Te āhua o te āwhina a te whakatewhatewha pānga | How contact tracing helps
Ko te whakatewhatewha pānga te huarahi o te kimi me te whakapā atu ki te tangata kua whakaraerae atu pea ki a KOWHEORI-19.
Ina tohua kua pāngia te tangata e KOWHEORI-19, ka whakamahi te Manatū Hauora me ngā Poari Hauora ā-Rohe i ngā momo rauemi e kitea ai te hunga kua pāngia pea e ia, kua pāngia hoki pea e te mate.
Kia tere ake tā tātou whakatewhatewha pānga, ka tere ake tā tātou aukati i te hōrapa o KOWHEORI-19.
Hei āwhina i te aukati o te hōrapatanga, e tūtohu ana mātou kia puritia e koe he kōrero mō ō nekenekehanga, e whai wāhi ai;
- Te wāhi i haere rā koe.
- Te wā i haere rā koe.
- Te hunga i tūtakina rā e koe.
Te huarahi hei pupuri i ngā kōrero mō ō nekenekehanga
- Whakamahia rānei tētahi taupānga hei taunga mō ngā kōrero o ō nekenekehanga
- Me whai rātaka rānei,
- Me tiaki rānei tētahi rārangi ingoa ki tētahi wāhi e haumaru ana
- Me mahi whakaahua rānei e whakaatu ana i ngā wāhi kua torona e koe, me te wā i aua wāhi rā koe.
Whakamahia te taupānga o NZ COVID Tracer, tōna puka-iti rānei mehemea ka taea, whakamahia rānei te huarahi e whai take ana ki a koe. Whakatenatenahia tō whānau me ō hoa kia pērā hoki rātou.
Te taupānga o NZ COVID Tracer
Ko tā te taupānga whakatewhatewha a te Manatū Hauora, a 'NZ COVID Tracer' he āwhina i a koe ki te waihanga i tētahi rātaka tahiko.
E taea ana:
- te karapa ngā tohu QR e mana ana i ngā pakihi e whai wāhi mai ana
- te whakauru kōrero mō ngā wāhi kua torona e koe engari kāore nei he pānui whakaahua i reira e whakaatu ana i te tohu QR.
He mea hoahoa te taupānga kia tiakina te matatapu ōu me ngā kōrero kua whakaurua e koe.
Kāore ngā pārongo (hāunga ngā pārongo matakore ā-tauanga) ka tukuna e koe ki te Manatū e tohaina ki pokapū kāwanatanga kē, hāunga ngā wā e hāngai pū ana te whai wāhitanga mai o taua pokapū ki te urupare a te hauora tūmatanui, ā, e mātuatua ana hoki kia tohaina ngā pārongo mō ngā take o te haumaru tūmatanui i te wā o te mate urutā, o KOWHEORI-19. E kore e whakamahia hei take uruhi.
Kia utaina ki tō pūrere, he tino iti noa iho te whakapaunga a te taupānga o NZ COVID Tracer i ngā hua e hono ai koe ki te ipurangi. Mēnā e āwangawanga koe ki te whakapaunga o ngā hua e hono ai koe ki te ipurangi, tērā pea ka hiahia koe kia hono rā anō ki te ahokore i mua i tō uta i te taupānga ki tō pūrere.
Utaina te taupānga ki tō pūrere mai i Apple App Store rānei (external link), i Google Play rānei (external link).
He kōrero anō mō te taupānga o NZ COVID Tracer (external link)
Te puka-iti o NZ COVID Tracer
Ki te kore koe e whakamahi i te taupānga o NZ COVID Tracer, ka pai tō whakamahi i te puka-iti o NZ COVID Tracer hei pupuri i tētahi rātaka ōkiko e mau nei ngā kōrero mō ngā wāhi kua tauria e koe. E 30 ngā whārangi o ia puka-iti, nō reira ka nui ērā mō tōna 1 marama.
Mēnā ka whakamahia e koe te puka-iti, e tūtohu ana mātou:
- kia puritia e koe tō puka-iti e whakaurua ai ngā kōrero mō ō nekenekehanga ka wehe ana koe i te kāinga
- kia waitohu tonu i ngā rārangi ingoa mō te whakatewhatewha pānga ka toro ana koe ki ngā wāhi pēnei i te toa.
Te uta i ngā puka-iti ki tō pūrere me te tā mai
Ka mate pea koe ki te panoni i ngā whakaritenga o tō pūrere tā e tāngia ai te maha o ngā whārangi e pīrangitia ana e koe.
Te tono i te puka-iti
E āhei ana te tono kia 10 ngā puka-iti i te mōkī. E āhei ana tō tono kape māu anō, hei tuari rānei ki tō hapori. E utukore ana ngā tono, ā, ka 2-3 wiki te roa e tae atu ai ngā mōkī ki a koe.
Īmērahia tō ingoa, tō wāhi noho, me te maha o ngā pukapuka e whāia ana ki Covid19Response@dpmc.govt.nz
He kōrero anō mō te whakatewhatewha pānga
He pārongo anō ā te Manatū Hauora mō te whakatewhatewha pānga.
Last updated: