Ka aoag ne famori garue tapen | How contact tracing works

Ka aoag ne famori (contact tracing) la hḁiasoag tapen

Aoag ne famori iḁ salat la aoa ma rakʻḁkia se famör ne kop ma la agtḁu vahia ma ta leʻet ne pō ʻe afʻaf teʻis COVID-19.

ʻE av ne ta leʻet la pō ʻe afʻaf teʻis COVID-19, ma Ministerī ne Måür Fakforo (Ministry of Health) ma District Health Boards la aʻesʻaoʻåk teʻ ne sal ma ʻamnåk la rēfiḁkʻåk ne sei tӓe hḁipōag ma leʻet ne pō ʻe ʻafʻaf teʻis ma sei hoiʻåk tӓ pō ʻe ʻafʻaf teʻis.

ʻOn la mij la aoag ne teʻ ne famӧr ne agtḁu ma leʻet me pō ʻe afʻaf teʻis, ta ʻon mij ne la fuʻḁkia forås ne ʻafʻaf teʻis COVID-19.

La hḁiasoag la fuʻḁkia forås ne ʻafʻaf teʻis, ʻḁmis pā ʻes la noh matḁʻ teʻ ne ruerue ʻatakoa, tapeʻ ma se:

  • Ka ut tes ʻatama ta ʻӓe laʻ sin.
  • Ka av hes ta ʻӓe laʻ se tӓe.
  • Ka sei ta ʻӓe hḁipōag sin.

Ka ʻӓe la matḁʻ tapen teʻ ne ut ne ʻӓe laʻ sin

ʻÄe la pō la matḁʻ ʻou ruerue ʻe sal ʻi:

  • aʻesʻaoʻåk ne ta app het la afʻåk teʻ ne ʻou ruerue
  • fåʻ ma afʻåk se ta puk het
  • afʻåk se ta utut, ne
  • sik ta mḁl ʻe teʻ ne ut ne ʻӓe laʻ sin.

Aʻesʻaoʻåk NZ COVID Tracer app ne puk heta nōnō ka la pō, ne aʻesʻaoʻåk tēet ne vavhiḁn se ʻӓea. Fasʻåk la ʻou kḁunohoga ma kḁumaneʻaga la aʻsok tapeʻ ma.

Aʻesʻaoʻåk NZ COVID Tracer app

Ministerī ne Måür Fakforo (Ministry of Health) tracing app ʻNZ COVID Tracerʻ hḁiasoag la fupʻåk ta puk afʻåk tēet la ʻinean teʻ ne ut ne ʻäe laʻ sin ʻe sal foʻou teʻis digital.

ʻÄe la pō:

  • sik mḁl ne scan official QR codes ʻe teʻ ne ut garueag ma pesnes ne aʻesʻaoʻåk ʻamnåk teʻis
  • fåʻ ma afʻåk se puku se utut ne ʻäe laʻ sin ka kat ʻes ra ʻe QR code poster.

ʻAmnåk teʻis app heta ӧs la matḁʻua rogrog ne mou se ʻӓe fak se ʻou asa, ut ne ʻӓe noho ne ʻou nampa ne telefon ta la se hot se ta ut hoiʻḁkit ne ʻӓe kat aierʻåk ra.

Teʻ ne rogrog ma tē ne ʻӓe (kat hat ra se teʻ ne tē ne fakput se ta ʻamnåk hoiʻḁkit) rakʻåk ma nā se Ministerī ta kat vaʻӧnʻåk ra la hḁiväeag ma ta maj hoiʻḁkit ʻe ut garueag ne matanitū ta ma sḁiʻåk ke se ta majat ne garue se hanhapat ne mou se ʻafʻaf teʻis ma hḁiväeag ne ʻou rogrog ma teʻ ne tē ne ʻӓe rakʻåk kop la aʻsok sin la hḁiasoag la matḁʻua måür ʻon teʻ ne famori ʻe rēko raksaʻ ne ʻafʻaf teʻis COVID-19. ʻOu rogrog kal aʻesʻaoʻåk ra se maj fak foho.

ʻE avat ma ne ʻӓe pō, ʻe NZ COVID-19 Tracer app ma tekӓe he teʻis la aʻesʻaoʻåk ke ta data meaʻmeaʻ het. Kepoi ka ʻӓe kokonʻåk aʻesʻaoʻåk ne ʻou data, ma ʻӓe la pō la tår la pō la sokʻåk se wi-fi ma kotӓ ʻӓe teak ne download app heteʻis.

Download app heteʻis ʻe Apple App Store (external link) ne Google Play (external link)

Rogrog hoiʻåk se NZ COVID Tracer app (external link)

Puk teʻis se NZ COVID Tracer

ʻÄe la pō la aʻesʻaoʻåk puk ne NZ COVID Tracer la fåʻ ma afʻåk teʻ ne ut ne ʻäe laʻ sin nōnō ka kat aʻesʻaoʻåk ra NZ COVID Tracer app. Teʻ ne puk het ma ʻon rḁu ne peap folaghul, ma la pō la aʻesʻaoʻåk la hḁiatḁuag ma hulet.
 
Nōnō ka ʻӓe la aʻesʻaoʻåk puk heta ma ʻḁmis pā rakʻåk se ʻӓe:

  • la matḁʻ se puk heteʻis ma ʻӓe la pō la fåʻ ma afʻåk teʻ ne ʻou ruerue ʻatakoa ʻe av ne ʻäe la roua ʻou hanue ta
  • noh fåʻ ma afʻåk ʻou as ta se ut ne ʻӓe laʻ sin fak se koroa.

Download ma pån teʻ ne puk ʻatakoa

ʻÄe kop la sḁkior se misinit ne la pḁnia puk heteʻis la pō la pån ta rḁu peap maʻoit.

Farʻåk la pō ʻe puk heteʻis

Puk heteʻis la pō la farʻåk ka heleʻ ʻe puk saghul ʻe ta tē hḁʻuḁg het. ʻÄe la pō la farʻåk la nā ta puk se ʻӓea ne la pō la fuapʻåk se ʻou pureʻag ta. Teʻ ne far tēet se puk heteʻis kat tӧg ʻe ra ma la pō ʻe laloag ne gasav ruḁ se fol.

Email ʻou as ta, utut tē ʻäe noho e, ma puk he hisi ta ʻäe pā ʻese se Covid19Response@dpmc.govt.nz

Ma ʻon rogorog hoiʻåk se aoag ne famori

Ministerī ne Måür Fakforo (Ministry of Health) ma rogrog hoiʻåk se aoag ne famori ma fåʻ ma afʻåk ne famori ʻoris ruerue.

Teʻ ne ʻamnåk ne la suiʻåk aʻtoton se aoag ne famori, iris ne noh hḁiʻelega ma iris ne noh hḁipoag ma (external link)