Ngā kano ārai mate KOWHEORI-19: te whanaketanga, whakaaetanga me te haumarutanga | COVID-19 vaccines: development, approval and safety

Ko te kano ārai mate KOWHEORI-19 he kore utu, he mahi tūao, ā, e wātea ana ki ngā tāngata katoa o Aotearoa kei tua i te 12 tau te pakeke.

Haere ki Book My Vaccine waea atu rānei ki te COVID Vaccination Healthline ki te whakarite tāpui.

I pēhea te whanaketanga wawe, haumaru hoki o ngā kano ārai mate KOWHEORI-19

Kāore i pēnei rawa te nui o te mahi tahi ā-ao i waenganui i ngā kaipūtaiao me ngā kāwanatanga i te whanaketanga kano ārai mate. Nā tēnei i tere ake ai te whanaketanga o te kano ārai mate, ngā whakamātautau haumanu me ngā whakaaetanga puta noa i te ao.

I tere tonu te whanaketanga o ngā kano ārai mate engari kāore i whāia ngā pokatata i ngā tukanga matea, te whakamōrea rānei i te haumarutanga.

I taea e ngā kairangahau te whakamahi i ō rātou mōhiotanga o ētahi atu huaketo korona me te whanaketanga kano ārai mate e ahu whakamua ai rātou.

I taea hoki e ngā whakamātautau haumanu te kimi wawe i ngā kaitūao huhua nā te aronga nui me te māharahara o te ao whānui ki te KOWHEORI-19. Ko ētahi whakamātautau haumanu ka taea te mahi ngātahi, kaua i te huarahi raupapa. Ko te tikanga o tēnei, ka taea wawe e ngā kaipūtaiao te whakatau mēnā i whaihua te kano ārai mate i te wā poto - otirā i ngā āhuatanga auau, ka hia marama, tau rānei te roa o tēnei mahi.

Kua tū ngā whare whakanao nui, e taea ai te hanga wawe i ngā kano ārai mate, ā, me te rahi ake hoki, otirā kāore i taea i mua

Te aromatawai kano ārai mate me te whakaaetanga i Aotearoa

Ko Medsafe te mana haumaru rongoā o Aotearoa. Ka arotake ia i ngā tono mō ngā rongoā hou katoa, tae atu ki ngā kano ārai mate, kia whakarite kia eke ki ngā paerewa ā-ao me ngā herenga o konei.

Ka tuku whakaaetanga anake a Medsafe mō te whakamahi kano ārai mate i Aotearoa, kia tau rā anō ō rātou whakaaro mō te ekenga ki ngā paerewa kaha mō te haumaru, te kaha ārai whakapokenga me te kounga. He tukanga ōrite tēnei i whakamahia ki te aromatawai i ētahi atu rongoā, pērā i te kano ārai mate rewharewha.

Kāore he pokatata i whāia i te tukunga o tēnei whakaaetanga.

Kua whakamahia angituhia e te hia miriona tāngata huri noa i te ao te kano ārai mate Pfizer. E aroturukuhia tonutia ana mō te haumarutanga

I pēhea te mahinga o ngā whakamātautau kano ārai mate Pfizer

Ko te kitenga o ngā whakamātautau haumanu, ka whai hua te kano ārai mate puta noa i ngā taipakekehanga, ngā ira, ngā mātāwaka me ngā iwi ahakoa ngā tumomo mate mauroa.

E whakaatu ana ngā rangahau, tata ki te 95% o ngā tāngata kua whiwhi i ngā werohanga e rua o te kano ārai mate, ka āraitia mai i ngā tohumate KOWHEORI-19. Ko te tikanga o tēnā, kia whiwhi koe i ngā werohanga e rua ka tino heke tō tūpono pānga ki te māuiui taumaha.

Puta noa i ngā whakamātautau haumanu, i rangahautia te kano ārai mate Pfizer i runga i te 44,000 kaiwhakauru. Ko te huarua o te hunga nei i whiwhi i te kano ārai mate, ko tētahi atu haurua i whiwhi placebo mātaitai. Nō ngā mātāwaka whānui, ngā taipakekehanga, ngā ira me ngā tūmomo mate whānui anō hoki ngā kaiwhakauru.

E toru ngā wāhanga whakamātautau i kuhu atu ai te kano ārai mate Pfizer:

  • Ko ngā wāhanga 1 me te 2 i aromatawai i te haumaru me te immunogenicity (te urupare awhikiri i muri o ia werohanga) o ngā taumata werohanga rerekē o te kano ārai mate i tētahi taupori iti.
  • Ko nga wāhanga 2 me te 3 i aromatawai i te haumaru me te kaha ārai o te kano ārai mate ki te KOWHEORI-19 ā-tohumate, i muri i ngā werohanga e rua o te taumata i tohua, e 21 ngā rā i waenga i ngā werohanga, i tētahi taupori nui ake.

E māramai ai ki te kaha ārai mau roa me te haumarutanga o te kano ārai mate, e haurapatia ana ngā kaiwhakauru o ēnei whakamātautau haumanu mō te 2 tau atu anō i muri mai i tō rātou werohanga tuarua o te kano ārai mate Pfizer.