Aafiaga o tuipuipui o le COVID-19 | Side effects of COVID-19 vaccines

Saili i aafiaga o le tuipuipui ma gaioiga e tatau ona e faia pe a aliae tulaga nei ia te oe.

E fai fua le tuipuipui o le COVID-19, e lē faamalosia ma e maua mo tagata uma e 12 tausaga ma luga atu le matutua i totonu o Aotearoa.

Tagai i le Book My Vaccine, pe vili le COVID Vaccination Healthline e faatulaga le aso e fai ai le tuipuipui.

Aafiaga masani

E pei lava o isi fualaau uma, e te ono faalogoina ni aafiaga feoloolo mo le 1—2 aso i le mae‘a ai ona fai o lou tuipuipui. O tulaga nei e masani ai, ma o se faailoga o loo taumafai lou tino e tetee atu i le siama.

O le tele o aafiaga nei e lē umi se taimi e aliae ai ma e lē taofia ai lou faia o se tui lona lua poo au feau masani o le aso. O nisi o aafiaga e ono afaina ai lou faafoeina o le taavale po o le faatautaia o se masini mo se taimi lē tumau.

O le tele o aafiaga ua lipotia e aofia ai:

  • tiga pe fula le itu o le tino na tui
  • lagona le lēlavā ma le ivā
  • tiga le ulu
  • tiga maso
  • faamaalili
  • tiga sooga o ponaivi
  • fiva
  • pata le itu o le tino na tui
  • faafaufau.

O nisi aafiaga e masani ona faatoa aliae i le mae‘a ai o le tui lona lua.

Aafiaga e aliae ae seāseā tupu — Matagaluega o Soifua Maloloina (external link)

Afai o faaletonu lau faalogo, e mafai ona e:

  • tago e tuu se solo mālūlū ma susū poo se pepa ‘aisa i le itu o le tino na tui mo sina taimi puupuu
  • mālōlō ma ia tele le vai e inu
  • inu le paracetamol po o le ibuprofen.

Taimi e saili ai se fesoasoani

Afai o iai ni ou atugaluga pe ua e faama‘ima‘i i le mae‘a ai ona fai o lou tuipuipui, talanoa i lau fomai, poo se isi sui o le soifua maloloina, pe vili le Healthline i le 0800 358 5453.

Afai o e popole i lou saogalemu, vili le 111. Faailoa i ai na fai lou tuipuipui o le COVID-19 ina ia iloa lelei ai tulaga e tatau ona latou iloiloina.

Aafiaga o mea e ilitata ai le tino

E iai taimi e matuā ogaoga ai aafiaga o mea e ilitata i ai le tino ae o se tulaga e seāseā tupu.

Afai na iai se taimi muamua na e tigaina tele ai pe na vave aliae le ilitata o lou tino i soo se tuipuipui, faailoa tulaga nei i le tagata o loo faia lou tuipuipui pe a e taunuu i le nofoaga e fai ai lou tuipuipui.

O le a vaai lelei oe e se tasi o le aufaigaluega a le soifua maloloina ma faamautinoa o loo lelei mea uma, pe a aliae ni aafiaga pe a fai lou tuipuipui o le COVID-19.

Lipotiaina o aafiaga

O le Centre for Adverse Reactions Monitoring (CARM) o le nofoaga tutotonu mo faamatalaga e uiga i aafiaga ua mafua mai i fualaau ma tuipuipui i totonu o Niu Sila.

E mataituina e le CARM faamatalaga nei e iloa ai soo se faaletonu e fesoasoani ai ia saogalemu le faaaogāina ma le faatonuina o fualaau.

A e manao ai, e mafai ona e lipotia aafiaga na e maua ai. O lou lipotiaina o aafiaga na e maua ai o le a tuufaatasia ai faamatalaga na e faailoa i faamaumauga o loo aoina i le lalolagi atoa, ma o le a fesoasoani e iloa ai mea e mafua ai ma soo se faaletonu tau saogalemu e ono tulai mai.

Lipotia aafiaga ua e maua i le CARM (external link)

Aafiaga na lipotia i totonu o Niu Sila (external link)