Tē ne mou se vḁi ta | Vaccine basics

Vḁi ne COVID-19 kat a‘noa tӧg ‘e ra, ma säe ofrḁu se le‘et ma ‘e Niu Sirḁgi ne fḁu 12 se rere ka pā teak ‘e vḁi ta.

Sḁkior se Book My Vaccine, ne heʻ se COVID Vaccination Healthline la fḁi ʻou av het se teak ne vḁi ta.

Ka sei ta la rak‘åk la teak ‘e vḁi ta?

Vḁi ne COVID-19 kat a‘noa tӧg ‘e ra, ma säe ofrḁu se le‘et ma ‘e Niu Sirḁgi ne fḁu 12 se rere ka pā teak ‘e vḁi ta.
 
‘Inea ne tes tä puk ne aier‘ḁkiḁg tapenet ta ‘äe ‘es la sur se hanue te‘is (visa) ne ‘äe få‘ fak mantanitū la noh pḁu ‘e hanue te‘ (citizenship) maj ne a‘sokoa ‘amnåk ne mou se vḁi ta kal sḁio‘ ra. ‘Ḁmis kal a‘es‘ao‘åk ‘e ra rogrog ne famori fḁ‘i se garue ne mou se maj te‘is immigration.
 
Sei ta pō la teak ‘e vḁi ne COVID-19?

Ka av hes ta la pō la teak ‘e vḁi te‘is?

‘Ḁmis te‘is kamat nā‘ia vḁi ta ka la väeväe se väeag his ma täe la nā hḁisok‘ḁkiḁg se väeag ‘i. Famör ‘atakoa ‘e Niu Sirḁgi ne fḁu 12 se rere täla väeväe se ta väeagat ‘e väeag famör 4 la a‘sokoa ‘amnåk te‘is.

Tē mumue ta, ‘ḁmis la matḁ‘ ma pärea te‘ ne iris ne la agtḁu ma raksa‘ ne la pō ‘e COVID-19 ‘e ‘oris ut garueaga. Tē te‘is täla a‘jeamjeman mamḁr ne ‘af‘af te‘is on la forḁsit se ‘os pure‘aga ma ‘os la ke la a‘sok ne noh pū‘atā hoi‘ḁki.

‘On rue, ‘ḁmis la nā vḁi ta se te‘ ne famӧr kop ma agtḁu vavhiḁn ma ‘af‘af raksa‘ ne pō la al ‘e rēko ‘af‘af ta.

‘On fakmuri, ‘ḁmis täla nā vḁi ta se te‘ ne iris ne tore ne noh ‘e Aotearoa ne fḁu 12 se rere.

Vḁi ta nā ka kat tӧg ‘e ra se te‘ ne famori, ma kat sḁio‘ ‘e ra ne kḁinag aier‘ḁkiḁg tes ta ‘äe ‘ese (visa) ne ‘äe få‘ fak mantanitū la noh pḁu ‘e hanue te‘ (citizenship) ne ‘igkå‘.

Nōnō ka ‘äe pā far‘åk la kō mij ‘e vḁi ta la pō la ‘äe hot ‘e Niu Sirḁgi hün se ta tēet ne sok ma ‘äe kop pḁu la hot ne hün se ta ‘amnåk fak matanitū, ‘äe kop ma la pō la far‘åk mij la teak ‘e vḁi ta.

Ka la far‘åk tapen ‘a ‘it la teak mij vḁi ta

Vḁi ta ma ‘ou garue ta

Ka vḁi tes täla nā se ‘äea

Vḁi te‘is Pfizer vḁi ‘eseat se COVID-19 ne aier‘åk fak foh ‘e Niu Sirḁgi la a‘es‘ao‘åk. ‘Ḁmis pō se‘ kōa‘ miliӧn 10 ‘e vḁi ta – la hḁiatḁuḁg ma miliӧn 5 ‘e famori la pō la teak a‘ruḁ ‘e vḁi ta la matḁ‘ua ma pärea iris.

Vḁi ta garue ‘e av ne la rak‘åk se ‘ou laloag ‘efe la ‘inea la pelua ‘af‘af ta.

Vḁi te‘is Pfizer:

  • la a‘tatḁu‘åk ma faka se iḁ ta af‘ḁkia ma hoa‘kia rogrog ne mou se ‘af‘af ta ka ne iḁ hat se kḁinag vḁi ‘i messenger RNA (mRNA) vaccine
  • kat ‘es ra ta kḁinag ‘af‘afat ne noh måür la‘ mo, ne atia ne tokana ‘e garue.
  • kat pō ‘e ra la nā se ‘äea COVID-19
  • kat pō ‘e ra la täe se ‘ou DNA
  • kat osim ra ‘e tot, ne ‘ül, ne for, ne fupag, ne tes tū hoi‘åk, ‘on ta mḁnmḁnut

‘Äe kop la teak ‘ou kōa‘at te ‘on rue la hḁiatḁuḁg ma terån 42 (gasav 6) ‘e vḁhiḁg ne ‘ou kōa‘ mumue ta.

Sḁkior ne vḁi ta la garue tapen

Sḁkior la ‘inea ne av hes ta ‘äe kop la teat ‘ou vḁi ta

Sḁkior la ‘inea ne tes ta soko ‘e vḁhiḁg ne ‘ou teak ne vḁi ta

Sḁkior la ‘inea ne raksa‘ tes ta täe se ‘ou foro ‘e vḁhiḁg ne ‘ou teak ne vḁi ta

‘Es‘ao ne vḁi ta la pärea ‘äea

Maj te‘is Medsafe ‘e Niu Sirḁgi ne puer se aier‘ḁkiḁg ma sḁkior ne te‘ ne vḁi fo‘ou ‘atakoa Ka ne hat tape‘ ma te‘ ne vḁi:
 
Se maj te‘is Medsafe ‘oris la aier‘åk ne ta vḁit la a‘es‘ao‘åk ‘e Niu Sirḁgi, iris kop la ‘inea toton:

  • la ‘atakoa‘åk te‘ ne foh ne vḁi kop la ‘es ‘e Niu Sirḁgi
  • la taupir se te‘ ne foh ne fu‘åk se rån te‘ ‘atakoa la pō la ‘inea vḁi ta pō la pärea, la ‘es‘ao ma lelei se ‘af‘af ta.

Vḁi te‘is Pfzier la ‘es‘ao ti‘ pḁu nōnō ka famori la teak a‘ruḁ. ‘E avat ma ne ‘äe teak ‘ou kōa‘ ‘atakoa ‘äe a‘jeamjeman mamḁr ne ‘ou la pō a‘raksa‘ ‘e ‘af‘af ta.

Sḁkior tē te‘is kel‘åk ne pasån 95 ‘e famӧr ne teak ‘e kōa‘ ruḁ ‘e vḁi ta, tä pär ka ū ‘e pō ne faki‘oag ne COVID-19.

Sḁkior ne vḁi ta la garue tapen

Sḁkior ne vḁi ta fup‘åk ma aier‘åk tapen la a‘es‘es‘ao‘åk

Ka pō ‘e tese täe tē pumuet ne ‘äe kop la teak ‘e vḁi ta

‘E avat ne ‘äe teak ‘e vḁi ta ‘eagke‘ea ‘ӓe pӓrea ‘ӓe ma tӓ‘ ma na. ‘Äe hḁiasoag tape‘ ma la a‘jeamjeman mamḁr ne ‘on la forås‘åk ne COVID-19 se ‘oukḁinaga, kḁumane‘aga ma pure‘aga.

‘Äe kop la noh tḁupir se te‘ ne tē lelei ne mou se ‘ou måür fakforo ‘e vḁhiḁg ne ‘ou kō ta

Iḁ mij sirien la ‘inea ne ‘äe la pō la forås‘ḁkia ‘af‘af ta ‘e avat ne ‘äe teak vahiḁ ‘ou kō ‘atakoa ne vḁi ta.

La hḁiasoag la matḁ‘ua ma pärea ‘äea, ‘ou kḁunohoag ta ma te‘ ne iris ne tore, ‘äe kop la noh sok‘åk garue ne la matḁ‘ la hḁiasoaga la fu‘ḁkia forås‘åk ne COVID-19 ‘e vḁhiḁg ne ‘äe la teak ‘e vḁi ta. Se mao‘åk la:

  • Sor a‘lelei ‘ou si‘u.
  • Koh ma he‘jiḁ se isfū ne ‘ou si‘u.
  • Kḁp‘åk ta hḁ‘ ut het la fḁua ‘ou ‘isu ma nuju ‘e av he hӧt ‘e sal ne hoa‘ tӧg sal ofrḁu.
  • Noh matḁ‘ te‘ ne ut ne ‘äe la‘ sin.
  • Sӓe ma a‘es‘ao‘åk NZ COVID Tracer app ma Bluetooth tracing.
  • Fu‘ ‘e ‘ou hanue ta ma he‘ se Healthline ta ‘e (0800 358 5453 (external link)) nōnō ka ‘äe ‘af‘af.

Rak‘åk ne rogrog se nojo hün se vḁi ta ne te‘ ne tē sioksiok ne hot‘åk ne la a‘sūsū filo‘ ‘on famori

Ma ‘on rogrog ma‘oit ‘e sal fo‘ou te‘is online ma social media ‘e hün se vḁi ta. Iḁ pō se‘ ma la noanoa la ‘inea ne rogrog tes täe aier ma pō la tuḁn‘åk sin. ‘Inea lelei ne rogrog ne ‘äe la pō la leum ‘e utut ne ‘äe tuḁn‘åk sin ma se hḁiväeag ta rogrogot se avat ne ‘äe ‘inea ne rogrog ta‘ag aier.

Ka la pō ma räe tapen te‘ ne rogrog ne pō la tuḁn‘åk sin ‘e hün se vḁi ta

Garue se maj ne fuḁp‘ḁkia ma nā‘ia vḁi ta se famori (vaccinator)

‘Ḁmis täe aoa ta famӧr he his ne teak vahiḁ ‘oris vai ta la hḁisaoag se garue ne la nā‘ia vḁi ta se iris ne tore.

Nōnō ka ‘äe le‘et ne a‘u‘uḁ ‘e garue fak tḁku ma nḁsi ne ‘e ‘on ‘ihete‘ garue se maj ne måür fakforo ma pā nā ‘ou ava la hḁiasoag ka kat tӧg ‘e ra, ‘io se website ne Ministerī ne Måür Fakforo la få‘ ma af‘åk ‘ou asa la hḁiasoag.

Få‘ ‘ou asa nōnō ka pā garue fak vaccinator (external link)

Last updated: