Kelʻåk hün se ʻafʻaf teʻis | Testing

Nōnō ka ʻӓe ma fakʻioag noʻḁkim hün se ʻafʻaf teʻis, figalelei ma fūʻ ʻe ou hanue ta ma heʻ se Healthline ʻe sal ne kat aʻnoa tӧg ʻe ra ʻe 0800 358 5453 ne ʻou tḁk ta ne tes tӓe iḁ ʻea ʻe hün se ʻafʻaf teʻis. Ma se maoʻåk ne kat tӧg ʻe ra nōnō ka ʻäe pā kelʻåk la sḁkiroa ne ʻäe pō ʻe ʻafʻaf teʻis.

Iḁ tē pumuet la ʻis la rӓeʻåk ʻafʻaf teʻis ʻe teʻ ne ut ne ʻis pō la rӓe ʻe laloag ne ʻos pureʻaga. ʻOn fuḁga, ʻḁmis farʻåk se teʻ ne famör ne ma ʻoris fakiʻoag ne ʻafʻaf teʻis COVID-19 la kelʻåk se tḁku – te ka iris noh fumou ʻe hanue teʻis, ne ma ʻoris puk ne aierḁkiḁg ne leu maneʻam.

Kelʻḁkit se iris ne puer se maj teʻis COVID-19 kat tӧg ʻe ra se teʻ ne iris ʻatakoa ne noh ʻe Niu Sirḁgi ma tapeʻ se iris ne kat ʻes puk ne aierʻḁkiget la noh ʻe hanue teʻ.

Teʻ ne ʻou rogrog ne mou se ʻӓe ʻe av ne ʻӓe la kelʻḁki ʻe hün se ʻafʻaf teʻis kal nā ra se Immigration New Zealand, ma tapeʻ ma se avat ne ʻӓe la pō ʻe ʻafʻaf teʻis.

ʻÄe kat aʻnoa ʻes ra ʻe nampa teʻis National Health Index (NHI) ne kop la kelʻåk ta ʻou aierʻḁkiget ne ma ʻon mḁl het (ID) la pō la kelʻåk hün se ʻafʻaf teʻis. Ka ʻӓe kop la nā ʻou utut ma nampaāt se iris ne aʻsokoa garue teʻis ʻe av ne ʻӓe kelʻåk se irisa la pō la iris la rakʻåkiof se ʻäea ʻou rogrog ne kelʻåk ta.

Ka tei utus ta ʻӓe pō la kelʻåk hün se ʻafʻaf teʻis

Teʻ ne ut tūtū ʻatakoa ne ʻӓe la pō la kelʻḁki la gat ke av jen. Ut leleit ne la pō la ʻinea teʻ ne ut ne la kelʻḁki ta District Health Boards ma Public Health Units.

ʻÄe la pō la kel se teʻ ne ut ʻatakoa ʻi ʻe

ʻE hanue te rere - North Island

ʻE hanue te lopo - South Island

Kelʻåk tē te‘is la aʻsok tapen

Nōnō ka ʻӓe pā ʻes la kelʻåk hün se COVID-19, ma iris la teak ta tēet ʻe ʻӓea.

ʻEagkeʻea sal ʻeseat tӓe pō la teak ta tēet hün se ʻafʻaf teʻis. Tēet ne faʻ aʻesʻaoʻåk la aʻfumouʻḁkia ne ʻӓe pō ʻe ʻafʻaf teʻis la teak ta tēet ʻe laloag ne ʻou isu. Iḁ fak se ʻḁi meaʻmeaʻ het ne aʻesʻaoʻåk la kar faliḁg ka ʻḁi heteʻ roaʻåk seʻ.

Tēet ne iris teak sin tӓe la nā se ta lab het ne la aʻfumouʻåk ne ʻӓe pō ʻe ʻafʻaf teʻis ne ʻigkåʻ. Lab teʻis la pō la reag roa ʻoris la hӧʻåk la aʻfumouʻåk ne ʻӓe pō ʻe ʻafʻaf teʻis ne ʻigkåʻ.

ʻE avat ne ʻӓe la kelʻḁki iris la rakʻåk se ʻäea ʻe av hes ta ma la pō tapen ʻou aʻfumouʻḁkiḁg ta. Ma ʻinea ne tes tӓe ʻӓe la pō ʻe ʻafʻaf teʻis ne ʻigkåʻ, iris tӓe la rakʻḁkiof ne tes ta soko.

Nōnō ka ʻӓe kelʻåk ʻe hün se ʻafʻaf teʻis ma tḁupir se teʻ ne fasʻåk tē ne rakʻåk sin ne tes hoiʻåk tӓe la ke la rē.

Ka tes tӓe la soko ʻe av ne ʻӓe la pō ʻe ʻafʻaf teʻis

Nōnō ka ʻӓe la pō ʻe aʻfʻaf teʻis leʻet ʻe majat ne mou se ʻafʻaf teʻis tӓe la heʻoaf se ʻӓea la hḁifӓegag ne tes tӓe la sok se ʻӓea, fak se:

  • ʻon roat ne ʻӓe kop la noh pūʻatā
  • ma teʻ ne sal ne noh pūʻatā se ʻӓe ma ʻou kḁunohoag ta
  • teʻ ne famӧr ne ʻӓe noh hḁiʻeleag ʻe avat kotӓ sok sin.

Iris la rakʻåk la ʻӓe la laʻ se ut ne matanitū ӧs la noh pūʻatā ʻe avat ne ʻӓe ʻafʻafa. Tē teʻis la aʻvavhiḁn la hḁiasoag se ʻou kḁunohoag ta ma aʻjeamjeman ne forås ne ʻafʻaf teʻis. Iḁ hḁiasoag tapeʻ ma se ʻos kḁunohoga ma pureʻaga la noh matḁ ʻis ʻe ʻafʻaf teʻis COVID-19.

Nōnō ka leʻ meaʻmeʻat, ne ʻoris oʻoʻi, ne ta famorit ne matḁʻua iris la pō ʻe COVID-19 ma kop la laʻ la noh pūʻatā, ma ʻḁmis tӓe la hḁigarueag la matḁʻua lӓʻririʻi la noh ū ma nā se ʻoris oʻoʻʻi ne ta famorit ne pō la matḁʻua iris.

Last updated: