Ko wai e āhei ana ki tētahi kano ārai mate KOWHEORI-19? | Who can get a COVID-19 vaccine

Ko te kano ārai mate KOWHEORI-19 he kore utu, he mahi tūao, ā, e wātea ana ki ngā tāngata katoa o Aotearoa kei tua i te 12 tau te pakeke.

Haere ki Book My Vaccine waea atu rānei ki te COVID Vaccination Healthline ki te whakarite tāpui.

Ko te kano ārai mate KOWHEORI-19 he kore utu, he mahi tūao, ā, e wātea ana ki ngā tāngata katoa o Aotearoa kei tua i te 12 tau te pakeke. Kāore he aha o tō tūnga kōkota, kirirarau rānei. E kore e whakamahia ngā mōhiohio i kohia mō ngā take manene, ā, ka tiakina tō matataputanga.

Ina whiwhi kano ārai mate koe, e tiaki ana koe i a koe anō, me te whakaiti i te mōrearea tuku i te KOWHEORI-19 ki tō whānau, ō hoa me te hapori.

I konei koe ka kite i ngā mōhiohio whaitake o te hunga e āhei ana ki te kano ārai mate, tae atu ki ngā āhuatanga pēnei i tō pakeke, mēnā e hapū ana, e whāngote ana rānei, mēnā he pānga pāwera tāu ki te kano ārai mate i mua, mēnā rānei he tūmomo mate mauroa tāhau.

Mēnā kei raro koe i te 12 tau

E kore e taea e ngā tāngata i raro i te 12 tau te whiwhi i te kano ārai mate Pfizer i tēnei wā.

Mēnā neke atu i te 65 tau koe

Ko ngā whakaaturanga mai o te kano ārai mate, he tino whaihua, haumaru hoki mā ngā tāngata pakeke ake i te 65 tau.

Mēnā he tangata kaimanga koe, mēnā rānei he pānga pāwera āu

E pai ana mā te hunga kaimanga. Kāore he hua kararehe i roto.

Kāore hoki he paturopi, he hua toto, he DNA, he pūmua, he matū kōpū, he kurutene, he hua poaka, he tāroki, he hoi, kāore rānei he latex (i hangaia mai te taupoki ipuipu i te rapa horihori - bromobutyl).

Rapua te rārangi whakauru nui o te kano ārai mate a Pfizer (external link)

Mēnā e hapū ana koe

Mēnā e hapū ana koe, ka taea e koe tētahi kano ārai mate KOWHEORI-19 i ngā wāhanga hapūtanga katoa.

E whakaatu ana ngā raraunga mai i te maha o ngā tāngata hapū kua whiwhi kē i te kano ārai mate i te ao, kāore he māharahara haumaru tāpiri o te tuku i ngā kano ārai mate KOWHEORI-19.

Ka whai hua pea te pēpi mai i te tuku kano ārai mate i te hapūtanga, i te mea he taunakitanga e whakaatu ana i te tukunga o te paturopi i te toto taura me te waiū, e tuku ana pea i te āraitanga ki ngā pēpi mā te awhikiri taupoto.

Mēnā he pātai āu, māharahara rānei, kōrerotia ki tō mātanga hauora.

Mēnā e whakamātau ana koe ki te whakawhānau

Mēnā e whakaaro ana koe i tētahi hapūtanga ka taea tonu e koe te kano ārai mate a Pfizer.

E kore e pā kinotia ō ira, tō matahua rānei e te kano ārai mate a Pfizer. E kore te mRNA mai i te kano ārai mate e kuhu ki te karihi o ngā ira, te wāhi o tō DNA.

Kāore he wāhanga o te kano ārai mate, o te pūmua koikoi rānei ka hua mai, e tae ki te wharekano, ngā raho rānei.

Mēnā i pā te pāwera i tētahi kano ārai mate

Mēnā i pā tētahi pāwera kino, wawe rānei ki tētahi kano ārai mate, werohanga rānei i mua, kōrerotia atu tēnei ki tō tākuta, mātanga hauora, kaituku kano rānei.

Mēnā he hītori o te whai tauhohe pāwera tino taumaha (anaphylaxis)

Kaua e haere ki te tiki kano ārai mēnā he hītori tāu o te whai tauhohe pāwera tino taumaha:

  • ki tētahi whakaurunga o te kano ārai mate Pfizer
  • ki tētahi werohanga o mua o te kano ārai mate Pfizer

He aha kei roto i te kano ārai mate Pfizer - Te Manatū Hauora (external link)

Mēnā e māuiui ana koe, e kirikā ana rānei

Mēnā e māuiui ana koe i te rā o tō toronga, e aua atu te mate kirikā i te 38°C, me whakatārewa e koe tō whiwhinga kano ārai mate KOWHEORI-19 kia ora mai ai koe.

Mēnā e whiwhi ana koe i tētahi atu kano ārai mate

Kāore e taea e koe te kano ārai mate KOWHEORI-19 i te wā e whiwhi ana koe i ētahi atu kano ārai mate. Me tatari mō tētahi wā, i runga anō i te āhua o te kano ārai mate.

Te kano ārai mate rewharewha

Tatari mō te 2 wiki i waenga i te kano ārai mate KOWHEORI-19 me te kano ārai mate rewharewha.

E tūtohu ana mātou kia whiwhi koe i ngā werohanga e rua o te kano ārai mate KOWHEORI-19 i te tuatahi - e 3 wiki te itinga o te wā wehenga o ēnei werohanga e rua. Ka taea e koe te kano ārai mate rewharewha atu i te 2 wiki i muri i tō werohanga tuarua.

Mēnā kāore ō toronga whakarite mō te kano ārai mate KOWHEORI-19, tīkina tō kano ārai mate rewharewha i te tuatahi. Ka taea e koe tō werohanga KOWHEORI-19 tuatahi i te 2 wiki i muri mai o tēnei.

Ngā kano ārai mate Karawaka, Pupuhi Repe me te Karawaka Tiamana (MMR)

E tūtohu ana mātou kia whiwhi koe i ngā werohanga e rua o te kano ārai mate KOWHEORI-19 i te tuatahi - e 3 wiki te itinga o te wā i waenga i ēnei werohanga e rua.

Mēnā ka whiwhi koe i te kano ārai mate KOWHEORI-19 i te tuatahi, me tatari koe mō te itinga o te 2 wiki i muri o te werohanga tuarua, i mua o tō whiwhinga i te kano ārai mate MMR.

Mēnā ka whiwhi koe i te kano ārai mate MMR i te tuatahi, me tatari koe mō te itinga o te 4 wiki i mua i tō whiwhinga i te werohanga tuatahi o te kano ārai mate KOWHEORI-19.

Mēnā he tūmomo mate mauroa tāu

Ko te kitenga o ngā whakamātautau haumanu, ka whai hua te kano ārai mate puta noa i ngā taipakekehanga, ngā ira, ngā mātāwaka me ngā iwi ahakoa ngā tumomo mate mauroa.

Ka taea e koe te āheinga wawe ki te kano ārai mate mēnā kei tua koe o te 16 tau, ā, ka ea i a koe tētahi, ētahi rānei o ngā paearu nei:

  • He mate hauora tāu, ko te tikanga o tēnei mate e māraurau ana koe mō te kano ārai mate rewharewha ka utua e te kāwanatanga, tae atu ki te hunga e hapū ana.
  • Kua kohuratia koe ki te mate hinengaro taumaha (tae atu ki te mate tuakoi, mate pāpouri nui, mate bipolar, mate huinga tohumate tuakoi maha rānei, me ngā pākeke e whiwhi ana i te hauora hinengaro tuarua, tuatoru rānei me ngā ratonga waranga).
  • He ngoikore te whakahaeretanga o te pēhanga toto nui, he taumaha rānei te pēhanga toto nui. I tēnei āhuatanga, ko te whakamārama o te taumaha, me whiwhi i ngā rongoā whakahaere e rua, neke atu rānei.
  • He tino mōmona koe (kua tautuhia hei BMI ≥40).

Mō ētahi atu tohutohu mō te whiwhi kano ārai mate i te wā e pāngia ana e ngā mate taumaha, e whiwhi maimoatanga ana, mātaitanga, kai rongoā rānei, tēnā haere ki te paetukutuku a Te Manatū Hauora.

Kupu tohutohu kano ārai mate mā ngā rōpū motuhake me ngā tūmate hauora - Te Manatū Hauora (external link)

Last updated: