Founga hono ma‘u atu ‘o e fakamatala ‘oku falala‘anga pea ta‘ofi foki mo e ngaahi fakamatala ‘oku ‘ikai totonu | How to find trustworthy information and avoid scams

Oku ta‘etotongi ‘a e huhu malu‘i COVID-19. ‘Oku ‘atā ki he tokotaha kotoa pē mei he ta‘u 12 ki ‘olunga ‘i Aotearoa.

‘A‘ahi ki he Book My Vaccine, pe telefoni ki he COVID Vaccination Healthline ke fokotu‘u ha‘o ‘apoinimeni ke fakahoko ai ho huhu malu‘i.

‘Oku lahi ‘aupito ‘a e fakamatala ‘i he ‘initanetí mo e ngaahi mītiā fakasōsiale fekau‘aki mo e ngaahi huhu malu‘i mei he COVID-19. ‘Oku lava ke fakatupu puputu‘u pea faingata‘a ke ‘ilo‘i ‘a e me‘a ‘oku falala‘angá. Fakapapau‘i ‘oku ke ma‘u atu ‘a e fakamatala mei he ngaahi feitu‘u ‘oku falala‘anga pea ‘oua te ke vahevahe atu ha me‘a kae ‘oua leva kuo ke ‘ilo ‘oku mo‘oni. 

Ko e feitu‘u ke ma‘u atu mei ai ‘a e fakamatala ‘oku falala‘angá

Te ke lava ‘o ma‘u atu ‘a e ngaahi fakamatala ‘oku falala‘anga, mo fakatefito ‘i he saianisí mei he ngaahi feitu‘u ko‘ení:

Potungāue Mo‘ui (Ministry of Health)

Ko e Potungāue Mo‘uí ‘oku ne tataki ‘i Nu‘u Silá ni ‘a e ngaahi tu‘unga ngāue kotoa pē ki he mo‘ui leleí mo e ngaahi faingata‘a‘ia fakaesinó, pea ‘oku ne tokanga‘i ‘a hono pule‘i mo fakalakalaka ‘a e tu‘unga ngāue koeni.

Ngaahi huhu malu‘i mei he COVID-19 — Potungāue Mo‘uí (external link)

Ko e Senitā Fale‘i ki he Huhu Malu‘i mei ha Mahaki (Immunisation Advisory Centre, IMAC)

Ko e IMAC ko ha kautaha fakafonua ia ‘i he malumalu ‘o e tafa‘aki Ako ki he Mo‘ui Lelei ‘a e Kakai (School of Population Health) ‘i he ‘Univēsiti ‘o ‘Okalani (University of Auckland). ‘Oku ne ‘oatu ha fakamatala ‘oku tau‘atāina, totonu mo fakatefito ‘i he ngaahi fekumi fakasaianisi fakamāmani lahi mo ‘i Nu‘u Silá ni foki, fekau‘aki mo e ngaahi mahaki ‘e lava ke ta‘ofi ‘e he ngaahi huhu malu‘i mo e ngaahi ola lelei mo e ngaahi uesia kovi ‘e ala ma‘u mei ha malu‘i ‘o ha mahaki.

Ko e Senitā Fale‘i ki he Huhu Malu‘i mei ha Mahaki (external link)

Ko e Kautaha ‘a Māmani ki he Mo‘ui Lelei (World Health Organization, WHO)

Ko e WHO ko e kautaha ia ‘a e Ngaahi Pule‘anga Fakatahataha (United Nations), pea ‘oku ne tokangaekina ‘a e mo‘ui ‘a e kakai ‘i he ngaahi fonua kotoa pē.

Ngaahi huhu malu‘i mei he COVID-19 — WHO (external link) 

Ngaahi fakamatala ‘oku ‘ikai totonu fekau‘aki mo e huhu malu‘i mei he COVID-19

‘Oku ‘i ai ‘a e ngaahi me‘a tefito ‘oku fiema‘u ke ke ‘ilo fekau‘aki mo e huhu malu‘í mo e ngaahi fakamatala ‘oku ‘ikai ke totonú:

  • He ‘ikai ‘aupito ke kole atu ke ke totongi ‘a e huhu malu‘í pe totongi ke ma‘u hao tu‘unga ‘i he fakahokohoko ki he huhu malu‘í.
  • Ko e fakamatala faka‘ofisiale fekau‘aki mo e huhu malu‘í ‘e ‘oatu ia mei he kautaha falala‘anga ‘oku ne fakahoko ‘a e ngāue ki he mo‘ui lelei, hangē ko e Potungāue Mo‘ui, Unite against COVID-19 pē ko e poate ki he mo‘ui lelei ‘i ho vāhenga fonuá (DHB).
  • ‘E ‘ikai ke ‘alu atu ha taha fakahoko ngāue ia ki he mo‘ui leleí ki ho ‘api nofo‘angá ke fakahoko ai hao huhu malu‘i, tukukehe kapau ne ‘osi fai ha felotoi mo koe ki mu‘a.
  • He ‘ikai ‘aupito ke kole atu ke ke ‘omai hao fakamatala fakafo‘ituitui ‘i ha tohi atu ‘i ho‘o telefoni to‘oto‘ó (text) pe ‘imeilí. Kapau te ke sio ki he me‘a ni, lipooti ia ki he CERT NZ pea ‘oua teke tali ‘a e tohi atu (message).
  • Kapau te ke ma‘u atu ha ‘imeili, telefoni pe SMS ‘o kole atu ‘a e fakamatala fakapa‘anga fekau‘aki mo e huhu malu‘í, ko e kole eni ia ‘oku ‘ikai totonu. Lipooti eni ‘i he vave taha ki he CERT NZ. 

Kapau te ke sio ki ha me‘a fekau‘aki mo e huhu malu‘i ‘oku ‘ikai ke ngali totonu, lipooti ia ki he CERT NZ (external link)

Ko e founga ‘e taha, ko ho‘o telefoni kiate kinautolu ‘i he 0800 237 869.

Ma‘u atu ha fakamatala lahi ange fekau‘aki mo e huhu malu‘i COVID-19 mo e ngaahi fakamatala ‘oku ‘ikai totonú (external link)

Last updated: