Tui te'is Delta variant | The Delta variant

Iḁ tēet ne a'mou soksok 'e av ne 'af'afa kamat la jen ne für la kamat ta kḁinag 'af'af hoi'ḁkit 'Af'af te'is COVID-19 jen ma für a'his vahia 'e laloag ne av 'atakoat ne 'af'af ta kamat la täe se famori. Tē te'is täe a'hele'um tui fo'ou ne 'af'af ta, ne hat tape' ma tui te'is Delta.

Kḁinag tui ma'oi ne mou se COVID-19 kkop ma la täe se 'on mij ne forås ne 'af'af ta, ne 'on mah ne 'af'af ta se famör ne pō 'e 'af'af ta.

Tui te'is Delta variant forås mij pḁu 'e ut tūtū ne rån te' ka ne 'e 'on 'ihete' hat la tui ti'ut ne agtḁu se hanuḁ ma'oi. Iḁ tä tuit ne forås mij pḁu, forås vavhiḁn 'e tuit ne kamatam 'af'af ne COVID-19 ma te' ne tui ne tore.

Tui ne Delta tū'åk sio 'e rēko famӧr ne pō 'e tui te'is Delta:

  • la pō la agtḁu ma 'af'af mah ne fupum 'e COVID-19 ne la mah se' 'e tui ne tore
  • la lamlam se' 'oris kop la sur'ḁkit se hḁspete
  • kop ma la ti' se' 'af'afat ne la sur se irisa (la ti' se' forås ne 'af'af ta 'e laloag foro) ka ne kop ma la roa se' 'oris la noh 'af'afa nōnō ka la a'tatḁu'åk se tui ne tore
  • kop ma kal 'es faki'oag ra no'om (hat la asymptomatic) 'e av ne 'af'af ta pō la forås a'vavhina e
  • la vavhiḁn se' 'oris la forås'åk ne 'af'af ta se famör tū – poto rēfiḁk'åk ne le' 'eseat ne pō 'e Delta la pō se' ma la forås'åk 'af'af ta se famör 5 ne 6 hoi'åk
  • kop ma la luḁk se' av ta 'e 'ou la hḁi'eleag se ta le'et ne pō 'e 'af'af ta se avat ne faki'oga kamat no'om

Ka 'is la pō la matḁ' tapen se 'isa

Ao la räe mij ne iris ne pō 'e 'af'af ta, aoag ne famori, ma iris ne rak'åk pō 'e 'af'af ta la nā mij la noh pū‘atā ma te' ne famӧr ne iris noh hḁi'elelag ma la fu'ḁkia forås ne tui 'atakoa ne COVID-19.

'Is la pō la fu'åk ma rava'åk mijia 'af'af ta 'e laloag ne 'os pure'aga 'e sal 'i:

Teak ne vḁi ta ma tui te'is Delta

'Ou la teak 'atakoa ne 'ou kō ne vḁi ta la nā se 'äea ta päreag ti'ut la se pō 'e tui te'is Delta, ma ag'esea ma päreag ti'ut la se 'af'af mah, sur'åk se hḁspeta ma tape' ma la al.

Sḁkirot se vḁi te' rak'åk ne teak ne kō a'ruḁ ne vḁi ne Pfizer 'on 'es'ao heta la hḁiatḁuḁg ma pasån 88 'on ne'ne' ne la pō la tḁria raksa' ne tui te'is Delta. Päregat ne la pō la se sur'åk se hḁspet ta 'e rēko 'af'af ne tui te'is Delta la hḁiatḁug ma pasån 96.

Vḁi ne COVID-19 kat a'noa tӧg 'e ra, ma säe ofrḁu se le'et ma 'e Niu Sirḁgi ne fḁu 12 se rere ka pā teak 'e vḁi ta. 'Inea ne tes tä aier'ḁkiḁg tes ta 'äe 'ese la sur se hanue te' (visa) ne 'äe få' fak mantanitū la noh pḁu 'e hanue te' (citizenship) teak ne vḁi te'is kat sḁio' ra.

Sḁkior se Book My Vaccine (external link), ne he' se COVID Vaccination Healthline 'e 0800 28 29 26 la fḁi 'ou av het se teak ne vḁi ta. He'et se ut te'is kat tӧg 'e ra, ka kḁugarueag te'is kamat garue 'e 8am la hele' se 8pm, 'e terån 'atakoa ne gasav ta. 'Äe la pō se' ma la far'åk se ta le'et la hӧl'åk se 'ou fäeag ta nōnō ka 'äe pā 'es 'oris hḁiasoaga.

Kat 'es vḁit ra 'oris 'es'ava la 'atakoa'åk pasån 100, la ma 'on avat ta le'et ne teak vahia 'e vḁi ta kop ma la pō 'e tui te'is Delta ma la forås'åk 'af'af ta se lelea' ne tore . Täe 'on'on tēet 'is kop la a'es'ao'åk te' ne tē ne la 'es'ao la hḁiasoag, tape' ma se teak ne vḁi ta, la pärea 'isa ma 'os pure'aga 'e pōag ne 'af'afa.