Fai lou tuipuipui o le COVID-19: tulaga e tatau ona tapena i ai | Getting your COVID-19 vaccine: What to expect

O le tuipuipui o se tasi o auala e tetee atu ai i le faama‘i o le COVID-19 ma puipuia ai le soifua lelei ma le soifua manuia a o tatou tagata.

E fai fua le tuipuipui o le COVID-19, e lē faamalosia ma e maua mo tagata uma e 12 tausaga ma luga atu le matutua i totonu o Aotearoa.

Tagai i le Book My Vaccine, pe vili le COVID Vaccination Healthline e faatulaga le aso e fai ai le tuipuipui.

Puipuiga

E maua fua tuipuipui o le COVID-19 ma e maua mo tagata uma i totonu o Niu Sila.

E puipuia e tuipuipui lou soifua maloloina ma taofia ai faama‘i i auala latou te faagaioi ai le tino e gafatia ona teena le siama, pe a e aafia ai.

E aogā le tuipuipui i le faagaioia o le malosi o le tino e gaosia polotini e puipuia le tino ma sela o le toto e tetee atu i le siama o le COVID-19.

O le faia o le tuipuipui o le COVID-19 o se vaega tāua e te faia mo le puipuia o oe lava mai aafiaga o le siama.

O le taimi lava e mae‘a ai ona fai lou tuipuipui, faaauau pea le faia o gaioiga mo le puipuiga o oe e foia ai le pepesi o le COVID-19. Matua‘i fufulu ma solo mago ou lima. Tale pe mafatua i lou tulilima ma nofo i le fale pe afai ua e ma‘i. O se faiga lea e puipuia ai oe, lou aiga ma isi.

Faaauau pea le faaaogā o le COVID tracer app, faaola le Bluetooth o lau telefoni, ma fai se mea e ufiufi ai ou fofoga pe a e manao ai.

Saogalemu

Faatoa tuuina atu le faatagana mai le Medsafe e faaaogā ai se tuipuipui i totonu o Niu Sila i le taimi lava ua faamalieina ai i latou, o se tuipuipui e saogalemu ma aogā lelei pe a faaaogā. O faatulagana uma nei e faia mo tuipuipui uma o le COVID-19 e siaki ai le saogalemu ma ausia ai faatulagana malosi e pei ona faia i isi tuipuipui.

Tuipuipui o le Pfizer

E te lē maua i le COVID-19 mai le tuipuipui lenei. E lua ou tui e moomia ona fai, pe ā ma le tolu vaiaso e va ai le faiga o tui. Mo le faamautinoa ua e lava puipuia, ia mautinoa na e faia uma tui e lua o le tuipuipui.

Afai ua lē mafai ona e auai i le aso na faatulagaina e fai ai lou tui, ia vave ona toe faatulaga se isi taimi e fai ai.

O tulaga nei ia mafaufau toto‘a i ai a o lei faia lou tuipuipui

Afai na iai se taimi na ogaoga ai le ilitata o lou tino pe na vave lava le ilitata o lou tino i soo se tuipuipui poo se tui, faamolemole faatalanoa tulaga nei ma le tagata o loo faia lou tui.

Afai o faaaogā fualaau e faamānifinifi ai le toto poo se faaletonu i le fegasoloa‘iga o le toto, faamolemole faailoa i le tagata o loo faia lou tui le tulaga lea.

Afai o e ma‘itaga, faamolemole talanoa i le tagata o loo faia lou tui, GP po o le faatosaga.

Matou te lē o faia i le taimi nei tuipuipui o le Pfizer mo i latou e i lalo ifo ma le 12 tausaga le matutua.

Afai ua e maua i āuga o le COVID-19, fai se siaki ma nofo i le fale se‘i maua atu iuga o au siaki sa fai. E mafai ona fai lou tuipuipui i le taimi lava ua faamaonia ai e te lē o aafia i le siama.

O le ā le isi mea e tupu i le mae‘a ai ona faia o la‘u tuipuipui?

E moomia lou faatali mo le umi e lē itiiti ifo ma le 20 minute i le mae‘a ai ona fai o lou tuipuipui e mafai ai e le aufaigaluega a le soifua maloloina ona siaki oe i ni tulaga ogaoga ua ilitata ai lou tino i le tui na fai.

E ono umi atu le taimi e te faatali pe afai na iai se taimi na faateteleina ai faaletonu na e maua ai i le tuipuipui poo isi mea, pe mamao le nofoaga e te toe malaga i ai pe a mae‘a ona fai o lou tuipuipui.

Aafiaga e ono tulai mai

E pei lava o isi fualaau uma, e iai aafiaga o le tuipuipui e ono afaina ai nisi tagata. O āuga e taatele, e feoloolo ma e lē umi se taimi e maua ai ma e lē taofia ai lou faia o le tui lona lua poo au feau masani o le aso.

O aafiaga pito sili ona taatele na lipotia o le tiga i le itu o le tino na tui, tiga le ulu ma faalogoina le lēlavā pe ivā.

Tiga maso, lagona ma‘i, faamaalili, fiva, tiga sooga o ponaivi ma e ono maua foi i le faafaufau. O tulaga ia e iloa ai o loo aogā le tuipuipui. O tulaga nei e masani ona lipotia i le mae‘a ai ona fai o le tui lona lua.

O nisi o aafiaga e ono afaina ai lou faafoeina o le taavale pe faaaogā se masini.

E alia‘e foi tulaga e matua‘i ogaoga ai le ilitata o le tino i le tuipuipui ae o se tulaga e seāseā tupu. Ua a‘oa‘oina lelei tagata e faia tuipuipui i faiga e pulea ai tulaga nei.

Fesoasoani faaopoopo ma faamatalaga

Afai o e faalogoina āuga e ono fesootai ma le COVID-19, e pei o le faifaipea ona e tale, maualuga le fiva pe ua lē mafai pe suia foi lou tofo ma le manogi o mea, nofo i le fale ma fai sau siaki o le COVID-19.

Afai e te lē o mautinoa tulaga o ou āuga pe ua faateteleina le faaletonu, vili le Healthline i le 0800 358 5453.

Afai o iai se popolega i le taimi nei i lou saogalemu, vili le 111, ma ia mautinoa lou faailoa i ai na fai lou tuipuipui o le COVID-19 ina ia mafai ona latou iloiloina lelei tulaga o feagai ma oe.

E tāua le maua o faamatalaga sa‘o

Nofouta i faamatalaga e lē sa‘o poo faamatalaga mai fesootaiga televavave ma isi auala e maua atu ai.

E mafai ona e maua faamatalaga sa‘o ma le faatuatuaina mai le:

covid19.govt.nz/vaccine

health.govt.nz/covid-vaccine (external link)

pe vili le Healthline i le 0800 358 5453.

Last updated: