Na icula ni itatarovi na Pfizer | The Pfizer vaccine

Raica eso tale na itukutuku me baleta na icula ni itatarovi na Pfizer kei na sala mo rawa ni cula kina.

Me baleta na icula ni itatarovi na Pfizer

Na icula ni itatarovi e vakalevu e Niusiladi e buli na Pfizer-BioNTech. E kilai ena yaca ni kena ivakatakilakila na Comirnaty.

E vakayavutaki na icula ni tatarovi ena mRNA (messenger ribonucleic acid). E sega ni tiko kina e dua na manumanu ni mate e bula, se mate se manumanu ni mate e sa vakarusai. E sega ni vakaleqa se veitaratara kei na nomu DNA se genes.

E sega ni saumi ka vakarautaki me baleti ira kece e Niusiladi e ra yabaki 5 se sivia.

Na icula ni itatarovi me baleti ira na gone yabaki 5 ki na 11 na Pfizer e ganiti ira na gone ka lailai sobu na kena ivakarau.

Me baleta e so tale na itukutuku ena vuku ni icula itatarovi vei ira na gone yabaki 5-11

Na gauna e na kedrau maliwa na icula itatarovi

  • Yabaki 18 se sivia: ena gadrevi mo cula vakarua ena icula ni itatarovi ka me 3 na macawa na kena veiyawaki. Ko na gadreva e dua na icula ni veitokoni itatarovi kevaka e sa sivia e 3 na vula mai gauna ko a cula taumada kina e na icula ni itatarovi.
  • Yabaki 16 kei na 17: ena gadrevi mo cula vakarua ena icula ni itatarovi me 3 na macawa na kena veiyawaki. Ko na gadreva e dua na icula ni veitokoni itatarovi kevaka e sa sivia e 6 na vula mai gauna ko a cula taumada kina e na icula ni itatarovi.
  • Yabaki 12 ki na 15: ena gadrevi mo cula vakarua ena icula ni itatarovi me 3 na macawa na kena veiyawaki. E se bera tiko ena gauna oqo na icula ni veitokoni ni itatarovi vei ira e ra se bera ni yacova na yabaki 16.
  • Yabaki 5 ki na 11: e vakaturi me 8 na macawa na veiyawaki ni gauna ni cula ena icula ni itatarovi. E se bera tiko ena gauna oqo na icula ni veitokoni ni itatarovi vei ira e ra se bera ni yacova na yabaki 16.

Raica e so tale na itukutuku me baleta na icula ni veitokoni ni itatarovi

Nomu cula ena icula ni itatarovi na Pfizer

E rawa ni ko vakadeitaka na nomu gauna ni cula ena icula ni itatarovi na Pfizer ena Book My Vaccine (external link) se qirita na Talevoni ni Bula ni Veicula ena icula ni itatarovi ni COVID ena 0800 28 29 26.

Ena cula na tabamu e dua e sa vulica vinaka na vei cula ena icula ni itatarovi. E rawa ni ko cula ena kena ikarua ni sa oti e 3 na macawa mai na kena imatai. Kevaka ko a cula ena Pfizer ena kena imatai e dodonu mo cula talega kina ena kena ikarua.

E dodonu mo wawa me rauta ni 15 na miniti mai na nomu cula me rawa ni vakadeitaki ni ko daumaka tiko.

Kevaka ko sa yabaki 18 se sivia e sa na rawa ni ko cula ena icula ni veitokoni ni oti e 3 na vula mai na nomu cula ni itatarovi taumada.

Kevaka ko sa yabaki 16 se 17, e sa na rawa ni cula ena icula ni veitokoni ni oti e 6 na vula mai na nomu cula taumada ena icula ni itatarovi.

Raica e so tale na itukutuku me baleta na icula ni veitokoni ni itatarovi

Sala e cakacaka kina na icula ni itatarovi na Pfizer

E vakauta na icula ni itatarovi na Pfizer na itukutuku me vakavulica kina na yagomu ena sala me valuti kina na manumanu ni mate na COVID-19. E sa na qai vulica na yagomu me kila na manumanu ni mate na COVID-19 ka vakayagataka na sotia ni yago me valuta kina. Na sotia ni yago ena tarova me kua ni vakaleqa na sela ni yagomu na manumanu ni mate.

Kevaka e na mani takavi iko na manumanu ni mate na COVID-19 ena veigauna mai muri, e sa na tiko e yagomu na iyaragi dodonu mo taqomaki kina mo kua ni tauvimate.

Eda kila vakaevei ni mana na icula ni itatarovi na Pfizer.

Na vei icula ni itatarovi ni COVID-19 e ra icula ni itatarovi vakadikevi vakavinaka duadua e se bau vakayacori.

Keitou kila ni mana na cakacaka ni icula na Pfizer baleta ni sa vica vata na vula na kena vakatovolei vei ira e sivia ni 40 na udolu ni bera ni vakadonui me vakayagataki. E vakatovolei na wainimate dina vei ira eso na iwase qai vakatauvatani kei kena e sega ni dina (wainimate masima) e soli ena dua tale na iwase. E kunei e na gauna ni vakatovotovo ni icula ni itatarovi na Pfizer e vakarautaka e rauta ni 95 na pasede ni veitaqomaki mai na ivakatakilakila ni mate na COVID-19.

Na ivakarau ni neitou dikeva na mana ni icula ni itatarovi e vakayagataki

Na Medsafe na tabana e Niusiladi e tiko kina na kaukauwa me dikeva na kena mana. E dikeva na kedra vakayagataki na wainimate vou, okati kina na itatarovi, me vakadeitaka ni ra sa yacova na ivakatagedegede e gadrevi e vuravura kei na veika e ganita na noda vanua. E na vakatura walega me vakadonui me vakayagataki e dua na wainimate e Niusiladi kevaka e sa yacova na vei ivakatagedegede oqori.

E sa solia na Medsafe na veivakadonui ni kena vakayagataki na icula ni itatarovi na Pfizer e Niusiladi (e tiko e so na tikina me vakamuri). E sa kena ibalebale ni sa vakadonui, ia me dau solia tiko na Pfizer ki na Medsafe na itukutuku ni kena vakamuri na ivakatagedegede ni veimatanitu.

Ena tomana tikoga na Medsafe na nona yadrava ivakarau ni veitaqomaki kei na yaga ni icula ni itatarovi. E dikeva lesu na itukutuku vakadidike vakavuniwai e na veiyasa i vuravura kei na nodra itukutuku na kena dau e na tabana ni bula vata kei ira e ra sa cula oti ena icula ni itatarovi.

Kena revurevu

E rawa ni ko vakila e so na revurevu lalai ni vei wainimate ni itatarovi taucoko ko vakayagataka ena loma ni vica siga ni oti mai na gauna e soli kina vei iko. Oqo na kena ituvaki e dau yaco vakawasoma ka ivakaraitaki ni sa vulica na yagomu me valuta na manumanu ni mate.

E levu na revurevu e sega ni dau dede ka sega ni tarova na ika rua ni nomu cula ena icula ni itatarovi se tarova na veika ko dau cakava ena veisiga. Eso e lako vakaca vei ira era na sega kina ni draiva vakavinaka se vakayagataka eso na misini.

Na revurevu ni kena cakacaka ena wainimate na:

  • mosi se vuvuce ni vanua e cula
  • wawale se momosi na yago
  • mosi ni ulu
  • mosi ni masela
  • batabata
  • momosi ni sema ni yago
  • tubu na ivakarau ni katakata
  • wadadamu na mawe ni icula

Eso tale na kena revurevu ena dau yaco vakalevu ena ikarua ni cula.

Eso na revurevu bibi

E so na bibi ia e ra sega ni dau yaco vakawasoma.

Na Myocarditis sa ikoya na vuce ni masela ni uto ka sa kilai tiko ni dua vei ira na revurevu ni icula ni tatarovi na Pfizer.

Revurevu e rawa okati kina:

  • mosi ni saresare e qai tekivu vou
  • cegu leka
  • sega ni kena ivakarau/tuki totolo ni uto

Vakaraitaki ni revurevu ni icula

E rawa ni ko tukuna na revurevu ki na Centre for Adverse Reactions Monitoring (CARM) (Tabana e vakamuria ka vakadikeva na vei irevurevu ca ni wainimate). Na Tabana e vakamuria ka vakadikeva na irevurevu ca ni wainimate e maroroi kina na itukutuku me baleta na ituvaki ni revurevu lako vakaca ni wainimate kei na wainimate ni itatarovi e Niusiladi.

Tukuna na itukutuku ni kena lako vakaca (external link)

Vakadinadinataka ni ko sa cula oti ena icula ni itatarovi

Na website na My Covid Record (Noqu itukutuku me baleta na Covid) e vakatara mo raica ka kerea na kemu itukutuku ni cula ena icula ni itatarovi ni COVID-19 ka raica kina talega kina na macala ni vakadikevi me baleta na COVID-19 e qai cala duadua e muri. Na vanua e tiko kina website na mycovidrecord.health.nz

Ena website oqo, e rawa ni ko raica kina na:

  • Kerea e dua na ilavelave ni nomu itukutuku ni cula ena icula ni itatarovi ni COVID-19 - e okati kina na naba e soli ena wainimate e ra buli vata ena dua na gauna, yaca ni wainimate ni itatarovi, kabani e bulia kei na so tale na icula ni itatarovi mai vanua tani ko a kerea me vakacurumi ena nomu itukutuku ni bula. Kevaka ko gadreva oqo ena vukuna tale edua, qirita na 0800 222 478
  • Kerea e dua na My Vaccine Pass (Noqu ivakadinadina ni sa cula oti) - e dua na itukutuku vaka matanitu me baleta na ituvaki ni nomu cula ena icula ni itatarovi me vakayagataki e Aotearoa Niusiladi. E rawa ni ko kerea ena vukumu se ena vukuna e dua tale.
  • Kerea e dua na International Travel Vaccination Certificate (Na noqu sitivikiti ni vakadinadina niu sa cula oti ena icula ni itatarovi me baleta na lako ki vanua tani) - me vakadinadinataka na ituvaki ni nomu cula ki na veivanua tani. E rawa ni ko kerea ena vukumu se ena vukuna e dua tale.
  • Raica na macala ni nomu vakadikevi me baleta COVID-19.
  • Laveta na macala ni nomu vakadikevi ena Rapid Antigen Test (Vakadikevi ena kena curumaki na tolo ni vauvau ena ucu). E rawa ni ko vakuria e dua na macala ni nomu vakadikevi se ena vukuna tale e dua.

E sa sega ni gadreva na Matanitu me vakayagataki na My Vaccine Pass (Noqu ivakadinadina ni'u sa cula oti) ena vei bisinisi, soqo kei na veiqaravi tale eso. E se rawa tikoga me ra digitaka na vei bisinisi me vakayagataki na My Vaccine Pass (Noqu ivakadinadina ni'u sa cula oti) me dua na ivakarau lavaki kevaka e tiko e dua na yavu e baleta na bula e gadrevi kina. Ia, kevaka e ra gadreva na vei bisinisi kei na isoqosoqo me vakayagataki na My Vaccine Pass (Noqu ivakadinadina ni'u sa cula oti) me yavu me rawa kina na curu, e ra na sega ni rawa ni vakuai ira na gone yabaki lako sobu ka sega na nodra My Vaccine Pass (Noqu ivakadinadina ni‘u sa cula).

Raica na itukutuku ni cula na My Covid Record (Noqu itukutuku me baleta na Covid)

Veika tale eso

Last updated: at