Te mahere a Aotearoa hei toha i te kano ārai mate | New Zealand's vaccine rollout plan

Find out when you can get a vaccine

Kua whai a Aotearoa i ngā pota 10 miriona o te kano ārai mate a Pfizer/BioNTech. E nui ana ērā e werohia ai ngā tāngata katoa i Aotearoa ki ngā pota e rua o te kano ārai mate me whai e whakatōngia ai rātou ki te kano ārai i a KOWHEORI-19.

He mahere tā te Kāwanatanga e utukore ai, e tōkeke ai hoki te wātea o te kano ārai mate ki a rātou.

Ka whakamātāmuatia te hunga e nui ake ana te mōrearea i a KOWHEORI-19.

E hiahia ana mātou kia whai wāhi ngā tāngata katoa i Aotearoa ki te ārai i a rātou anō, i ō rātou whānau me ō tātou hapori, mā te werohanga ki te kano ārai i a KOWHEORI-19.

Ka tohaina haerehia ngā pota ki ngā rōpū e whā. Ko te whāinga, kia werohia ngā tāngata katoa i Aotearoa ki te kano ārai mate i mua i te mutunga o te tau 2021.

Te Rōpū 1: Te hunga e mahi ana i ngā ripa tauārai me te hunga e noho tahi ana ki a rātou

Ko te hunga tuatahi ka werohia ki te kano ārai mate ko ō tātou kaimahi kei ngā ripa tauārai me te hunga e noho tahi ana ki a rātou. Ka whai wāhi ki tēnei rōpū ngā kaiwhakapaipai, ngā nēhi e whakahaere ana i ngā arowhai hauora i ngā Wāhi Whakataratahi, ngā kaiwhakahaumaru, ngā āpiha o te mana ārai, o te ripa tauārai anō hoki, ngā kaimahi hōtēra, ngā kaimahi pukumaire me ngā pirihimana e tika ana kia whakaurua ki ngā Wāhi Whakataratahi, ngā kaimahi waka rererangi, ngā mana taunga poti me ngā kaiwero i te kano ārai mate.

Ka rere ngā werohanga o tēnei Rōpū ki te kano ārai mate hei a Pēpuere me Māehe o te tau 2021.

Te Rōpū 2: Ngā kaimahi aroaro ā-kapa e nui ana te mōrearea me ngā tāngata e noho ana ki ngā wāhi e nui ana te mōrearea

Kia mutu te whakatōngia o ō tātou kaimahi kei ngā ripa tauārai me te hunga e noho tahi ana ki a rātou ki te kano ārai mate, kātahi mātou ka whakatōngia ki te kano ārai mate ko ngā kaimahi hauora kei ngā aroaro ākapa e nui ana te tūpono pāngia ki a KOWHEORI-19, e nui ana hoki/rānei te tūpono o te horanga o te mate rā mā ō rātou whakawhitinga me te tūroro.

Kei te Rōpū 2 hoki ko ngā Māori me ngā tāngata o Te Moana nui a Kiwa e pakeke ake ana, e tiakina nei e ngā whānau (ko ērā hoki e noho tahi ana ki a rātou, me ō rātou kaitiaki).

Hei wāhanga hoki mō tēnei Rōpū, ka werohia hoki ki te kano ārai mate ko ērā kei te takiwā hauora (DHB) o te tonga o Tāmaki kua 65+ ngā tau, ko ērā rānei e raru nei ō rātou pūnaha awhikiri, ko ērā rānei e hauā ana.

Ka werohia te Rōpū 2 ki te kano ārai mate atu i a Maehe ki a Mei, i te tau 2021.

Te Rōpū 3: Ngā tāngata kua 65+ ngā tau, ngā tāngata e raru nei ō rātou pūnaha awhikiri, ngā pakeke hoki e tautiakina ana e te ture

I te Rōpū 3, ka werohia ki te kano ārai mate, ko ngā tāngata kua 65+ ngā tau, ko ērā e raru nei ō rātou pūnaha awhikiri, ko ērā rānei e hauā ana, ko ērā pakeke hoki e tautiakina ana e te ture.

Ka whai wāhi atu ki ngā āhuatanga e kīia ai kua raru te pūnaha awhikiri ko te manawa toto pūroto, ko te toto pōrutu, ko te roro ikura, ko te matehuka, ko ngā mate mau tonu ki te pukapuka, ko te mate tākihi me te mate pukupuku.

Ka rere ngā werohanga o te Rōpū 3 ki te kano ārai mate atu i a Mei o te 2021 ā haere ake.

Te Rōpū 4: ērā atu o te taupori

I te Rōpū 4, ka wātea te huarahi kia werohia ki te kano ārai i a KOWHEORI-19 ko ērā atu tāngata katoa kua 16 tau te pakeke, kua pakeke ake rānei i tērā, kāore anō kia whakatōngia ki te kano ārai mate. Kāore anō kia whakaaetia e Medsafe te werohia o ngā tāngata e tamariki ake ana i te 16 tau te pakeke ki te kano ārai mate a Pfizer/BioNTech.

Ka rere ngā werohanga o te Rōpū 4 ki te kano ārai mate atu i a Hūrae o te tau 2021 ā haere ake.

Ahakoa mā te kano ārai i a KOWHEORI-19 e ārai atu te wheori ā haere ake nei, me kaha tonu tātou katoa ki te whai wāhi ki te aukatinga o KOWHEORI-19 i ō tātou hapori. Me ū tonu tātou ki ngā tikanga matua e 4: te horoi ringaringa, te karapa i ngā tohu āurupare wawe (QR), te whakakā i te hono iarere (Bluetooth) me te noho i te kāinga ina pāngia e te māuiui.

Pāwhirihia mai a konei e kitea ai he pārongo mō ngā āhuatanga i tōna tikanga ka puta i te wā o te werohia ou

Pāwhirihia mai a konei e kitea ai he pārongo mō ngā āhuatanga i tōna tikanga ka puta mai i muri i te werohia ōu