Kaeke kua moua a koe he tau fakamailoga gagao ma e COVID-19 ke he magaaho kua ahiahi atu a koe ki Niu Silani | If you develop COVID-19 symptoms while visiting New Zealand
Kaeke kua hoko haau a fenoga ki Niu Silani, kua fakaohooho atu kia koe ke moua e tiviaga ma e COVID-19 kaeke kua fai fakamailoga gagao a koe. Kua lata ia koe ke nofo puipui ke he kavi ke 7 e aho kaeke kua moua e koe e tiviaga kua posetivi.Ko e tau Potaaga Koloa ka hoko mai haau a fenoga to hāhā ki loto nei e tau tiviaga antigen mafiti kua maeke ke moua ai he Faahi Puipui Moko ke he magaaho ka hoko atu e haau a fenoga.
Ki lalo hifo he mena nei to iloa ai e koe e tau mena kua lata ia koe ke taute kaeke kua moua e koe e tau fakamailoga gagao ma e COVID-19.
Fano ke moua e taha tiviaga
Kaeke kua moua ai e koe e tau fakamailoga gagao ma e COVID-19, maeke ia koe ke ole ke moua noa e tiviaga RATs kaeke kua ota ki luga he laini hila mo e finatu ke lagaki mai he taha matakavi pauaki.
Ole ke he taha tiviaga RAT moua noa (external link)
Kaeke kua nakai fai fakamailoga gagao a koe ka e manako agaia ke taute e tiviaga RAT kua lata ke fakatau ni e koe haau a tau koloa tivi nei mai ia he taha mau koloa tuga e falu a fale koloa, fale talavai poke tau fale koloa lalahi.
Fakaaoga fēfē e tivi antigen mafiti
Kaeke kua moua ai e koe e tiviaga kua posetivi
Kaeke kua posetivi haau a tiviaga, hea ke he 0800 222 478 ke hokotaki haau e tiviaga posetivi ma e RAT.
Kaeke kua fai numela foni uta fano a koe ne gahua agaia, to fakafano atu ai he Faahi Malolō Tino e taha text mai ia he numela pauaki ko e 2328 poke 2648 ke fakamooli e haau a fakamailoga posetivi. To foaki atu he text nei e tau fakailoaaga hagaao ia ke he nofo puipui mo e taha fakamailoga ke hu atu ki loto ke moua e lagaki ma e kumikumiaga he tau matutakiaga ne toka ki luga he laini hila.
Kua lata ia koe ke finatu ke he taha matakavi ne taute e tau tiviaga mo e moua e tiviaga PCR ka mole haau a tiviaga posetivi he RAT. To fakafano atu taha lagaki kia koe he meli hila ne kua maeke ia koe ke lolomi poke ke fakakite e taha lagaki digitolo ke he matakavi kua taute e tau tiviaga.
Kumi taha matakavi ma e tiviaga he COVID-19 ne tata kia koe | Healthpoint (external link)
1. Nofo puipui
Ko koe ni kua lata ke kumi e taha matakavi ke nofo puipui ai
Kua lata ia koe ke nofo puipui ke he kavi ke 7 e aho to malolō mai a koe. Ko e haau a 7 aho to kamata ai he aho ne kamata e tau fakamailoga gagao poke aho ne kua moua ai e koe e tiviaga posetivi (mena fē ni ne hau mua). Kaeke kua nakai mui tua a koe ki ai, to maeke ia koe ke moua e fakahala.
Kua lata ia koe ke nofo puipui he mena kua nofo ai a koe poke kumi taha fale tali fenoga foki.
Fakakia kua maeke nakai ke matutaki ke loa atu foki e haau a nofo he matakavi ia poke mautali ke kumi taha fale tali fenoga foki ke nofo ai. Ko koe ni ke totogi e tau totogi lafi ki luga nei ne kua lauia ai ha kua matutaki ke loa atu foki e nofo haau poke kua taute e fakamauaga ke nofo he taha fale tali fenoga foki. Kikite atu ke he haau tau maveheaga he inisualene ma e tau fenoga o fano ke kitia kua putoia nakai ki loto.
Ko hai ne kua lata ke nofo puipui?
Ko lautolu ne nonofo mo koe kua nakai hataki atu ke nofo puipui mo koe. Kua fakaohooho ni kia lautolu ke tivi tumau he tau aho oti ke he 5 e aho. Kaeke kua posetivi ha lautolu a tau tiviaga, kua lata a lautolu ke muitua atu ke he tau matafakatufono he nofo puipui.
Kaeke kua nakai maeke ia koe ke nofo ke he haau a fale tali fenoga
Kaeke kua nakai maeke ia koe ke nofo ke he haau a fale tali fenoga ke he magaaho tonu nei, kua lata ia koe ke kumi taha fale tali fenoga foki. Ko e tau fale tali fenoga ke nofo puipui ai ke tuga e tau motela, hotela poke tau campervan kua toka e tau koloa oti i loto. Kua lata ke:
- tata ke he matakavi ke he mena ne hāhā ki ai a koe
- nakai toka e tau poko kua fakaaoga auloa he tau tagata.
Nakai maeke ia koe ke:
- finatu he vakalele komesolo ke he haau a fale tali fenoga
- fakaholo he fenoga mamao ne kua lata ke nofo he taha matakavi ke taha e po
- finatu he poti lau tagata mai he taha motu ke he taha motu poke peloafi lau tagata.
Maeke ke fakaaoga e peloafi pulaevete ke finatu ke he haau a fale tali fenoga kehe. Maeke ka pehe ko e haau ni a peleoafi, poke maeke a koe ke no e taha peleoafi kaeke kua maeke ai mo e fakaaoga e tau totogi mo e tau fakaholoaga ke moua ai ne kua nakai fai matutakiaga.
Hiki poke utakehe haau a tau palana
Matutaki ke he haau a kautaha vakalele poke opoleta he faahi tulisi ke hiki e tau palana fano fenoga poke tau fakaholoaga. Fakamolemole ti mailoga, nakai fai hatakiaga fakamatafakatufono ke he tagata kua foaki e tau faahi gahua ke liuaki e sene poke liu fakatokatoka e haau a tau palana.
Ko e tau mena ke taute kaeke kua nofo puipui
Ke he magaaho kua nofo puipui:
- Lali ke nakai fai matutakiaga mo e tau tagata ne nonofo auloa mo koe, fakatai pehe nei, mohe ni a koe tokotaha, tukutuku hifo e tau magaaho ka nofo ke he tau matapoko kua fakaaoga auloa. Kaeke kua nakai maeke ia koe, nofo ke he 2 e mita he vehā mamao ai mo e tui e pa mata ka fakatata atu ke he falu.
- Taute ni e koe e haau a tau unu.
- Kana tumau e tau fuga lapa, pihia mo e tau koloa kua aamo tumau, tuga e tau lima gutuhala, tau mena ne fakapuho e tau moli, tau foni.
- Hafagifagi e tau hio ke tuku hake ki luga e holo viko he matagi.
- Taute e tau koloa ke taatu he tau tagata kia koe, tuga e tau mena kai mo e tau vai fakamalolō tino.
- Gahua mai he haau a fale tali fenoga kaeke kua maeke.
Ke he magaaho kua nofo puipui ai, kia nakai:
- toka e haau a fale tali fenoga ke he ha kakano taha (kae maeke ke he tau kakano na i lalo)
- fano ke moua e tau mena kai poke tau vai malolō tino
- fakaaoga auloa e tau koloa ki loto he haau a loto kaina - fakatai pehe nei, tau kapiniu, tau kana nifo, mo e tau tauela
- finatu ke he tau matakavi kua tolo ki ai e tau tagata
- fakaaoga e tau peleoafi lau tagata poke teketī mo e tau peloafi kua heke auloa mo e falu tagata
- fai tagata ahiahi, ko lautolu ni ne foaki atu e tau lagomatai leveki kia koe poke taha i loto he haau a loto kaina.
Ko e tau kakano kua maeke ia koe ke fano kehe mai he haau a matakavi kua nofo puipui ai
Maeke ia koe ke toka haau a fale tali fenoga kaeke kua tui tumau a koe e pa mata ke:
- hokotaki atu, mo e taute ai, ha kumikumiaga poke tiviaga ma e moui malolō tino kua lata ke taute
- finatu ke he taha faahi gahua mahuiga he faahi malolō tino ma e tuluiaga ne nakai maeke ke fakatali ke oti e haau a nofo puipui
- finatu ke he taha matakavi nofo puipui foki ke lagomatai atu ke he moui haau poke moui he taha tagata foki, moui malolō tino, poke ke haohao
- faofao ki fafo he haau a matakavi ne kua nofo ai a koe - aua ia neke fakaaoga ke tau fale faofao tino kua fakaaoga auloa, tuga e tau fale ne toka e tau pa koukou
- ahiahi atu ke he tau tagata he magafaoa ne kua amanaki ke toka e mouiaga nei ne kua nakai amanaki ke moui leva ke he magaaho ka oti mai ai a koe he magaaho kua nofo puipui ai
- ahiahi atu ke he tino he taha he magafaoa to hoko ai e mauku poke tanghanga kaeke kua nakai maeke ke ahiahi atu ke he tino ka oti ai e magaaho kua nofo puipui a koe.
2. Kumikumi e tau matutakiaga
Talaage ke he tau tagata kua moua a koe he COVID-19
Talaage ke he tau tagata kua nonofo auloa mo koe, haau a tagata ne leveki ke he fale tali fenoga, tau tagata kua fakafehagai mo koe, mo e ha matutakiaga tata foki ke iloa e lautolu kua moua e koe e COVID-19.
Fakapuke e lagaki ma e kumikumiaga he tau matutakiaga
Fakapuke e lagaki ma e kumikumiaga he tau matutakiaga he Faahi Malolō Tino mo e fakaaoga ai e 6 digit access code ne kua moua e koe he faikailoaga text mai ia he numela pauaki ko e 2328 mo e 2648. Kavi ke he 5 ke he 10 e miniti ke fakapuke.
Fakapuke e lagaki ma e kumikumiaga he tau matutakiaga | Faahi Gahua Malolō Tino (external link)
3. Moua fēfē e tau lagomatai
Kaeke kua manako mena kai a koe poke tau vai fakamalolō tino
Kaeke kua manako a koe he tau mena kai poke tau koloa mahuiga ke he magaaho ka nofo puipui a koe, ole ke he tau magafaoa poke tau kapitiga ke taatu e tau mena nei kia koe. Maeke foki ia koe ke ota e tau koloa ki luga he laini hila mo e taute e fakaholoaga ke taatu he tagata e tau koloa nei kia koe mo e nakai fai matutakiaga.
Ka manako a koe ke he tau talahauaga lagomatai fakamalolō tino
Ka manako a koe ke he tau talahauaga lagomatai ma e tau puhala ke tului aki haau a tau fakamailoga gagao poke kua kelea lahi haau a tau fakamailoga gagao, hea ke he Healthline. Maeke ia koe ke ole ke moua e tau lagomatai ma e faahi fakaliliu kupu.
- 0800 358 5453 — mai he numela foni he motu ko Niu Silani
- +64 9 358 5453 — mai he SIM mai he tau motu kehe
Kaeke kua manako lagomatai he faahi malolō tino
Neke lata ia koe ke totogi e tau tuluiga fakamalolō tino nei. Kua fakaohooho fakalahi a mautolu ke he tau tagata ne kua ahiahi mai ke fakatau e tau maveheaga he inisualene ma e tau fenoga o fano to tuku fenoga ai.
Kaeke ko e tagata motu a koe mai he motu ko Osetalia poke tagata nofo mau ki ai poke taha tagata motu mai i Pelitania, hāhā i ai e taha mavehaga taui ma e faahi malolō tino, ko e kakano he mena nei totogi a koe he mena kua totogi ai he tau tagata Niu Silani ke lata ma e tau levekiaga fakamalolō tino.
Maeke he haau a Ofisa Motu he motu nei ke lagomatai
Mailoga ke matutaki ke he haau a Ofisa Motu, Konosulā poke Komisina Tokoluga kaeke kua nofo atu a koe ke he fale gagao poke kua manako ke he tau lagomatai he faahi konosulā.
Ke he tau magaaho fakatepetepe
Kaeke kua manako lagomatai mafiti a koe mai he faahi malolō tino hea111 agataha. Fakailoa atu kia lautolu kua moua a koe he COVID-19 ke he magaaho ka hea a koe ki ai. Putoia ai foki he mena nei kaeke kua hāhā ia koe poke taha ne kua leveki atu a koe ki ai e:
- Uka ke fafagu
- to kelea lahi e mamahi he fatafata
- matefua poke kua nakai ofo.
4. Fakaotiaga he nofo puipui
Maeke ia koe ke fakaoti he haau a nofo puipui ka mole ai e 7 e aho
Kaeke kua gagao agaia a koe, nofo ke he haau a fale tali fenoga ke molea e 24 e tulā to nakai fai fakamailoga gagao a koe.
Nakai leo a koe ke moua ha fakailoaaga pauaki ke fano kehe a koe mo e nofo puipui.
Nakai lata ia koe ke tivi - ko e fakamailoga to ligaliga ni ke posetivi ka e nakai pehe e mena nei kua gagao a koe.
Ko e magaaho ka malolō mai a koe
Ko e magaaho ka malolō mai a koe he COVID-19 mo e fano kehe mai mo e nofo puipui, ko e falu a mena kua lata ia koe ke taute mo e mailoga ke he magaaho kua malolō mai a koe.
Ko e magaaho ka oti he moua e koe e COVID-19
To fenoga atu a koe ki kaina poke ke he taha matakavi foki
Fakakia kua lata nakai ia koe ke tuku atu e tiviaga nekativi ma e COVID-19, poke taha fakamailoga mai he faahi malolō tino ke fakamooli kua malolō mai a koe to fano fenoga a koe. Kaeke kua malolō mai laia a koe mai he COVID-19, to fakakite ai he haau a tiviaga e fakamailoga kua posetivi.
Kaeke kua neketevi haau a tiviaga
Kaeke kua nekativi haau a tiviaga kae moua e tau fakamailoga COVID-19, nofo i kaina, mo e taute ai taha tiviaga RAT ka mole e 48 e tulā. Kaeke kua kelea atu e haau a tau fakamailoga gagao, hea ke he Healthline he:
- 0800 358 5453 — mai he numela foni he motu ko Niu Silani
- +64 9 358 5453 — mai he SIM mai he tau motu kehe
Maeke nakai he tagata ne moua he COVID-19 ke moua ai e fakamailoga nekativi mai he tiviaga RAT. Kua tupu ai e mena nei kaeke kua nakai lahi e moko i loto he samopolo, poke kua nakai hako e puhala kua taute ai e tiviaga.
Last updated: at