Kasem COVID-19 vaksin blong yu: wanem blong ekspektem | Getting your COVID-19 vaccine: what to expect

Ol vaksin ol i wan wei we yumi save faetem COVID-19 pandemik mo protektem laef mo gud helt blong yumi long komuniti.

Proteksen

COVID-19 vaksin hem i fri mo i evriwan long Niu Silan i save kasem.

Vaksin i protektem helt blong yu mo i stopem siknes from hem i wok wetem bodi blong yu blong faetem vaeres ia, sapos yu fesem.

COVID-19 vaksin i wok taem i stikim imiun sistem blong yu blong i mekem antibodi mo blad sel we ol i wok agensem COVID-19 vaeres.

Taem yu tekem COVID-19 vaksin, hem i wan impoten samting yu mekem blong protektem yu wan agensem ol nara sik we vaeres i kosem.

Taem yu tekem vaksin finis, yu no mas stop blong folem ol sefti fasin blong stopem COVID-19 i pas olbaot. Wasem gud mo draemap ol han blong yu. Kof o snis i go long ben blong han mo stap long haos sapos yu harem olsem yu sik. Hemia bae i help blong protektem yu, famle blong yu mo ol narafala man.

Yu mas gohed blong yusum 'COVID tracer' ap, onem Bluetooth long fon, mo yu save werem wan mask sapos yu wantem.

Sefti

Medsafe i givim raet nomo blong ol i yusum vaksin long Niu Silan taem ol i hapi se hem i sef blong yusum mo i gat ol gud risal. Evri difren COVID-19 vaksin ol i mas go tru long semak test blong sefti mo ol i mas kasem tu semak nambawan standed.

Vaksin Pfizer

Vaksin ia bae yu no kasem COVID-19 long hem. Yu mas kasem tu stik, tri wik i mas pas bitwin fes wan mo seken wan. Blong mekem se yu kasem gud proteksen, mekem sua se yu kasem tu stik blong vaksin ia.

Sapos yu no save go long apoenmen blong yu, arenjem nara deit kwik taem.

Sam samting blong tingbaot bifo yu go tekem vaksin

Sapos yu harem nogud tumas kwiktaem afta long wan vaksin o stik bifo, plis toktok wetem nes.

Sapos yu stap tekem meresin blong mekem blad blong yu i go moa wota o yu gat sik blong blad, letem helt woka i save.

Sapos yu gat bel, plis toktok wetem helt woka, dokta o nes.

Mifala i no givim Pfizer vaksin long olgeta we i no kasem 12 yia yet.

Sapos yu gat ol simtom blong COVID-19, go tekem test mo stap long haos kasem yu faenemaot ol risal. Yu save tekem vaksin nomo taem yu kasem wan negatif test.

Wanem i hapen afta mi tekem vaksin?

Yu mas weit 20 minit o moa afta yu kasem stik, olsem medikel staf i save jekem se yu nogat strong riaksen.

Sapos yu gat ol strong riaksen long ol vaksin o nara meresin bifo i kam, o yu mas travel long longfala rod, bae ol i save askem yu stap weit long taem moa blong jekem se yu oraet.

Sam saed ifekt i save hapen

Olsem evri meresin, vaksin i save kosem saed ifekt long sam pipol. Hemia i hapen fulap taem, ol ifekt i no strong mo ol i no stap long taem, mo bae ol i no save stopem yu blong kasem nambatu stik o blong yu mekem wok blong yu.

Ol riaksen we plante man i kasem hem i; ples we ol i stikim i soa, hed i soa mo ol i filim taed o bodi i hevi.

Masel i soa, yu harem i nogud, kolkol, fiva, ol joen i soa, mo bel i nogud olsem yu wandem traot. Plante man i kasem hemia afta long nambatu stik.

Sam saed ifekt ol i save afektem yu blong draevem trak o yusum ol masin, be hemia i blong sot taem nomo.

Ol strong riaksen long vaksin ol i stap hapen, be ol i hapen wanwan taem nomo. Ol tim blong vaksin ol i tren blong manejem hemia.

Blong kasem moa sapot mo infomesen

Sapos yu kasem ol simtom we ol i olsem blong COVID-19, kof we i no stop, strong fiva, o yu nomo save smelem o testem samting o hemia i jenis i no nomol, stap long haos mo askem blong wan COVID-19 test.

Sapos yu no sua long ol simtom blong yu mo yu harem sik i kam, ringim Healthline long
0800 358 5453.

Sapos yu wari tumas long sefti blong yu, ringim 111 mo mekem sua se yu talem olgeta se yu kasem COVID-19 vaksin finis mo bae ol i jekem yu gud.

Kasem stret infomesen i impoten

Save se i gat ol rong infomesen long sosol midia mo ol nara ples.

Yu save kasem infomesen we i stret mo yu save trastem long:

covid19.govt.nz/vaccine

health.govt.nz/covid-vaccine (external link)

o ringim Healthline long 0800 358 5453

Last updated: