Te whakamātau tōmua i te hunga e haere mai ana ki Aotearoa | Pre-departure testing for travellers to New Zealand

Ko te pare atu i te mate korona i Aotearoa, te mahi tiaki rawa i a tātou.

Mai i te 11:59pm i te 25 o Kohitātea 2021, katoa ngā tāngata e haere mai ana ki Aotearoa, hāunga anō ērā o Ahitereiria, o Anatātika, o Rarotonga, o ngā Moutere o Maikoronihia, o Whīti, o Kiripati, o ngā Moutere Māhara, o Nauru, o Niu Karetōnia, o Niue, o Parau, o Hāmoa, o ngā Motu Horomona, o Tokerau, o Tonga, o Tuwaru, o Whenuatū, o Uwea me Whutuna, me mātua whakamātautau mō te KOWHEORI-19, ā, me korona-kore te whakatau a te whakamātautau, e 72 hāora i mua i te wehetanga, ka mutu ka whakaatu mai hoki i te tiwhikete taiwhanga pūtaiao, i tētahi atu momo taunakitanga tōtika rānei.

E whakaaetia ana hoki te katoa o ngā whakamātau PCR, whakamātau LAMP me ngā whakamātau kita whakamate mō tēnei whakamātau tōmua.

Me mahi atu ngā whakamātautau katoa e tētahi taiwhanga pūtaiao.

E whakaaetia ana hoki ngā tiwhikete tohuora kua tuhia ki reo kē.

E whakawāteatia ana i te whakamātau tōmua ko ngā tamariki kāore anō kia rua tau (24 marama) te pakeke. E whakawāteatia ana i te whakamātau tōmua ko te tangata haere mai ki Aotearoa he tiwhikete tohuora tāna e tohu ana kua ora ake ia i te KOWHEORI-19, e kore hoki e pāngia tētahi atu ki taua mate e ia.

Ko ngā tāngata haere kāore e taea te whakamātau nā tētahi take hauora, me mātua toro ki tētahi tākuta i roto i te 72 hāora i mua i tō wehetanga. Me mātua homai e te tākuta he tiwhikete tohuora e whakaatu ana he take hauora kē i kore ai koe e whakamātauria, ā, kāore hoki ō tohumate KOWHEORI-19.

Mēnā e rere ana koe ki whenua kē mā Aotearoa, ā, kāore koe e puta i te taiwhanga whakawhiti waka rererangi, e whakawāteatia ana koe i te whakamātau tōmua.

E kaha ana te whakahau ki te hunga haere kia whakapā atu ki ō rātou kamupene rererangi kei tūpono he whakaritenga anō ā rātou mō ngā whakamātau tōmua. Me mōhio anō hoki ki ngā whakaritenga a ērā atu whenua e whakawhiti atu ai rātou.

Mai i te 8 o Huitanguru, katoa ngā pāhihi ka tae mai ki Aotearoa (i tua atu i ērā nō ngā whenua i whakawāteatia), kāore he tohu whakaatu i te korenga o te KOWHEORI-19, tēnā rānei he tiwhikete tohuora, tērā pea e whiua ki te whaina, piki atu ki te $1,000.

Ngā whakaritenga whakamātau o te Rā 0 mō te hunga e haere mai ana ki Aotearoa

Hei te taunga mai ki Aotearoa, ko ngā tāngata haere mai katoa:

  • me noho ki tētahi puni whakamohoao, whaitua taratahi rānei mō te 14 rā
  • me whakamātau mō te KOWHEORI-19 i te rā 0 (arā, i te rā tonu e tae atu ai ki te puni whakamohoao)
  • me noho ki tōna ake rūma kia mōhiotia rā anō te whakatau a te whakamātautau
  • me he tohumate korona i te taenga mai o te tangata, ka haere tōtika atu ki tētahi whaitua taratahi.

He werohanga ihu PCR te momo whakamātautau nei.

Ka 24-28 hāora kia hoki mai ngā whakataunga whakamātautau.

Me he korona-kore te whakatau a te whakamātautau, ka noho tonu te tangata ki te puni whakamohoao mō te roanga atu o ngā rā 14. Ka whakamātauria anō i te takiwā o te rā 3 me te rā 12 o tā rātou noho. Mō te katoa tonu o ngā tāngata, me korona-kore te whakatau a te whakamātautau KOWHEORI-19 me whakaae hoki e tō mātou kāhui hauora he iti te tūpono kei te kawea haere te mate korona, kua pāngia rānei ki ētahi atu kātahi anō ka whakaaetia te wehe atu i te puni whakamohoao.

Mehemea he mate korona te whakatau, ka tōmua ake te neke i te tangata ki te whaitua taratahi, tēnā i kore ai te whakamātautau i te rā 0.

Hei tūwatawata anō te whakamātautau o te rā 0 hei ārai atu i a KOWHEORI-19 i Aotearoa, tae atu ki ōna putanga kētanga hou kua ara ake i tāwāhi, me te tere ake o te horapa haere.

He pārongo atu anō

Mō ngā tino kōrero o te wā e pā ana ki te mate korona, tēnā peka ki https://covid19.govt.nz/updates-and-resources/translations/

Mō ētahi atu kōrero e pā ana ki ngā puni whakamohoao, me ngā whaitua taratahi, haere ki tēnei: https://www.miq.govt.nz/travel-to-new-zealand/arriving-in-nz/ (external link)

Last updated: