He tirohanga whānui ki te kano ārai mate | Vaccine overview

He wāhanga mātuatua ngā kano ārai mate e haumaru ana, e whaihua ana hoki ki te āhua o tā tātou tiaki i a Aotearoa me ngā kiritata kei Te Moana-nui-a-Kiwa i a KOWHEORI-19. Ka whakahirahira hoki ngā kano ārai mate ki tō tātou haumanutanga ā-ōhanga, ki te huakanga anō hoki o ō tātou ripa tauārai.

Ka utu-kore ngā kano ārai i a KOWHEORI-19. Kāore te marea o Aotearoa e herea e te ture kia werohia.

Ka puta te tiakanga i ngā kano ārai i a KOWHEORI-19 mō ngā tau e tū mai nei. Heoi, me mahi tonu tātou katoa ki te aukati tonu i a KOWHEORI-19 i ō tātou hapori. Me mātua ū tātou ki ngā ture matua e whā: te horoi ringa, te karapa tohu urupare-wawe (QR), te whakakā i te hono iarere (Bluetooth) me te noho i te kāinga ina pāngia e te māuiui.

I a tātou ka uru ki tēnei wāhanga hou o tā tātou pakanga ki a KOWHEORI-19, e whakahirahira rawa ake ana te whai pārongo i ngā puna e whakaaetia ana. Ka raru tātou i te hē o te pārongo, i te wā me mātua mahi tahi tātou hei aukati i te wheori. Ka kitea he pārongo e pono ana; i tō Tākuta, i a Healthline, i tō Poari Hauora ā-Takiwā, i te Manatū Hauora, i te pae tukutuku hoki o Unite Against Covid-19, i www.covid19.govt.nz

Te whakaū i te haumarutanga o tā Aotearoa kano ārai i a KOWHEORI-19

Kua aromātaihia, kua whakaaetia hoki e Medsafe te whakamahinga o te kano ārai mate a Pfizer/BioNTech ki Aotearoa. Ko Medsafe te kaiwhakarite ā-rongoā i Aotearoa e motuhake ana. Ko tāna he aromātai i ngā tono mō ngā rongoā hou, tae atu ki ngā kano ārai mate. Me ū ngā kano ārai mate ki ngā paerewa ā-ao, ki ngā here ā-takiwā hoki e pā ana ki te kounga, ki te haumarutanga me te whaihua i mua i te whakaaetanga me te whakamahinga ki Aotearoa.

Te hōtaka mō te werohanga ki te kano ārai i a KOWHEORI-19

Kua mau i te Kāwanatanga he putunga kano ārai mate nā Pfizer/BioNTech hei tuku ki te katoa o te motu whānui, hei tautoko hoki i ō tātou kiritata kei Te Moana-nui-a-Kiwa. 10 miriona te tapeke o ngā pota o te kano ārai mate a Pfizer/BioNTech ka noho ki Aotearoa. Ka nui tēnei hei wero i te 5 miriona tāngata ki ngā pota e rua o te kano ārai i a KOWHEORI-19 me mātua whai e rātou. E utu-kore ana te wātea o te kano ārai i a KOWHEORI-19 ki te katoa o Aotearoa, ahakoa te āhua ki tō kōkota, ki tō kirirarautanga rānei. Ina kohia he pārongo, e kore e whakamahia mō ngā take manene. E whakarite ana a Te Manatū Hauora i tētahi mahere e tōkeke ai te tohaina o ngā kano ārai mate. Ka noho mātāmua ko ērā e mōrearea ake ana i a KOWHEORI-19, pēnei i ngā kaimahi i te ripa tauārai, i ngā kaimahi hauora, i ngā Māori, i ngā uri o Te Moananui- a-Kiwa, i ngā kaumātua me ngā hauā.

Ko te hunga tuatahi ka werohia ki te kano ārai mate ko ngā kaimahi kei ngā ripa tauārai, kei ngā Wāhi Whakataratahi hoki nā ō rātou tūranga mahi hei aukati tonu i a KOWHEORI-19 i Aotearoa. Ka whai wāhi mai ki tēnei rōpū ko ngā kaiwhakapaipai, ko ngā nēhi e whakahaere ana i ngā arowhai hauora i ngā Wāhi Whakataratahi, ko ngā kaiwhakahaumaru, ko ngā āpiha o te mana ārai, o te ripa tauārai anō hoki, ko ngā kaimahi hōtēra me ētahi atu. Ko te hunga hoki e noho tahi ana ki a rātou ngā tāngata tuatahi ka werohia ki te kano ārai mate.

Kua whakaaetia e Medsafe te whakamahinga o te kano ārai mate a Pfizer/BioNTech i raro i ngā aratohu e whai ake nei:

  • kua whakaaetia kia tukuna te kano ārai mate ki ngā tāngata kua 16 tau, kua pakeke ake rānei i tērā.
  • e tohungia ana ngā wāhine hapū kia kōrero ki ō rātou tākuta mō ngā tūraru me ngā hua o te werohia o rātou ki te kano ārai mate.
  • e wātea ana te whakamahia o te kano ārai mate e ngā wāhine pipī waiū.
  • ko ngā tūroro e whāngaihia ana ki ngā haumanu motuhake, tae atu ki a Keytruda, ki a Opdivo, ki a Yervoy, ki a Tecentriq hoki me whai tohutohu i ō rātou mātanga i mua i te werohia ki tā Pfizer kano ārai i a KOWHEORI-19 ā-mRNA nei.
  • ko ngā tāngata e werohia nei ki te kano ārai mate ka whakawhiwhia ki te pārongo e pā ana ki ngā huamate māori e matapaetia ana, hei tauira, ko te kirikā, ko te mamae o ngā uaua me te ruha.
  • me 20 meneti rawa te roa o te mātakina o te tangata i muri tonu i te werohia ōna ki te kano ārai mate.

Pāwhirihia mai a konei e kitea ai he pārongo anō mō tā Aotearoa toha i ngā kano ārai mate

Pāwhirihia mai a konei e kitea ai he pārongo mō ngā āhuatanga i tōna tikanga ka puta i te wā o te werohia ōu

Pāwhirihia mai a konei e kitea ai he pārongo mō ngā āhuatanga i tōna tikanga ka puta i muri i te werohia ōu

Te pānga o te kano ārai mate ki ō tātou ripa tauārai

E wawe rawa ana kia mōhio tātou ki te āhua o tā te wātea o ngā kano ārai mate i Aotearoa, i te ao whānui hoki whakaaweawe i ngā panonitanga ki ō tātou herenga i ngā ripa tauārai.

E mahi ana ngā kairangahau ki te whakaū i te noho tonu rānei a te tangata kua werohia hei kaituku, ka tuku ai i a KOWHEORI-19 ki tangata kē atu. Kia tūturu rā anō tērā pārongo, me ū tonu ā tātou whakaritenga i ngā ripa tauārai o te wā nei.

Last updated: