Soifuaga i le vaitaimi o le vaega 2 | Living at Level 2

Afai ua e maua i le fulū po o āuga o le COVID-19, faamolemole nofo i le fale ma vili le telefoni vili fua a le Healthline i le 0800 358 5453 po o lau fomai mo se fautuaga i le faia o sau siaki. Manatua, e fai fua siaki.

Afai o iai se faalavelave faafuasei, vili vave loa le 111.

I le vaitaimi o le Lapataiga Vaega 2 e tatau ona e:

  • Tausi le mamao e 2 mita mai isi e ese mai tagata o tou nonofo faatasi, po o le 1 mita i totonu o falefaigaluega.
  • Fai se mea e ufiufi ai fofoga:
    • ua atoa le 12 pe luga atu o ou tausaga ma totonu o nofoaga faitele e pei o faletusi, falemataaga ma nofoaga tetele mo faleoloa.
    • o oe o se tasi o le aufaigaluega e gafa ma tagata faatau i se nofoaga o talimalo ai po o nofoaga faitele.
    • e faigata le faamamao (e lē o se tulaga e moomia ae o se faiga e fautuaina malosi).
  • Faamaumau nofoaga o loo e agai i ai ma tagata e te feiloai i ai. Faaaogā le NZ COVID Tracer app, o le api e tusitusi ai fesootaiga mo le NZ COVID-19, po o faamaumauga tusitusia.
  • Nofo i le fale pe afai o e ma‘i. Aua e te alu i le galuega po o le aoga. Aua e te tafao solo.
  • Vili le Healthline e faatulaga le aso e fai ai se siaki pe afai ua aliali ni āuga o le COVID-19. Afai na fai sau siaki o le COVID-19, e tatau ona e faanofoesea i le fale seia maua atu iuga o au siaki sa fai.
  • Faanofoesea vave loa pe afai o le tulaga lea na faailoa atu ia te oe.
  • Fufulu ma solo mago ou lima i taimi uma.

E maua nisi faamatalaga i le:

Faatasiga

O le toatele faatapulaaina o tagata e auai mo potopotoga, faatasiga, ma nofoaga mo faatasiga e:

  • 100 tagata i totonu o so o se nofoaga ua atofaina, ma le
  • 100 tagata i totonu o so o se nofoaga i fafo ua atofaina.

E faatatau tulaga ua faatapulaaina i faatasiga uma, e aofia ai faaipoipoga, maliu, sauniga lotu, taaloga ma tafaoga, faatasiga a aiga ma fiafiaga tumaoti.

E faasino nofoaga ua atofaina i se nofoaga e tasi i totonu po o fafo ma e ese mai isi nofoaga.

Afai e sili atu ma le tasi nofoaga ua atofaina i se nofoaga, e lē mafai ona faatasitasi tagata i le va o nofoaga. E aofia ai pe a ulufale atu, tuua, pe alu ai i totonu o le falelētaua.

E lē o aofia ai tagata faigaluega o saunia auaunaga i se faatasiga i le maualuga faatapulaaina mo faatasiga i totonu ma fafo.

Afai o iai tagata i totonu ma fafo o nofoaga uma, e tatau ona e faamautinoa e lē o faatasitasi vaega e lua i so o se taimi lava. O lona uiga ia mautinoa e ese le faitotoa e ulufale atu ai mo nofoaga e faaaogā faatasi — mo se faataitaiga falelētaua po o fata e faagaioi ai e tagata se mea o fia oka pe totogi.

Saili nisi faamatalaga e uiga i faatasiga i le Lapataiga Vaega 2

Femalagaiga ma feoaiga

Afai o e ma'i, nofo i le fale. Afai o e malosi, e mafai ona e malaga i le vaitaimi o le Lapataiga Vaega 2, e aofia ai isi itumalo o i lalo o le Lapataiga Vaega 2. Ia mautinoa o e faia ma le saogalemu lea tulaga.  

E matua'i faatapulaaina femalagaiga patino i le tagata e sopoia ai le tuaoi o se Lapataiga o Vaega. O se faiga lea e taofia ai le pepesi o le siama. Faatoa mafai ona e malaga e sopoia ai le tuaoi o le Vaega o Lapataiga pe afai o se malaga na faatagaina.

E iai nisi o femalagaiga tau pisinisi ua faatagaina. E faatagaina nisi o femalagaiga patino i le tagata, mo se faataitaiga mo tausiga tau soifua maloloina, faalavelave faafuasei, tuuina atu o le tausiga po o le lagolagosua mo se tasi ua tigaina pe ua lata ina maliu po o tausiga o tamaiti o tau soa le vaaiga. 

Afai e sopoia le tuaoi e malaga ai mo mafuaaga tatau, ia mautinoa o e tauaveina se faamaoniga taliaina.

Afai e lē faatagaina le mafuaaga e tatau ai ona sopoia le tuaoi, e mafai ona e talosaga mo se tuusaunoaga. E moomia ona ausia e lau talosaga tulaga talafeagai.

Saili i nisi o faamatalaga e uiga i femalagaiga, feoaiga ma tuusaunoaga

Faamalositino ma tafaoga

I le vaitaimi o le Lapataiga Vaega 2, e mafai ona e faia pea au taaloga masani ma meafai mo tafaoga pe afai e mafai ona e faia ma le saogalemu. Peitai afai o e ma'i, nofo i le fale.

E mafai ona e faia meafai e pei o le:

  • savalivali, tietie uila ma tuligamanu i fanua faasao lautele
  • aau i faleaau lautele, ae e iai tulaga e faatapulaaina
  • alu i falefaamalositino, ae e iai tulaga e faatapulaaina
  • tietiega vaa ma taaloga i luga o vaa.

E tatau i taaloga ma tafaoga ona ausia taiala mo faatasiga ma faiga o faamaumauina ai tagata na auai.

E faigata ona faia faamalositino ma taaloga pe a fai se mea e ufiufi ai fofoga, o le mea lea e lē moomia ai ona faia se mea e ufiufi ai fofoga pe a faia faamalositino.

I totonu o falefaamalositino, e tatau i tagata ona tausisia le 2 mita e faamamao ese ai mai isi tagata, o lona uiga e ono moomia ona faatapulaa le toatele o tagata e mafai ona auai i totonu o falefaamalositino.

O taimi uma e faamalositino ai i nofoaga faitele, tausisia le 2 mita e faamamao ese ai mai isi tagata e te lē masani ai i tulaga e mafai ai.

Ufi fofoga ma isi mea e ufiufi ai fofoga

O le tele o nofoaga e tatau ai ona faia mea e ufiufi ai fofoga, e aofia ai auala mo femalagaiga lautele, asiasi ai i nofoaga tau tausiga soifua maloloina, o supamaketi, ma isi nofoaga faitele.

Matou te fautuaina foi oe e fai se mea e ufiufi ai fofoga ma tausisia le 2 mita e faamamao ese ai mai isi tagata pe a e tuua lou fale. Aemaise lava pe afai e faigata ona e faamamao ese mai isi tagata. Mo se faataitaiga, pe a piki se takeaway.

Saili i faamatalaga e te iloa ai tulaga e moomia ai ona e faia se mea e ufiufi ai fofoga

Fesoasoani tau meaai ma le soifuaga

Afai o e feagai ma faaletonu tau tupe, meaai, o tulaga i le soifua maloloina o le mafaufau po o le tino, e ono maua le fesoasoani mo oe.

Tagai i le itulau lenei mo faamatalaga e uiga i fesoasoani mo tagata taitoatasi

Tagai i le itulau lenei mo faamatalaga e uiga i fesoasoani mo pisinisi

Aoaoga

Ua tatala aoga faataitai, aoga amata, aoga ma aoga maualuluga faaiunivesite mo tagata uma.

E saogalemu le auai o fanau i aoga.

E tatau i tamaiti po o tupulaga talavou ona nonofo i le fale pe afai:

  • o mama'i
  • o maua i āuga o le COVID-19
  • o faanofoesea
  • o faatali mo iuga o le siaki o le COVID-19 sa fai.

E fautuaina malosi tagata ua 12 tausaga ma luga atu le matutua e fai se mea e ufiufi ai fofoga i aoga.

Falefaigaluega ma pisinisi

E mafai ona tatala nofoaga o faafoe ai pisinisi ua ausia tulaga o moomia tau soifua maloloina mo le aufaigaluega ma tagata e faaaogāina auaunaga.

O tulaga tau soifua maloloina lautele e moomia e aofia ai le:

  • faaali o se ata tele o le NZ COVID Tracer app QR ma ia iai se isi faiga e faamaumauina ai tagata na fesootai; ma
  • tausisia faiga e tumamā ai e pei o le fufulu o lima ma faamamā fola i taimi uma, ma
  • mulimulitai i taiala e faamamao ese ai mai isi tagata.

E mafai ona faafoe auaunaga o saunia i nofoaga e nonofo ai tagata e faaaogāina auaunaga (e pei o totonu o latou fale) ma auaunaga e fesootai vavalalata ai (e pei o fale e faaaulelei ai ma faleotiulu) e ausia faiga tau soifua maloloina lautele. So o se tasi o faigaluega i auaunaga e fesootai vavalalata ai ma tagata e tatau ona fai se mea e ufiufi ai fofoga.

Afai e lē o mafai e le falefaigaluega ona ausia faiga nei o lona uiga e lē mafai ona tatala.

E fautuaina pisinisi uma e faaaogā isi auala e faatino ai galuega ma talanoa i tagata faigaluega e iloa ai lamatiaga ma auala e pulea ai.

E tatau foi i pisinisi ona ausia isi tuutuuga uma tau soifua maloloina ma le saogalemu, tausia lelei le saogalemu o tagata faigaluega ma ausia tulaga maualalo mo galuega.

Faamalosia faamaumauga mo pisinisi ma auaunaga

E iai nisi o pisinisi ma faatasiga e faatulafonoina ona latou faia faiga e mafai ai ona e faamauina le nofoaga sa e iai. E tatau ona sili atu ma le tasi le faiga e mafai ai e tagata ona faamauina nofoaga sa asiasi i ai, aemaise mo tagata e lē mafai ona scan QR codes.

E aofia ai cafes, faleaiga, falekalapu, casinos, konaseti, nofoaga mo tagata matutua, nofoaga tau tausiga soifua maloloina (e lē aofia ai tagata mama'i) faleotiulu, falefaamalositino, falekalapu, faletusi, falefaamasino, pulega faalotoifale ma le malo tele, ma faalapotopotoga mo auaunaga tau agafesootai.

O faiga e mafai ona e faamauina ai le nofoaga sa e asiasi i ai e aofia ai le: 

  • faasino i tagata e faaaogā le NZ COVID Tracer app
  • faamaumau i se api tagata na faaaogā ma asiasi atu i le nofoaga
  • saunia faamatalaga i se laupepa e faatumu mo tagata o faaaogāina auaunaga ma tagata asiasi mo faamatalaga e faafesootai ai ma tuu i totonu o le pusa e ao ese ai 
  • faaaogā faiga o tou faaaogāina e faamaumauina ai tagata e fesootai i le taimi nei, e pei o le swipe-card po o faiga o faatulaga ai tagata e vaai.

E tatau pea i pisinisi ona faaali pea ata tetele o QR code e tusa lava pe afai e lē moomia ona latou faamauina tagata na fesootai.

O faamaumauga o faamatalaga e fesootai ai o faamatalaga e patino i le tagata. E tatau ona aoina, faaaogā, teu, faailoa, ma faatama'ia i se faiga saogalemu ma le malupuipuia e tusa ai ma le Privacy Act 2020. 

E sili atu le faaeteetega e mautinoa ai o saogalemu ma malupuipuia isi faiga o faamaumauina ai fesootaiga.

Tatala faamatalaga i le itulau lenei e iloa ai faiga e tausisia ai faamaumauga ma faamaumau ai fesootaiga mo pisinisi

Auaunaga mo Faalavelave Faafuasei i Vaega o Lapataiga uma

E faafoe pea galuega mo auaunaga tau faalavelave faafuasei i lalo o Vaega o Lapataiga uma.

Afai ua tupu se faalavelave faafuasei, mulimulitai i taiala masani mo faalavelave faafuasei po o fautuaga ua tuuina atu e pulega tau faalavelave faafuasei E faamuamua lou saogalemu.

A e iloa ua e saogalemu, ia e faia gaioiga uma e foia ai le salalau o le COVID-19, e pei o le faamamao ese po o le faia o se mea e ufiufi ai fofoga.

Afai ua faamata'uina lou soifua po o meatotino, vili le 111 i taimi uma ma talosaga i ai mo le Police, Fire po o le Ambulance.

Saili i gaioiga e fai pe a tupu se faalavelave faafuasei

Last updated: