ʻOs nohnoho ʻe Tohige tē ʻon Rua (2) | Living at Level 2

Nōnō ka ʻӓe pō ‘e maså‘ ta ne fakʻioag ne ʻafʻaf teʻis COVID-19 noʻom, figalelei ma fūʻ ʻe ou hanue ta ma heʻ se Healthline ʻe sal ne kat aʻnoa tӧg ʻe ra ʻe 0800 358 5453; ne ʻou tḁk ta ne tes tӓe iḁ ʻea ʻe hün se ʻafʻaf teʻis. Ma se maoʻåk ne kat tӧg ʻe ra nōnō ka ʻäe pā kelʻåk la sḁkiroa ne ʻäe pō ʻe ʻafʻaf teʻis.

Nōnō ka ta tēet la sok a‘ferehit, he‘ mij pḁu se 111.

ʻE Tohige tē ʻon Rua ʻӓe kop pḁu la:

  • Noh vӓevā la hḁiatḁuag ma mīta he ruḁ, ma mīta het ʻe ut garueaga
  • kḁp‘åk ta hḁ‘ ut het la fḁua ‘ou ‘isu ma nuju ‘e av ne ‘äe hӧt ‘e sal ne hoa‘ tӧg sal ofrḁu, hӧt ‘e ‘ahḁifere, motoka ne hoa‘ tӧg sal ofrḁu (taxi) ne av ne ‘äe hӧt ma ta le‘ hoi‘ḁkit (ride-share), ‘e ut garueag ne mou se maj ne måür fakforo ma pesnese ma kampanē ne noh säe la‘ mo. Ma tē leleit la kḁp‘åk ta hḁ‘ ut het la fḁua ‘ou ‘isu ma nuju ‘e av ne noanoa la noh väevā ma ta le‘ hoi‘ḁkit.
  • Sor ʻou siʻu ma aʻmamas aʻlelei pḁu ʻe teʻ ne ava
  • Fūʻ ʻe hanue ta nōnō ka iris pō ʻe masåʻ ta ne fakiʻoag ne masåʻ ta, heʻ se ʻoris tḁk ta ne Healthline ma laʻ la kelʻåk se irisa. Se hot la laʻ se ta ut hoiʻḁkit, ne laʻ se rako ne garue
  • Noh matḁʻ la afʻåk teʻ ne ut tūtū ne ʻӓe laʻ sin ma famör ne ʻäe hḁipōag ma. Aʻesʻaoʻåk NZ COVID Tracer app, ne COVID-19 tracer booklet, ne teʻ ne tē ne fåʻ ma afʻåk sio.

Hḁiʻopoag ʻon famori fak se tḁunåʻ la rot agʻesea, maneʻa ma tē fak ʻoafʻofa la tӧh ma ʻe famӧr tarḁu (100) ʻes ta.

ʻOs aragvaka ne ala la vaʻӧnʻåk ke se famӧr tarḁu (100) ʻes ta ka la ma ʻon tē ʻon rereg ne la kop la aierʻåk mumuḁ.

Sḁkior se ut teʻis la pō rogrog ne mou se COVID-19 ma fakiʻoag ne ʻafʻaf ta (external link)

Sḁkior se ut teʻis la pō rogrog ne mou se ʻou la kelʻḁkit ʻe rēko ʻafʻaf ta (external link)

Sḁkior se ut teʻis la pō rogrog ma ʻamnåk ne mou se Bluetooth tracing (external link)

Hḁʻ ut het la fḁua ʻou nuju ma isu ne mask heta

A‘ne‘ne‘åk fak foh vahia kop la kḁp‘åk ta hḁ‘ ut het la fḁua ‘ou isū ma nuju:

  • ‘e sal ne hoa‘ tӧg sal ofrḁu, ma te‘ ne ut ne la tår se sal ne hoa‘ tӧg sal ofrḁu, fakse ut ne la tår la hӧt se ‘ahḁi la‘ uḁf ta ma ut ne la tår pasa
  • ‘e av ne la la‘ se ut garueag ne maj ne måür fakforo
  • ‘e ut ne pesnese ma kampanē ne ut garueag ne noh säe se famori ma la hḁikḁinagag ma famori, hat tape‘ ma koroa ne tӧg‘åk tē se nohnoh ‘on famori, koroa ne tӧg‘åk vḁi se ‘af‘af fakforo ma rī hahalag pensini se motoka.

Kḁp‘åk ta hḁ‘ ut het la fḁua ‘ou isū ma nuju a‘ne‘ne‘åk tape‘ ma la a‘es‘ao‘åk ‘e av ne la rou ‘ou hanue ta la hot se ta utut.

Sḁkior se ut teʻis la pō rogrog ma ʻamnåk ne mou se masks ne kḁpʻåk ne hḁʻ la fḁua ʻou isu ma nuju

A‘sok a‘lelei ne garue fak pesnese

Te‘ ne ut garueag ma pesnes ne pō la a‘sok te‘ ne ‘amnåk ma fas‘åk tē ne mou se public health requirements la pō la sӓe hoi‘åk se ‘oris famӧr garue ma te‘ ne iris ne pā a‘es‘ao‘åk ‘amnåk fak garue.

Te‘ ne foh ne mou se Public health requirements:

  • kop la nā se utut ne famori la pō la räe se NZ COVID Tracer app QR code poster ma te‘ ne sal hoi‘åk ne famori la pō la få‘ ma af‘åk utut ne iris la sur sin; ma
  • kop la nā te‘ ne sal ne la noh ma‘ma‘a hün se ‘af‘af te‘is fak se sor ne si‘u ‘e te‘ ne ava ne a‘ma‘ma‘ a‘lelei pḁu te‘ ne ut ne a‘es‘ao‘åk a‘fuamamḁu, ma
  • noh tḁupir se te‘ ne foh ne kop la noh väevā ‘e ta le‘ hoi‘ḁkit.

Te‘ ne ‘amnåk fak garue ne la a‘sok ‘e ta ut nohoag ‘on famori — fak se ‘oris hanua, ma te‘ ne garue ne kop la a‘sok ka hḁi‘eleag ka a‘sok te‘ ne foh ma fas‘åk tē ne rak‘ḁkim ‘e ut ne matḁ‘ se måür fakforo la aier‘åk la a‘sok ‘oris garue.

Nōnō ka ta ut garueagat kat pō ‘e ra a‘sok te‘ ne foh ma fas‘åk tē ‘i ma iris ha‘ ma kat sḁi‘åk ra la säe se taf ta.

Te‘ ne pesnese te‘is hahan‘åk ma rak‘åk a a‘es‘ao‘åk ta sal hoi‘åk nōnō ka la pō ma hḁifӓegag ma famӧr garue la ‘inea te‘ ne tē ne la a‘ӧkӧk garue ma ao pot ta sal la pō la a‘sok a‘lelei garue.

Te‘ ne pesnese kop la a‘sok tape‘ ma te‘ ne foh ma fas‘åk tē ne faksor‘ḁkim ‘e majat ne matḁ‘ se måür fakforo, la matḁ‘ se måür ne ‘oris famӧr garue ma a‘sok te‘ ne foh fak garue ne mou se ut garueaga se famӧr ne garue se ‘oris pesnese.

Rako ʻe Tohige tē ʻon Rua

Ut rakoag ʻon lӓʻririʻ pḁu, ut rakoga ʻon lӓʻririʻ ne kat seminte sur rak ra, ma ut rakoag ne la rak garue, sӓe hoiʻåk se teʻ famӧr ʻatakoa.

Lӓʻrirʻi la noh pӓr ma ū ʻe rako.

Leleʻa ma haharḁgi kop la fūʻ ʻe hanue ta nōnō ka iris:

  • kat neʻneʻ ra
  • ma fakiʻoag ne COVID-19
  • kop la noh pūʻatā
  • noh tår se aʻfumouʻåk ne ʻoris rogrog ne kelʻḁkit hün se COVID-19.

ʻOs ruerue ʻe laloag ne Tohige tē ʻon Rua

Nōnō ka ʻӓe ʻafʻaf, fūʻ ʻe ou hanue ta.

Nōnō ka ʻӓe neʻneʻ, ma ӓe la pō la hot la laʻ se ta ut hoiʻḁkit. Ka matḁʻ la ʻӓe la aʻsok ʻe salat ne pō la pӓrea ʻӓe.

Rueʻåk ne foro ma teʻ ne ʻamnåk ne aʻmou aʻsok ʻav ne garue vḁhi ʻe Tohige tē ʻon Rua

ʻE Tohige tē ʻon Rua, ʻӓe la pō seʻ ma la aʻsok nōnō ka la aʻsok ʻe ta salat ne ta rērē het ne la pärea ʻäe ma famör tūtū ne la teagʻesea se ʻamnåk taʻag. Ka nōnō ka ʻӓe ʻafʻaf, fūʻ ʻe ou hanue ta. 

ʻE av ne ʻӓe hot la rueʻåk ʻou foro ʻe taf ta, matḁʻ la aʻsousou la mīta he rua ʻe teʻ ne famӧr ne ʻӓe kat ʻinea ʻe ra.

ʻÄe la pō la aʻsok ta tē hoiʻåk:

  • hot la seksek, hӧt tukir ma laʻ la jḁujḁu ʻe ut ne sӓe se taf
  • laʻ la kakou ʻe tḁn kakouag ne sӓe ofrau, ka la ma ʻon foh fūʻåk se ut teʻis
  • laʻ se ut ne ӧs foro, ka la ma ʻon foh la aʻmahʻåk
  • titiu ma kḁinag maneaʻ ne aʻsok ʻe sḁsi.

Soʻo ma katoʻoag fak ʻoafʻofa

Teʻ ne soʻ ma katoʻag ʻoafʻoaf ʻatakoa haʻ la sir ʻe famӧr tarḁut (100) ʻe laloga ne ta utut ʻe av ʻeseat. 

Ka ne hat tapeʻ ma tē ʻatakoa ʻi:

  • famӧr ne la leuof la tēagʻesea ma ʻӓe ʻe ʻou hanue ta
  • soʻ ma katoʻag ne kḁunohoga
  • so‘ ne katoʻag ne sū ne ta aʻlel ne ta ʻinosot
  • hḁiʻopoag se garue ma ʻamnåk fak rotu
  • teʻ ne kḁutḁunaʻiḁg ne pureʻaga ma tḁunåʻ la maneaʻ fak ʻoafʻoaf
  • teʻ ne soʻ fak se aʻsok ne ta terån aʻsūt ne ta hḁiʻopoag la aʻsok ma ag se ta fāat ne ʻel la ʻinos.

Teʻ ne foh ma fasʻåk tē lelei se ala ma aragvaka

Teʻ ne iris ne la garue se soʻ teʻis ne katoʻag teʻ kat hat ra se leʻ tarḁut (100) ne fohʻåk fak foh sin. 

Matḁʻ la teʻ ne ut ne aʻesʻaoʻåk aʻfuamamḁu la maʻmaʻ, ma sor ʻou siʻu ʻe teʻ ne ava ma matḁʻ la noh vӓevā ʻe ta leʻ hoiʻḁkit. Nōnō ka ʻäe kat pō ʻe ra noh väevā ʻe famӧr ne ʻäe kat ʻinea ʻe ra, ma åsʻåk la kḁpʻåk ta hḁʻ het la fḁua ʻou isu ma nuju.

Leʻet ne puer se soʻ ta ne katoʻag ta fakneʻneʻ fakfoh ma kop la fåʻ mafʻåk teʻ ne iris ne hḁiʻopogam la pō la av ne la aoa famori ʻe av ne ta leʻet la pō ʻe afʻaf teʻis la vavhiḁn. Fåʻ ma afʻåk ne famori ʻe soʻ teʻis kat aʻnoa aʻsok ra nōnō ka teʻ ne iris ne hḁiʻlopoag sin hḁiʻineag leʻet se leʻet, ka kop ma iḁ tē leleit nōnō ka la pō la aʻsok.

Nōnō ka ʻӓe tӧg ta utut la aʻsok sin soʻ teʻis ne katoʻoag teʻ ma teʻ ne foh ne fūʻåk sin kop la tḁupir. 

Last updated: