Tuipuipui o le COVID-19: gaosiga, faamaoniga ma le saogalemu | COVID-19 vaccines: development, approval and safety

E fai fua le tuipuipui o le COVID-19, e lē faamalosia ma e maua mo tagata uma e 12 tausaga ma luga atu le matutua i totonu o Aotearoa.

Tagai i le Book My Vaccine, pe vili le COVID Vaccination Healthline e faatulaga le aso e fai ai le tuipuipui.

Na faapefea ona gaosia tuipuipui o le COVID-19 i se auala vave ma saogalemu

E lei iai se taimi muamua na galulue faatasi faapenei ai saienisi ma faigamalo o le lalolagi atoa e gaosia se tuipuipui. O le galulue faatasi o atunuu ua atili vave ai le gaosiga o le tuipuipui, faataitaiga faasaienisi, ma faamaoniga i le lalolagi atoa.

Na vave ona gaosia tuipuipui e aunoa ma ni auala e faatatope ai le faiga e tusa ma faagasologa e tatau ona faatino po o le afaina ai o le saogalemu.

Na mafai ona faaaogā e ausuesue lo latou malamalama i isi ituaiga o le siama lava lea ma le gaosiga o le tuipupui na vave ai ona amata galuega.

Na mafai foi ona faafaigaluega tagata galulue tauofo i faataitaiga faafomai mai tulaga e masani ai talu ai le fia iloa ma atugaluga o tagata mai tulimanu e fia o le lalolagi e uiga i le COVID-19. Na mafai ona faatino nisi o faataitaiga faafomai i le taimi lava e tasi nai lo le faatali seia mae‘a le faataitaiga muamua. O lona uiga e puupuu lava le taimi na mafai ai e saienitisi ona vave iloa poo aogā le tuipuipui – e tusa ma tulaga masani o se galuega e faitau masina e oo atu i tausaga faatoa iloa le aogā.

Ua atiae kamupani tetele e gaosia tuipuipui, ina ia gaosia vave tuipuipui ma le anoanoai o tuipuipui nai lo tulaga na mafai ai.

Iloiloga o le tuipuipui ma le faamaoniga i totonu o Niu Sila

O le Medsafe o le pulega i totonu o Niu Sila e puleaina le saogalemu o fualaau. E iloilo e le pulega talosaga mo fualaau fou uma, e aofia ai tuipuipui, ina ia mautinoa o loo tausisia tulaga faavaomalo ma manaoga tau lotoifale.

Faatoa faamaonia e le Medsafe le faaaogāina o se tuipuipui i totonu o Aotearoa, pe a faamalieina le pulega i tulaga ua tausisia mo le saogalemu, aogā ma le tulaga lelei. O le auala foi lea ua iloiloina ai isi vailaau e pei o tuipuipui o le fulū.

E lei faia ni auala ‘alo ina ia mafai ona tuuina atu se faatagana e faaaogā ai.

O le tuipuipui o le Pfizer e faitau miliona tagata o le lalolagi atoa na faaaogāina ma manuia ai. O loo faaauau pea ona mataituina mo le saogalemu.

Faapefea ona faatino faataitaiga mo le tuipuipui o le Pfizer

Na maua mai faataitaiga faafomai le aogā tele o le tuipuipui i le matua, itupa, ituaiga tagata, ituaiga tagatanuu ma tagata o loo feagai ma faaletonu tau soifua maloloina.

Ua faailoa mai suesuega tau aoaoga pe ā ma le 95% o tagata na faia tui e lua o le tuipuipui ua puipuia mai le maua ai i āuga o le COVID-19. O lona uiga a mae‘a ona fai atoa ou tuipuipui uma e lua e ono itiiti lava se tulaga e te ono tigaina ai i se ma‘i.

O faataitaiga faafomai uma na faatino, na suesue ai le tuipuipui o le Pfizer i le 44,000 tagata na auai i le suesuega. O le ‘afa o tagata na auai i le suesuega lenei na tuuina atu i ai le tuipuipui ma le isi ‘afa na tuuina atu i ai le tuipuipui faataitai. E eseese ituaiga tagatanuu, tausaga, itupa ma tagata o loo feagai ma faaletonu tau soifua maloloina na auai i le suesuega.

E tolu vaega na faasolo i ai le suesueina o le tuipuipui o le Pfizer:

  • Vaega 1 ma le 2 na iloilo ai le saogalemu ma le gafatia e le tino ona tali atu i se faama‘i i le malosi eseese o le tuipuipui i se vaega toalaiti o le faitau aofai o tagata.
  • Vaega 2 ma le 3 na iloilo ai le saogalemu ma le aogā o le tuipuipui e tetee atu ai i āuga o le COVID-19 i le mae‘a ai ona fai o tui e lua i le malosi faatulagaina, ma e 21 aso e va ai le faiga o tui, i se vaega toatele o le faitau aofai o tagata.

Ina ia malamalama i le umi o le aogā ma le saogalemu o le tuipuipui, o sui auai o le suesuega mo faataitaiga faafomai na faatino o le a mataituina mo le 2 tausaga i le mae‘a ai ona fai o le tui lona lua o le tuipuipui o le Pfizer.