁi ta)

Kel‘ḁkit hün se ‘af‘af te‘is

Ӧs ma fū‘åk ‘ou la‘la‘o ma ruerue ka ‘äe kat seminte rou ra

Ka kat seminte la‘ ra se ta utut, ‘äe noj la ӧsӧs se tē ne ‘äe pā ‘ese nōnō ka ‘äe pō ‘e COVID-19 ‘e av ne la la‘ se ta utut. ‘Ou ӧs ne ‘amnḁki kop la hat tape‘ ma

  • ‘äe la hӧ‘ tapen se ‘ou hanue ta
  • ‘äe la pō tapen pensinit la hahal‘ia ‘ou motoka ta (‘äe noj la fu‘ ‘e rī hahalag pensin ne la a‘es‘ao‘åk ‘e sal fo‘ou te‘is contactless payment la togia ‘ou pensin ta)
  • la pōag ne tē ne pā ‘ese ‘e koroa se ‘ou nohnoho kop la a‘jeamjeam ut ma‘oi ne ‘äe la pō la fu‘ la togia ‘ou tē

Download ‘amnåk ne COVID-19 Readiness checklist [PDF, 265 KB]

Nōnō ka ‘äe pō ‘e faki‘oag ne COVID-19 ‘e av ne ‘äe la la‘ se ta utut

La‘ la kel‘åk

Nōnō ka la kamat la ‘af‘af ne agtḁu ma COVID-19 ‘a av ne ‘äe la rou ‘ou hanue ta, ‘äe noj la:

  • he‘ se Healthline ta ‘e 0800 358 5453 la far hḁiasoag ma kel‘åk hün se ‘af‘af te‘is
  • noh pū‘atā ‘e utut ne ‘äe noh karḁu e nōnō ka ‘äe pō ‘e faki‘oag ne ‘af‘af ta, se avat ne ‘äe la pō ‘ou kel‘ḁkit hün se ‘af‘af ta
  • he‘ se 111 nōnō ka pā ‘es hḁiasoag mij se ‘ou måür fakforo ne noanoa se ‘äe la huḁg. Rak‘åk se iris ne ‘äe pō ‘e COVID-19.

Nōnō ka rogrog ne ‘ou kel‘åk ta rak‘åk ne ‘äe pō ‘e ‘af‘af ta, ma ‘on le‘ garuet se maj ne måür fakforo täe la hḁifäegag ma ‘äea. ‘Äe la pō la hḁifäegag ma irisa ne tes ta ‘äe kop la rē ma tei ka lelei la ‘äe la hӧ‘ se ‘ou hanue ta. ‘Äe kal aier‘åk ra la fer ‘e ta ‘ahḁiferet se ‘ou hanue ta, ül motoka roa ne kop la fu‘ ta pogiet ‘e ta utut la mӧs ne la‘ ‘e sal ne hoa‘ tӧg sal ofrḁu.

Noh pū‘atā

‘Äe la pō se‘ ma la hӧ‘ se ‘ou hanue ta nōnō ka la pō la a‘sok a‘lelei. Se mao‘åk, noh matḁ‘ te‘ ne ut ne ‘äe la‘ sin, ma kḁp‘åk ta hḁ‘ ut het la fḁua ‘ou isu ma nuju ma noh väevā ‘e ta le‘ hoi‘ḁkit.

Nōnō ka kat pō ‘e ra la hӧ‘ se ‘ou hanue ta, ‘äe kop la nonō ma ‘e utut ne ‘äe täe ‘e ‘on rerege. ‘Äe la pō tape‘ ma hḁiasoag ne mou se av ne noh pū‘atā ‘e ‘amnåk fakgarue te‘is Care in the Community programme.

‘Äe kop la rak‘åk se famorit ne ‘on‘an/puer se utut ne ‘äe noh karḁu e ‘äe hḁi‘eleag ma ta le‘et ne pō ‘e ‘af‘af ta nōnō ka rogrog ne ‘ou kel‘åk ta hӧ‘ḁkim ka rak‘åk ne ‘äe pō ‘e ‘af‘af ta.

Ka tes ta la soko ‘e av ne la noh pū‘atā

Kḁp‘åk ne ta hḁ‘ ut het ‘e av ne la roua ‘ou hanue ta la la‘ se ta utut

‘E av ne la roua ‘ou hanue ta la la‘ se ta utut, ‘äe kop la kḁp‘åk ta hḁ‘ ut het la fḁua ‘ou isu ma nuju:

  • hӧt ‘e ‘ahḁifere.
  • hӧt ‘e ‘ahḁi la‘ sås ne Cook Straight
  • ‘e ut ne noh tårtår se sal ne hoa‘ tӧg sal ofrḁu la roua ne la pū ‘e ut ta‘ag (fak se märå‘ ne ‘ahḁifere)
  • hӧt ‘e sal ne hoa‘ tӧg sal ofrḁu
  • ‘e sal ne hoa‘ tӧg sal ofrḁu ne la hӧt ma ta le‘ hoi‘ḁkit la hḁitӧgiḁn tӧg sal ta

Kḁp‘åk ne ta hḁ‘ ut la fḁua ‘ou isu ma nuju täe a‘ne‘ne‘åk la kḁp‘åk ‘e te‘ ne av ne ‘äe roua ‘ou utut ne ‘äe noho e.

Täe ke väeag ne pån ne pulolo ne ‘is täe ‘e ‘on rerege, kḁp‘åk ne ta hḁ‘ ut het la fḁua ‘ou isu ma nuju la a‘mah‘åk fak foh kop la a‘es‘ao‘åk ‘e ut ‘e ‘on rerege tape‘ ma. Se mao‘åk la sḁkior la ‘inea te‘ ne foh ‘i ka kat seminte rou ra utut ne ‘äe noho e.

Noh matḁ‘ te‘ ne ut ne ‘äe la‘ sin

‘On la fu‘åk ne forås ne COVID-19 ‘e avat ne kankanamo, ‘is kop la ao te‘ ne famӧr ‘atako ane kop ma la noh hḁi‘eleag ma le‘et ne pō ‘e COVID-19 ma la fu‘ḁkia forås ne ‘af‘af ta. Noh matḁ‘ ne ut ne famori la‘o e la hḁiasoag se ‘ḁmis la rue la mij la aoa famori.

Noh matḁ‘ ne ut ne ‘äe la‘ sin ‘e download ne NZ COVID Tracer app ‘e App Store (external link) ne Google Play (external link), ne a‘es‘ao‘åk ne puk ne NZ COVID Tracer la fḁ‘ia te‘ ne ut ne ‘äe la‘ sin.

Download puk ne NZ COVID Tracer [PDF, 1 MB]

Sḁkior se muḁ rogrog ne mou se aoag ne famori hün se ‘af‘af ta

Noh matḁ‘ la pär ma ū le‘et se le‘et

Kop ma Niu Sirḁgi täe utut ne teak ti‘ pḁu vḁi ta, COVID-19 la pō se‘ ma la forås se ‘os pure‘aga.

‘On la a‘jeamjeam ne forås ne ‘af‘af ta, ma noh sok‘åk la hḁiasoag la matḁ‘ua ‘äe ma ‘ou kḁunohoag ta, ma ‘ou pure‘ag ta, iḁ tē pumuet la noh sok‘åk ‘amnåk ne noh ma‘ma‘a

  • Sor a‘fuamamau ma a‘mamamas a‘lelei pḁu ‘ou si‘u ne a‘es‘ao‘åk vḁi ne sor si‘u.
  • Koh ma he‘jiḁ se isfū ne ‘ou si‘u.
  • Matḁ‘ la noh vӓevā ‘e famӧr ne ‘ӓe kat ‘inea ‘e ra.
  • A‘ma‘ma‘ ne a‘es‘ao‘åk vḁi ne a‘ma‘ma‘åk te‘ ne ut ne fa‘ a‘es‘ao‘ḁki.
  • Nōnō ka ‘äe ‘af‘af, pō ‘e maså‘ ta ne faki‘oag ne COVID-19, fu‘ ‘e hanue ta ma la‘ la kel‘åk:
  • Emergency services la noh sok‘åk ‘oris garue ‘e te‘ ne väeag ne pḁni. ‘E av ne ta tēet la sok a‘ferehit, he‘ se 111.

Last updated: at