O ai e mafai ona tui i le tuipuipui o le COVID-19? | Who can get a vaccine?

E fai fua le tuipuipui o le COVID-19, e lē faamalosia ma e maua mo tagata uma e 12 tausaga ma luga atu le matutua i totonu o Aotearoa.

Tagai i le Book My Vaccine, pe vili le COVID Vaccination Healthline e faatulaga le aso e fai ai le tuipuipui.

E fai fua le tuipuipui o le COVID-19, e lē faamalosia ma e maua mo tagata uma e 12 tausaga ma luga atu le matutua i totonu o Niu Sila. E lē faamoemoe le faia o lou tuipuipui i le ituaiga visa poo tulaga tau sitiseni o maua ai oe. Matou te lē faaaogāina soo se faamatalaga na aoina mo tulaga tau femalagaiga ma o le a puipuia faamatalaga e patino ia te oe.

O le faia o lou tuipuipui, o lena ua e puipuia oe lava ma faaitiitia lamatiaga o le faapepesi atu o le COVID-19 i lou aiga, uo ma tagata lautele.

O le nofoaga lenei e te maua ai faamatalaga tāua i tagata e mafai ona fai tuipuipui, e aofia ai tulaga e pei o ou tausaga, poo e ma‘itaga poo faasusu lau tama, pe na iai se taimi na ilitata ai lou tino i se tuipuipui, poo e feagai ma ni faaletonu tau soifua maloloina.

Afai e i lalo ifo ma le 12 tausaga lou matua

E lē o mafai e tagata i lalo ifo o le 12 tausaga le matutua ona tui i le tuipuipui o le Pfizer i le taimi nei.

Afai ua silia ma le 65 tausaga o lou matua

Ua faailoa le aogā tele o le tuipuipui ma e saogalemu mo tagata i luga atu ma le 65 tausaga le matutua.

Afai na o fualaauaina e te tausami ai pe iai mea e ilitata ai lou tino

E talafeagai le tuipuipui mo tagata na o fualaauaina e tausami ai. E lē o aofia ai ni meaai e gaosia mai meaola.

E lē o aofia ai foi ni fualaautui, toto, DNA, polotini o fuamoa, fetal material, gluten, mea mai manufata, mea e faasao ai le tulaga lelei o se mea, soy, poo latex (e gaosia le vial stopper mai le synthetic rubber – bromobutyl).

Saili i faamatalaga e te maua ai le lisi atoa o mea o gaosia ai le tuipuipui o le Pfizer (external link)

Afai o e ma‘itaga

Afai o e ma‘itaga, e mafai ona fai lou tuipuipui o le COVID-19 i soo se taimi atoa o e ma‘itaga ai.

Ua faailoa mai faamaumauga mai le tele o tagata o ma‘itaga na mae‘a ona fai tuipuipui i le lalolagi atoa, e leai ma ni tulaga e ono afaina ai le saogalemu pe a fai le tuipuipui o le COVID-19.

E ono fesoasoani le fai o tuipuipui a o ma‘itaga mo pepe, talu ai faamaoniga o le fesuiaiga o mea i totonu o le tino e puipuia ai le toto ma le suāsusu, ma e ono puipuia ai pepe e lei fanau.

Afai o iai nisi fesili poo atugaluga, faatalanoa tulaga nei ma se sui o le soifua maloloina.

Afai o e taumafai ia maua sau pepe

Afai o e taumafai e fai se pepe e mafai ona fai lou tui o le tuipuipui o le Pfizer.

E lē afaina ou genes po o le lē fanau ai foi ona o le tuipuipui o le Pfizer. E lē sopoia e le mRNA mai le tuipuipiui soo se sela o le tino, o loo maua ai lou DNA.

E leai ma se vaega o le tuipuipui po o le spike protein ua gaosia e sopoia totoga fanau o le teine ma fua o le tama.

Afai na iai se taimi na ilitata ai lou tino i nisi o tuipuipui

Afai na iai se taimi na ilitata tele ai lou tino pe na vave lava le ilitata o lou tino i soo se tuipuipui poo se tui, faatalanoa tulaga nei ma lau fomai, sui o le soifua maloloina po o le tagata o loo faia lou tui.

Afai e iai se talaaga o lou maua ai i le anaphylaxis (ilitata o le tino e ono afaina ai le soifua)

E lē tatau ona e faia le tuipuipui pe afai e iai se talaaga o lou maua ai i le anaphylaxis:

  • o soo se mea o gaosia ai le tuipuipui o le Pfizer
  • o se tui na iai muamua o le tuipuipui o le Pfizer.

O ā mea o loo iai i le tuipuipui o le Pfizer — Matagaluega o Soifua Maloloina (external link)

Afai ua e ma‘i pe fiva

Afai ua e ma‘i i le aso na faatulaga ai le faia o lou tuipuipui pe ua sili atu ma le 38°C le maualuga o lou fiva, e tatau ona tolopō le faiga o lou tuipuipui o le COVID seia e malosi lelei.

Afai e te faia se isi tuipuipui

E lē mafai ona fai le tuipuipui o le COVID-19 i le taimi e tasi e fai ai isi tuipuipui. E tatau ona va le taimi e fai ai ma e fuafua i le tuipuipui.

O le tuipuipui o le fulū

Faatali mo le umi pe ā ma le 2 vaiaso e va ai tuipuipui o le COVID-19 ma le tuipuipui o le influenza (fulū).

Afai ua faatulaga le taimi e fai ai tuipuipui o le COVID-19, fai muamua tui uma e lua o le tuipuipui o le COVID-19 – e 3 vaiaso e va ai le faiga o tui e lua. E mafai ona fai lou tuipuipui o le fulū mai le 2 vaiaso talu ona mae‘a lou tui lona lua.

Afai e lei faatulagaina se taimi e fai ai lou tuipuipui o le COVID-19, fai muamua lou tuipuipui o le fulū. E mafai ona fai lou tui muamua o le tuipuipui o le COVID-19 pe a mavae le 2 vaiaso talu ona fai lou tuipuipui o le fulū.

O le tuipuipui o le Misela, Mami ma le Rupela (MMR)

Matou te fautuaina le fai muamua o tui uma e lua o le tuipuipui o le COVID-19 – e 3 vaiaso e va ai le faiga o tui e lua.

Afai e fai muamua lou tuipuipui o le COVID-19, e moomia ona e faatali seia mavae le 2 vaiaso talu ona mae‘a ona fai le tui lona lua ona faatoa fai ai lea o le tuipuipui o le MMR.

Afai e te faia muamua le tuipuipui o le MMR, e moomia ona e faatali seia mavae le 4 vaiaso ona faatoa fai lea o le tui muamua o le tuipuipui o le COVID-19.

Afai o e feagai ma se faaletonu tau soifua maloloina

Na maua mai faataitaiga faafomai le aogā tele o le tuipuipui i le matua, itupa, ituaiga tagata, ituaiga tagatanuu ma tagata o loo feagai ma faaletonu tau soifua maloloina.

E mafai ona e vave maua le tuipuipui pe afai ua 16 tausaga ma luga atu le matua, ma e te ausia se tasi pe sili atu o faatulagana o loo ta‘ua i lalo:

  • E te maua i se faaletonu tau soifua maloloina ma e te agavaa mo le faia o lou tuipuipui o le influenza e faatupeina lautele, e aofia ai fafine ma‘itaga.
  • Ua faamaonia o loo e maua i se faama‘i e afaina tele ai le soifua maloloina o le mafaufau (e aofia ai le schizophrenia, major depressive disorder, bipolar disorder po o le schizoaffective disorder, ma tagata matutua o loo maua i le taimi nei auaunaga i le falemai ma auaunaga faapitoa mo le soifua maloloina o le mafaufau ma tuinanauga).
  • E telē le faaletonu o le tausiga o lou toto maualuga pe ua ogaoga le faaletonu o lou toto maualuga (e ta‘ua le toto maualuga o le hypertension po o le high blood pressure). E tusa ma tulaga faapenei, e faamatalaina le ogaoga o se faaletonu e moomia ai le 2 pe sili atu fualaau e inu e pulea lelei ai.
  • Ua ova tele lou lapoa (sili atu ma le BMI ≥40).

Mo nisi fautuaga e uiga i le faiga o le tuipuipui pe afai o e feagai ma faaletonu ogaoga tau soifua maloloina, o loo faia ni togafitiga, fāata, poo inu ni fualaau, tagai i le upegatafailagi a le Matagaluega o Soifua Maloloina.

Fautuaga mo le tuipuipui mo nisi tagata faapitoa ma tulaga tau soifua maloloina — Matagaluega o Soifua Maloloina (external link)

Last updated: