Tui faiballa COVID-19 vaccine: Ki asha gora foribo | Getting your COVID-19 vaccine: what to expect

COVID-19 mukabela goriballa vaccine oilo di ugga torikar naam aar somazor manushore gom aar sohih halotot rakhibar ugga rasta.

Soli rakon

COVID-19 vaccine iba mana aar New Zealand ot ase de har manushe faibo.

Vaccine e arar ga re sole aar gar bhutore debal banayyore gare virus or loi mukabela goribar la toyyar gore, tuar tu biyaram iba oile.

COVID-19 vaccine iba tuar gar bhutore antibody (ekdilla debal) bana aar lou or cell okkol bana zin niki COVID-19 virus ore mukabela gori faribo.

COVID-19 vaccine iba maron beshi zorurot ase de ekkan ham kiyalla boli hoile yanor zoriya tui tuar sehet ore virus ot tu soli fariba.

Vaccine mairza oi gile goi, COVID-19 biyaram ot tu basiballa ziyan gora fore agor doil gori goriba. Saaf goriyore hat dhuiba aar fuaiba. Haicchaille aar hashile kinkinir bhutore goriba aar sehet gom no thakile gorot thakiba. Yan gorile tui tuare soli fariba, aar tuar aar somazhor har manushore o soli fariba.

COVID tracer app hamisha estemal goriba, tuar phone ot bluetooth or function iba saloo rakhiba, aar tui saile tuar mukh dhakiballa mask fidiba.

Sohih salamote thakon

New Zealand vaccine ugga maribar la aar estemal goribar la sohih ne aar ham hakikotot ham gore ne yan Medsafe e saiyore ezazot di thake. Har COVID-19 or vaccine okkolore ekkudilla goriyore test goribarla boliyore loi za o aar yin sef ne aar standars sohih ne sa.

Pfizer vaccine

Ei vaccine iba dile tuar tu COVID-19 biyaram no oibo. Tuartu homot dui motto diya foribo, tin haftar bade. Sohih gori ham gore faan, kheyal goriyore tui dui motto vaccine mari loiba.

Tui appointment ot hazir oi no farile, arugga appointmrnt sore baitta bano.

Vaccine maribar age yin kheyal rakhiba

Tui age dila de endilla vaccine noto hono fuis mari bade hono dilla biyaram uthal diyye de endilla oile (allergic reaction), vaccine dibo de itarare hoiba.

Lou fatala goribarla hono dawai ho noto lou bon gori no fare de endilla halot thakile, vaccine dibo de itarare hoiba.

Tuar tu fuan fedot oile, vaccine dibo de itarare, GP re no to daima (midwife) re hoiba.

Ya ara Pfizer vaccine iba 12 bosoror tu hom boshi okkolore no marir.

COVID-19 biyaramor alamot okkol thakile, test goro aar faisala no fo faan gorot thako. Tuar tu test or faisala negative ai baade tuare vaccine diya zaibo.

Vaccine mari baade ki oibo?

Tuar tu homot 20 minit entezar gora foribo fuis mari baade tuar tu hono dilla biyaram uthal der ne yan ham goredde itara saiballa.

Tui age fuis mari baade hono dilla biyarame uthal dil de endilla oi thakile, noto fuis mari bade beshi dure za foribode endilla oile aaro lamba somo fan tuar ru entezar gora foribo.

Ibar zoriya onno dilla biyaramor mowka

Har dawai zen gori ham gore endilla, vaccine ibar zoriya ekkudilla goriyore onno dilla biyaramor mowka ase hodun manushor bhutore. Yin hamisha oi thake, dor no aar lamba shomo fan no thake aar yanor zoriya tui tuar dusara fuis mari faribaar tuar fortidinna ham o gori fariba.

Hamisha manushe hode ede bhutore ase de fuis mairze de e daikka bish, matha hora aar horan lage noto bol furai aye.

Duwa bish, sehet ot gom no la, thanda lage, gat zor aye, zura zura ga bish aar matha gure fan lagito fare. Yan mani oilo de ki vaccine diyye de iba ham gorer. Dui nombor bar vaccine di baade yaan beshi funa za.

Baze motto ei biyaram yin or zoriya gari noto machine salaite moshkil oito fare.

Dor biyaram oibar mowka o ase mogor yin o de beshi hom manushor tu. Ede ham goredde vaccine dibo de itarare yin or babote tenning diya giyye.

Aro modot aar maloomat okkol

Tuar tu COVID-19 biyaramor loi talookat ase de endilla alamot oile, mesal noyya gori hamisha hahon, beshi gaar zor/ ga gorom noto bash aar shad no for endilla oile, gorot thako aar ugga COVID-19 test goro.

Tuar biyaramor babote hot no faile noto halot aro horap oi zar goi de endilla oile, Healthline ot kall goro 0800 358 5453.

Tuare sef rakhiballa beshi zorurot forile, 111 kall goro, aar tarare yan funai do de tui COVID-19 or vaccine mairzo itara tuare sohih torika mozin dawai gori fare fan.

Sohih maloomat okkol fai faronor zorurot ase

Kheyal raikhibade ki golti maloomat zin niki social media aar onoo zagat dekha za.

Tui saile sohih aar bishash gori fare de endilla maloomat mfai fariba:

covid19.govt.nz/vaccine

health.govt.nz/covid-vaccine (external link)

aar Healthline ot kall goro 0800 358 5453.

Last updated: